تەاتر مەن مەشىتتىڭ ىرگەتاسى قالاندى
قوستاناي قالاسىنىڭ ورتالىعىنداعى العاشقى تىڭ يگەرۋشىلەر الاڭىنا قازاق دراما تەاترىنىڭ جاڭا عيماراتى سالىناتىن بولدى. بۇل كلاسسيكالىق ۇلگىدەگى زاماناۋي قۇرىلىس ءى.وماروۆ اتىنداعى وبلىستىق قازاق دراما تەاترىنىڭ ون جىلدىعى قارساڭىندا ونىڭ ۇجىمى مەن جالپى ونەردى ۇلىق تۇتاتىن قوستانايلىقتارعا تاماشا تارتۋ بولعالى وتىر.
قوستاناي قالاسىنداعى زيالى قاۋىم وكىلدەرى بولاشاق تەاتر تۇسەتىن قۇرىلىس الاڭىنا كوپ جينالدى. وبلىس اكىمى سەرگەي كۋلاگين ونەرسۇيەر قاۋىمدى جاعىمدى جاڭالىقپەن قۇتتىقتاي وتىرىپ, تەاتردىڭ ءبىر جىل ءىشىندە دايىن بولاتىنىنان حاباردار ەتتى.
– بيىل جىل اياعىنا دەيىن ءتورت اي, كەلەسى جىلى سەگىز اي ۋاقىتىمىز بار. تەاتر ينە-جىپتەن شىققانشا اپتا سايىن ەمەس, كۇن سايىن كەلىپ, قۇرىلىس بارىسىن كورىپ تۇرامىن, – دەدى سەرگەي ۆيتالەۆيچ.
تەاتر قۇرىلىسىنا 1 ميلليارد 886 ميلليون تەڭگەگە قاراستىرىلعان. ەڭسەلى قۇرىلىس ءتورت قاباتتان تۇرادى. وندا تەاتر اكتەرلەرى مەن كورەرمەندەرگە بارلىق جاعداي جاسالاتىن بولادى.
سول كۇنى قوستاناي قالاسىنداعى ماياكوۆسكي كوشەسىنىڭ بويىنان جاڭا مەشىتتىڭ دە ىرگەتاسى قالاندى. وبلىس ورتالىعىنداعى ءحىح عاسىردىڭ ەسكەرتكىشى بولىپ سانالاتىن ەسكى مەشىت ءۇيى مۇسىلمان جۇرتشىلىعىنا تارلىق ەتەتىن. ءدىني مەرەكەلەردە مەشىتتىڭ ىشىنە سىيماعان جۇرت ونىڭ سىرتىندا وتىراتىن. وسىدان ەكى جىل بۇرىن وبلىس ورتالىعىندا مەشىت سالۋ تۋرالى شەشىم قابىلدانىپ, ونىڭ ورنى تۋرالى ءبىراز ءاڭگىمە بولعانى دا راس. ەندى تاڭدالعان ورىندا ءزاۋلىم مەشىت قۇرىلىسىنىڭ قازىعى قاعىلدى.
ءنازيرا جارىمبەتوۆا. قوستاناي.
* **
قاراساي باتىر اتىنداعى جاڭا مەكتەپ
دارىندى شاكىرتتەرگە ەسىگىن ايقارا اشتى
وركەنيەتكە بەت بۇرعان قازىرگى كەزەڭدە داميتىن ەل دارىندى ۇلاندارىنان كوپ ءۇمىت كۇتەتىنى تۇسىنىكتى. وسىلايشا بەسىگىن تۇزەپ, بىلىمدىگە جول اشۋعا ۇمتىلعان تۇستا جەر-جەردە ءۇش تۇعىرلى ءتىلدى العا قويعان ءبىلىم شاڭىراقتارىنىڭ قاتارى مولايۋدا. سوعان ساي الاتاۋدىڭ ەتەگىندەگى قارعالى اۋىلىنىڭ “ناۋرىز” ىقشام اۋدانىندا “دارىندى بالالارعا ارنالعان ءۇش تىلدە وقىتاتىن قاراساي باتىر اتىنداعى ارناۋلى گيمنازياسى” مەملەكەتتىك مەكەمەسى جاڭا وقۋ جىلىندا ءوز شاكىرتتەرىن قۇشاق جايا قارسى الدى.
قۇرىلىسى بۇرناعى جىلى باستالعان 500 ورىندىق گيمنازيانىڭ ىرگەلەنۋى ءۇشىن رەسپۋبليكالىق بيۋدجەتتەن 818 ملن.تەڭگە قاراجات ءبولىنىپتى. ونى ويداعىداي يگەرگەن قۇرىلىسشىلار ءساۋلەتتى عيماراتتى ءبىلىم كۇنىنە تارتۋ ەتتى. تاعى ءبىر ايتا كەتەتىن جاي, اتالعان ىقشام اۋدانعا تاريحي اتامەكەنىنە قونىس اۋدارعان قانداستارىمىزدىڭ كوپتەپ ورنىققانى. سوندىقتان سوڭعى بەس جىلدا رەسپۋبليكا بويىنشا العاش ناۋرىز مەرەكەسى تويلانعان وسى اشىق الاڭنان ورالماندارعا جەر تەلىمى بەرىلىپ, اۋىل ىرگەسى كەڭەيە تۇسكەن-ءدى. مۇنداعى ساۋلەتتى ۇيلەر اتا جۇرتىنا ورالعانداردىڭ بۇگىنگى الەۋمەتتىك جاعدايىنان جان-جاقتى حاباردار ەتىپ تۇرعانداي. قارعالى اۋىلدىق وكرۋگىنە قاراستى ايماقتاعى حالىق سانى وسىلايشا وسۋىمەن بىرگە, مەكتەپكە باراتىن بالالار قاتارى دا جىل ساناپ ارتا ءتۇستى. ەلباسىنىڭ “100 مەكتەپ, 100 اۋرۋحانا” باعدارلاماسىمەن قولعا الىنعان قۇرىلىس نىسانى اياقتالىپ, كول-كوسىر قۋانىشقا بولەنگەن شاكىرتتەر التىن ۇيالارىنىڭ تابالدىرىعىن اتتاۋعا ءمۇمكىندىك الدى.
ءبىلىم شاڭىراعىنىڭ اشىلۋ سالتاناتىنا جامبىل اۋدانىنىڭ اكىمى ماحاببات بيگەلديەۆ قاتىستى. “ەلامان” قۇرىلىس فيرماسىنىڭ باستىعى ارتىعالي ميرازوۆ مەكتەپ باسشىلىعىنا گيمنازيانىڭ نىشاندى كىلتىن تابىس ەتتى.
العاشقى قوڭىراۋ قاعىلىپ, قۇشاقتارى گۇل دەستەلەرىنە تولعان ۇستازدار مەن شاكىرتتەر سىنىپ تابالدىرىعىن اتتادى.
كۇمىسجان بايجان. الماتى وبلىسى, جامبىل اۋدانى.