ناۋقان باستالدى
قىرعىزستاندا قىركۇيەكتىڭ 10-ىندا, پارلامەنت سايلاۋىنا تۋرا ءبىر اي قالعاندا سايلاۋ ناۋقانى باستالدى. پارلامەنتتەگى 120 ورىن ءۇشىن 29 پارتيا كۇرەسكە شىقتى. ولار بارلىق قۇجاتتارىن تاپسىرىپ, تىركەلگەندەر. ال 100-دەن اسا پارتيا تىركەلە الماي قالدى. تىركەلگەن پارتيالارعا وزدەرىن ناسيحاتتاۋ ءۇشىن جينالىستار وتكىزۋگە, ميتينگىلەر, شەرۋلەر ۇيىمداستىرۋعا رۇقسات ەتىلگەن. تەلەديدار, گازەت-جۋرنالدار ارقىلى جۇرگىزىلەتىن ناسيحات ءوز الدىنا. ونسىز دا بەلسەندىلىگىمەن ەرەكشە كوزگە ءتۇسىپ جۇرگەن قىرعىز اعايىندار سايلاۋ ناۋقانىندا شەكتەن شىعىپ كەتپەسە ەكەن دەيسىڭ.
يراندا ۋران بار
بولعاندا, ءۇش اتوم بومباسىن جاساۋعا جەتەدى ەكەن. ءبىر بومبا دا جارىلماسىن دەيمىز عوي. جارىلسا, ونىڭ قاسىرەتى قانداي بولاتىنى بەلگىلى. الەمدە مۇنداي بومبالار كوپ. اڭگىمە مۇنداي قارۋدىڭ يران سياقتى ەلدىڭ قولىنا تۇسۋىندە بولىپ وتىر. ماگاتە-ءنىڭ جاسىرىن بايانداماسىندا بۇل ەلدە تومەن بايىتىلعان 2,8 توننا ۋران بار ەكەنى ايتىلعان. ەندى سونى 90 پايىزعا دەيىن بايىتاتىن بولسا, ودان ءۇش بومبا جاساۋعا بولادى. مۇنى ماگاتە-ءنىڭ پرەزيدەنتى يۋكيو امانونىڭ ءوزى ايتىپ وتىر. قاۋىپ قىلعاننان ايتادى, ارينە.
ەتا رايىنان قايتتى
يسپانياداعى باسكتاردىڭ تاۋەلسىزدىگىن ۇزاق ۋاقىت تالاپ ەتىپ كەلە جاتقان ەتا ەكسترەميستىك توبى وزدەرىنىڭ قارۋلى كۇرەسىن توقتاتاتىنىن مالىمدەدى. مۇنى الەم جۇرتشىلىعى وڭ قادام رەتىندە قابىلدادى. اسىرەسە, مۇنى ەكونوميكالىق داعدارىستان ايتارلىقتاي كۇيزەلىپ وتىرعان يسپانيا ۇكىمەتى وڭ قابىلدادى دەۋگە بولادى.
بەلگيا بولىنە مە؟
ەۋروپاداعى وسىناۋ شاعىن عانا, بىراق جوعارى دامىعان ەلدىڭ ءبولىنۋى, ءتىپتى بىرەۋلەرشە ايتقاندا, جويىلۋى مۇمكىن ەمەستەي. بىراق ەلدىڭ تىلدىك قۇرامىنا قاراي ءبولىنۋ قاۋپى كۇشتى. مۇندا حالىق ەكى توپتان تۇرادى: فلاماندتار (60 پايىز) جانە ۆاللوندار (40 پايىز). ارالارىندا ۇنەمى تارتىس بار. كۇشتىرەك دامىعان فلاندريا ايماعى اركەز جەكە مەملەكەت قۇرۋدى تالاپ ەتەدى. پارلامەنتتە وسىلايشا شايقاسىپ جاتادى. ساراپشىلاردىڭ پايىمداۋىنشا, ولار بولىنبەي تىنبايتىنداي.
