ەقىۇ-نىڭ ءىس باسىنداعى توراعاسى, قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر مينيسترى قانات ساۋداباەۆ كەشە مىناداي مالىمدەمە جاسادى, دەپ حابارلادى قر ءسىم-ءىنىڭ ءباسپاسوز قىزمەتى.
“ەقىۇ-نىڭ ءىس باسىنداعى توراعاسى تاۋلى قاراباق جانجالدى ايماعىنداعى ءتۇيىسۋ جەلىسى بويىندا وق اتۋدى توقتاتۋ رەجىمىنىڭ سوڭعى كەزدەرى بۇزىلۋى جيىلەپ كەتۋىن شەشىمدى تۇردە ايىپتايدى. ەكى جاقتان دا ادام ءولىمىنىڭ ءوسۋى ايتارلىقتاي دابىل قاقتىرادى”, دەلىنگەن مالىمدەمەدە.
ەقىۇ-نىڭ ءىس باسىنداعى ءتوراعاسى سونداي-اق ءوزىنىڭ ءمالىمدەمەسىندە وق اتپاۋ رەجىمىن بۇزۋدىڭ كەز كەلگەن كورىنىسى مينسك كونفەرەنتسياسى اياسىندا جۇرگىزىلىپ جاتقان كەلىسسوز ۇدەرىستەرىن تۇراقسىزداندىرىپ, كونسترۋكتيۆتى ۇنقاتىسۋدى بەلسەندى ەتۋ جولىنداعى مۇمكىندىكتەردى شەكتەيتىنىن اتاپ كورسەتەدى. وسىعان بايلانىستى ول 2010 جىلدىڭ 6 قىركۇيەگىندە جانجالداسۋشى تاراپتاردى سابىرلىلىق كورسەتىپ, وق اتۋدى توقتاتۋ تۋرالى ۋاعدالاستىقتاردى قاتاڭ ساقتاۋعا جانە ءوزارا ايىپتاۋلارعا قۇرىلعان ءمالىمدەمەلەر جاساۋدان تارتىنۋعا شاقىرعان مينسك توبى تەڭ توراعالارىن قولدايدى.
ق.ساۋداباەۆ مالىمدەمەسىنىڭ قورىتىندىسىندا استانادا وتەتىن ەقىۇ ءسامميتى الدىندا, ياعني كۇز ايلارى بويى مينسك توبى تەڭ توراعالارى جوسپارلاپ وتىرعان تاۋلى قاراباق پروبلەمالارىن رەتتەۋ بويىنشا ىمىرا جولىن ءىزدەۋ اتالعان سوزىلمالى جانجالعا بارلىق تىكەلەي قاتىسۋشىلار تاراپىنان پروگرەسكە جەتۋگە شىنايى مۇددەلىلىك تانىتىلعان جاعدايدا عانا ناتيجەلى بولاتىنىن اتاپ كورسەتەدى.