ءومىر شىركىن, قاشاندا ءوز دەگەنىن ىستەمەي قويمايدى ەكەن. قارتايمايمىن دەسەڭ دە شاشىڭا اق قىراۋ ءتۇسىپ, بەت-اۋزىڭدى ءاجىم تورلاعانىن اڭعارماي دا قالاسىڭ. ءماڭگى جاساعىم كەلەدى دەپ قيالداعانىڭمەن, سۇم اجالدان قاشا المايسىڭ. بۇل – ادامزات ءۇشىن ءدالەلدەۋدى قاجەت ەتپەيتىن اقيقات. ول تەك ءبىر قۇدىرەت كۇشى – اللاعا عانا ءمالىم تىلسىم سىر. الايدا, حالقىڭا سۇيىكتى, قادىرلى ءارى ادال قىزمەت ءىستەپ, ۇلت بولاشاعى ءۇشىن ءومىر سۇرگەن ەرەكشە ازاماتتىڭ اياق استىنان اجال قۇشۋى كىمدى دە بولسا وكىندىرمەي قويمايدى. قازاق رۋحانياتىنىڭ كورنەكتى تۇلعاسى, قازاق شەجىرەسىنىڭ تاريحىن بۇتىندەپ ارتىنا ءوشپەس ءىز قالدىرىپ كەتكەن حالقىمىزدىڭ ابزال ازاماتى اقسەلەۋ سەيدىمبەك ەسىمى حالىق جۇرەگىندە ماڭگى قالارىنا ەشكىمنىڭ دە كۇمانى بولا قويماس.
وتكەن جىلى قاسيەتتى ورازا ايىنىڭ قادىر ءتۇنى وتە سالىسىمەن, تاڭەرتەڭ كۇللى قازاق جۇرتىنا اقسەلەۋ اعانىڭ قايتقانى جونىندە قارالى حابار تاراپ, جۇرتتىڭ ەڭسەسى ءتۇسىپ قالعان ەدى.
وتكەن سەنبى كۇنى, تۋرا ءبىر جىلدان كەيىن استانانىڭ №54 مەكتەپ-ليتسەيىندە حالقىمىزدىڭ قادىرلى ازاماتى, بەلگىلى عالىم, ەتنوگراف-جازۋشى, ءارى جۋرناليست اقسەلەۋ سەيدىمبەك اتىنداعى مەموريالدىق مۇراجاي اشىلىپ, ەسكە الۋ بولدى.
مۇراجايدىڭ سالتاناتتى اشىلۋىنا قازاق رۋحانياتىنىڭ الدىڭعى شەبىندە جۇرگەن ەل اعالارى مەن اياۋلى جاننىڭ ۇرپاقتارى, جورا-جولداستارى, مەكتەپ ۇستازدارى مەن وقۋشىلار قاتىستى. عالىمنىڭ ءومىرى جايلى كوپتەگەن ەستەلىكتەر ايتىلىپ, جاستارعا ۇلكەن ونەگە بولارلىق عالىمنىڭ ىزگى ادامگەرشىلىگى, حالقىنا دەگەن ادال ەڭبەگى مەن سۇيىسپەنشىلىگى جايلى ءسوز قوزعالدى.
مۇراجايدىڭ اشىلۋ راسىمىندە ءسوز سويلەگەن №54 مەكتەپ-ليتسەيىنىڭ ديرەكتورى ۇمسىن نۇرجىگىتقىزى: “بۇگىندە ەلىمىزگە بەلگىلى عالىم, جازۋشى, مەملەكەتتىك سىيلىقتىڭ لاۋرەاتى اقسەلەۋ سلان ۇلى سەيدىمبەكتىڭ ەسىمىن استاناداعى №54 مەكتەپ-ليتسەيگە بەرۋ جونىندەگى قالالىق ءماسليحاتتىڭ شەشىمى بار. ەندى, وسىعان بايلانىستى ارنايى قاۋلى شىققاننان كەيىن, ءبىزدىڭ مەكتەبىمىزگە اقسەلەۋ اعامىزدىڭ اتى بەرىلەدى”, – دەپ جينالعان كوپشىلىكتى ءبىر قۋانتتى. مۇراجايدىڭ اشىلۋى وسى ىزگى ءىستىڭ تەك باستاماسى ەكەندىگىن اتاپ وتكەن ول اق ءجۇرەكتى اعانىڭ ەسىمى وسى مەكتەپكە بەرىلۋى كەرەكتىگىن قالالىق اكىمدىككە جەتكىزەتىنىن ايتتى.
مەموريالدى مۇراجايعا عالىمنىڭ جەكە زاتتارى, ءوز قولىمەن جاسالعان قوبىزى, دومبىراسى جانە شاڭقوبىزى قويىلىپ, جازۋشىنىڭ شىعارماشىلىق ومىرىنەن سىر شەرتەتىن فوتوسۋرەتتەر مەن كىتاپتار كورمەسى ۇيىمداستىرىلدى. اقسەلەۋ سەيدىمبەكتىڭ قىزمەتتىك دۇنيەلەرىن دە وسى مۇراجايدان كورۋگە بولادى. قابىرعاعا ىلىنگەن اقسەلەۋ اعانىڭ: “كوكتەگى كۇنگە, جەردەگى ەلىمە مەيىرىمىم قانبادى” دەپ ايتقان ءبىر اۋىز ءسوزى ادامنىڭ جانىن ەرەكشە تەبىرەنتەدى. ال مۇراجايدىڭ كىرەبەرىسىنە ورناتىلعان اقسەلەۋ اعانىڭ بيۋست ۇلگىسىندەگى ەسكەرتكىشى دە ادامنىڭ سەزىمىنە اسەر ەتپەي قويمايدى.
ميرزا فاتالي احۋندوۆتىڭ: “پاتريوت – وتانىنىڭ مەرەيىن ءۇستەم ەتۋ جولىنا, ءوز حالقىنا دەگەن سۇيىسپەنشىلىگى جولىندا قولدا بارىن, ءومىرىن ايامايتىن ادام”, – دەپ ايتقانىنداي, اقسەلەۋ سەيدىمبەك ناعىز ەلدىڭ پاتريوتى, ۇلت ماقتانىشى ءارى جاناشىرى, حالقىمىزدىڭ ءىرى تۇلعاسى بولىپ تاريحتىڭ بەتىندە, ۇرپاق جۇرەگىندە ماڭگى قالا بەرمەك.
اراي ۇيرەنىشبەكقىزى. سۋرەتتەردى تۇسىرگەن ورىنباي بالمۇرات.