كەشە ءماجىلىس توراعاسى ورال مۇحامەدجانوۆ جاپونيانىڭ قازاقستانداعى توتەنشە جانە وكىلەتتى ەلشىسى سيگەو ءناتسۋيدى ديپلوماتيالىق قىزمەتىنىڭ اياقتالۋىنا وراي قابىلدادى, دەپ حابارلادى ءماجىلىستىڭ ءباسپاسوز قىزمەتى.
ەلشى ءوز سوزىندە قازاقستان مەن جاپونيا اراسىنداعى حالىقارالىق كەلىسىمدەردى بەكىتۋگە پارلامەنتتىڭ بەلسەندى اتسالىسقانىن اتاپ ءوتتى. بىرنەشە كەلىسىمدەردى زاڭداستىرعان قۇقىقتىق بازا قوس مەملەكەتتىڭ ىنتىماقتاستىعىن نىعايتۋ ءۇشىن وتە ماڭىزدى بولدى. جۋىردا جاپونيا پارلامەنتشىلەرى استانادا بولىپ قايتقانى بەلگىلى. ولار ءماجىلىس ۇيىنە كەلىپ, ءارىپتەستەرىمەن دە كەزدەسۋلەر ءوتكىزدى. ەلشى جاپونيا دەپۋتاتتارىنىڭ ۇلكەن ريزاشىلىقپەن اتتانعانىن ءمالىم ەتتى.
ء“سىز ەكى جىل بويى قازاقستاندى جان-جاقتى بىلە ءتۇستىڭىز. پارلامەنتتىڭ قىزمەتىمەن دە جاقىنىراق تانىسىپ, ءبىراز جۇمىستاردى بىرگە اتقاردىڭىز. پارلامەنتارالىق بايلانىستىڭ دامۋىنا ۇلەس قوستىڭىز. ەلىمىزدەگى ءناتيجەلى قىزمەتىڭىزگە العىسىمىزدى بىلدىرەمىز”, – دەدى و.مۇحامەدجانوۆ.
“مەن ەكى جىل بويى جاڭا الەمدى تانىپ-بىلگەندەي بولدىم. قازاقستاننىڭ تاريحى, حالقىنىڭ سالت-ءداستۇرى مەنىڭ جۇرەگىمدە ءۇلكەن اسەر قالدىردى. جاپونيا تۇرعىندارى ازىرگە قازاقستان جايلى از بىلەدى. سوندىقتان جاپون حالقى قازاق ەلىن كوبىرەك ءبىلۋى ءۇشىن ەكى ەل اراسىنداعى بايلانىسىمىزدى جاقسى دەڭگەيگە كوتەرۋىمىز كەرەك. سول سەكىلدى قازاقستان تۇرعىندارى دا جاپونيا جايلى تەرەڭىرەك بىلگەنىن قالايمىن. تۋريزم سالاسى ازىرگە باياۋ دامۋدا. الدىمىزدا تۇرعان ءمىندەتتەر اسا اۋقىمدى. ءمۇمكىندىگىمىز وتە زور. مەن بۇل ەلدەن كەتسەم دە, اركەز قازاقستاننىڭ جەتىستىكتەرىن ناسيحاتتاپ ءجۇرەتىن بولامىن”, – دەدى س.ناتسۋي.
كەزدەسۋ سوڭىندا ءماجىلىس ءتوراعاسى ءوز ارىپتەستەرى اتىنان ەلشىنىڭ قازاقستانداعى مارتەبەلى قىزمەتىنە ريزاشىلىعىن جەتكىزە كەلىپ, كەلەشەكتەگى جۇمىسىندا تابىسقا جەتە بەرۋىنە تىلەكتەستىگىن ءبىلدىردى.