توڭكەرىس نەگە كەرەك؟
يتار-تاسس-تىڭ حابارىنا قاراعاندا, ورتالىق افريكا رەسپۋبليكاسىندا سلوۆاكيانىڭ 12 ازاماتى وسىندا مەملەكەتتىك توڭكەرىس جاساۋ ارەكەتى ءۇشىن ايىپپەن قاماۋعا الىنىپتى. ولار ەل استاناسى بانگيدەن 600 شاقىرىم جەردە قارۋ-جاراقتىڭ ۇلكەن قورىن الىپ جاتقان كەزدە ۇستالعان كورىنەدى. ارينە, ۇستاعانداردىڭ ءوز دالەلى بار شىعار, بىراق ەۋروپانىڭ ورتاسىنداعى شاعىن ەلدىڭ ازاماتتارىنا افريكاداعى ەلدە توڭكەرىس جاساۋ نەگە كەرەك دەگەن سۇراق تۋىندايدى.
پرەمەردى ولتىرگەن كىم؟
ليۆاننىڭ پرەمەر-ءمينيسترى سااد حاريري ءوزىنىڭ اكەسى, ەلدىڭ بۇرىنعى پرەمەر-ءمينيسترى رافيك ءحاريريدىڭ قازاسىنا سيريانىڭ قاتىسى جوق ەكەن, بۇلاي تۇجىرىم جاساۋ قاتەلىك ەكەن دەگەن مالىمدەمە جاسادى جانە الداعى ۋاقىتتا داماسكىمەن قارىم-قاتىناستى جاقسارتۋ نيەتىن ءبىلدىردى. رافيك حاريري وسىدان بەس جىل بۇرىن بەيرۋتتىڭ ورتالىعىنداعى كۇشتى جارىلىستان قازا تاپقان. ونى ۇيىمداستىرعان سيريا ۇكىمەتى دەلىنىپ كەلگەن. ال ەندى شىن مانىندە بۇل لاڭكەستىك اكتىنى ۇيىمداستىرعان كىم دەگەندە, ەندى ءبىراز ادام وسى ەلدەگى “حەسبوللاح” ۇيىمىنا كۇدىك بىلدىرەدى.
سىعاندارعا اراشا
فرانتسيا ۇكىمەتىنىڭ ەلدىڭ تىنىشىن الىپ وتىرعان سىعانداردى ەلدەن قۋىپ, تۋعان وتاندارى سانالاتىن بولگاريا مەن رۋمىنياعا قايتارۋ جونىندە قاتقىل شارالار بەلگىلەۋىنە قارسىلار دا بارشىلىق. ەۋروپارلامەنت دەپۋتاتتارى فرانتسيا ۇكىمەتىنەن سىعانداردى قۋدى توقتاتۋدى تالاپ ەتتى. بۇعان بايلانىستى شەشىمدى 337 دەپۋتات قولداپ, 245 دەپۋتات قارسى بولدى. بۇگىنگە دەيىن فرانتسيا ۇكىمەتى ەلدەن 600 سىعاندى قۋىپ ۇلگەرگەن بولاتىن.
ماقتانۋدىڭ شەگى جوق
بىرىككەن اراب امىرلىكتەرى ۇكىمەتىنىڭ باسشىسى, دۋبايدىڭ بيلەۋشىسى مۇحاممەد بەن راشيد ءال-ماحتۋم الەمدەگى ەڭ ۇزىن جەكە مەنشىك كەمەنىڭ يەسى بولۋدى ماقسات ەتىپ وتىر. سوعان وراي ءوزىنىڭ “دۋباي” دەپ اتالاتىن ياحتاسىنا قوسىمشا رادار ورناتۋ ارقىلى بۇگىنگە دەيىن ەڭ ۇزىن سانالىپ كەلگەن ورىس وليگارحى رومان ءابراموۆيچتىڭ 162,5 مەترلىك ياحتاسىنان اسىپ تۇسپەك. وسىعان قاراپ, بۇل باسەكەنىڭ, ماقتانۋدىڭ شەگى جوق شىعار دەپ ويلايسىڭ.
ازىرلەگەن ماماديار جاقىپ.