اۋىلداعى جاڭا مادەنيەت ءۇيى. “جول كارتاسى” مەملەكەتتىك باعدارلاماسى اياسىندا اقجار اۋدانى كەڭاششى اۋىلىندا مادەنيەت ءۇيى بوي كوتەردى.
ونىڭ قۇرىلىس جۇمىستارىنا 11 ميلليون تەڭگە جۇمسالدى. جاستاردىڭ كەشكى دەمالىس ورنىنىڭ اشىلۋىنا اۋدان اكىمى اعزام تاستەمىروۆ قاتىسىپ, مۋزىكالىق ورتالىق تارتۋ ەتتى. وبلىستىق مادەنيەت باسقارماسىنىڭ باستىعى ديدار مالاەۆ ون دومبىرا سىيلادى. بۇگىندە شالعايداعى ەلدى مەكەندە ءبىلىم ءۇيى, بايلانىس بولىمشەسى, مەديتسينالىق پۋنكت كوپشىلىككە قىزمەت كورسەتەدى. تازا اۋىز سۋمەن قامتاماسىز ەتىلگەن. ەندى, مىنە اۋىل جاستارىنىڭ كوپتەن بەرگى تىلەگى ورىندالىپ, بوس ۋاقىتتارىن كوڭىلدى دە مازمۇندى وتكىزەتىن بولدى.
ءومىر ەسقالي. سولتۇستىك قازاقستان وبلىسى.
ابايدى ءبارى وقيدى, بىلەدى. وتكەن اپتادا ءبىلىم كۇنى مەرەكەسىمەن قاتار, مەملەكەتتىك ءتىلدى ناسيحاتتاۋ شارالارى جالعاسىپ جاتتى. وبلىس ورتالىعىندا وزگە ۇلت وكىلدەرى اراسىندا اباي شىعارمالارىن وقۋ بايقاۋى ءوتتى. وعان وبلىس اۋداندارى مەن قالالارىنان 12 تالاپكەر قاتىستى. ولار اباي ولەڭدەرى مەن قاراسوزدەرىن جانە م.اۋەزوۆتىڭ “اباي جولى” رومانىنان ۇزىندىلەر وقىدى. وندا جۇلدەلى ورىندى العانداردىڭ بارلىعى دا تىلدىك ورتا جۇتاڭ وڭىردەن كەلگەندەر ەدى. مىسالى, قازاعى ساناۋلى دەنيسوۆ اۋدانىنان كەلگەن مارينا تكاچەۆا ءبىرىنشى جۇلدەنى جەڭىپ الدى. ال قوستاناي مەن رۋدنىي قالالارىنان قاتىسقان ولگا دەدەنكو مەن ۆيكتوريا سوبوتاج ەكىنشى, ءۇشىنشى ورىندى ءبولىستى.
ءنازيرا جارىمبەتوۆا. قوستاناي.
ۇزدىك تاۋارلار باسەكەسى. وسىمەن بىرنەشە جىل قاتارىنان وبلىس كاسىپورىندارى وزدەرى جاساپ شىعارعان ونىمدەرىنىڭ كورمەسىن وتكىزىپ كەلەدى. وتكەن اپتادا وبلىس ورتالىعىندا سول داستۇرگە ساي ۇزدىك تاۋارلار بايقاۋى ۇيىمداستىرىلدى. ال, جالپى, كورمەنى جىل سايىن باقىلاپ جۇرگەن ساراپشىلار تۇتىنۋشى كوڭىلىنەن شىعاتىنداي ساپالى ونىمدەردىڭ كوبەيىپ كەلە جاتقانىن كوردى. بيىل ء“سۇت”, “روسا”, “ازور”,“اگرومير”, “كرەندەل” سياقتى وبلىستىڭ 34-كە جۋىق كاسىپورنى كورمەگە قاتىستى. ەت, ءسۇت ونىمدەرىن وندىرەتىن ۋسپەن اۋدانىنان كەلگەن “رەگتايم” شارۋا قوجالىعى دا بار. ءبارىنىڭ دە شىعارعان ونىمدەرى شەتتەن كەلگەن تاۋارلاردان ءبىر كەم ەمەس, ساپالى ءارى باعاسى ارزان. كورمەگە قاتىسۋشىلار ديپلومدارمەن ماراپاتتالدى. جەڭىمپاز اتانعان ۇزدىك تاۋارلار ەندى استانادا باق سىنايتىن بولادى.
فاريدا بىقاي. پاۆلودار.
قورعالجىڭداعى “قىمىزمۇرىندىق”. اۋدان ورتالىعىندا وتكەن اۋىل شارۋاشىلىعى ونىمدەرىنىڭ ءداستۇرلى جارمەڭكەسىندە جۇرتشىلىق العاش رەت “قىمىزمۇرىندىق” بايقاۋىنىڭ كۋاسى بولدى. سالت-ءداستۇرىمىزدى جاڭعىرتقان مەرەكەگە بارلىق اۋىلدىق وكرۋگتەردىڭ وكىلدەرى قاتىستى. جينالعان قاۋىم سورەلەرگە قويىلعان ساۋمال, قۇنان, بەستى, تۇنەمەل, دونەن, سارى, جۋاس, تاعى باسقا قىمىزداردان اۋىز ءتيىپ, ءوز باعالارىن بەردى. قىمىز باپتاۋشىلار سۋسىننىڭ ەمدىك قاسيەتى مەن قۇرامى, ونىڭ حالقىمىز ءۇشىن الار ورنى مەن ماڭىزى جايلى اڭگىمەلەدى. ارنايى كوميسسيانىڭ شەشىمىمەن شالقار, كەڭبيدايىق, ەكپىندى اۋىلدىق وكرۋگتەرى جۇلدەگەرلەر ساناتىنان كورىنسە, شالقارلىق قايرات بايمۇقانوۆ 5 ليتر قىمىزدى ءسىمىرىپ, كوپشىلىك قوشەمەتىنە بولەندى.
باقبەرگەن امالبەك. اقمولا وبلىسى.
جاپون مادەنيەتىنىڭ كۇنى وتكىزىلدى. سەمەي – ايشىلىق الىس جەردەگى حيروسيما جانە ناگاساكي قالالارىمەن مۇڭى دا, سىرى دا ءبىر باۋىرلاس قالا. سوندىقتان دا بولار, ونداعىلار پوليگون تاقىرىبىنا ارنالعان سەمەيدەگى شارالاردان تىس قالعان ەمەس. جۋىردا وسىنداعى مەديتسينا ۋنيۆەرسيتەتىندە “ەكولوگيا. راديولوگيا. دەنساۋلىق” دەگەن اتپەن وتكىزىلگەن حالىقارالىق كونفەرەنتسياعا جاپونيادان دا وكىلدەر كەلدى. وسى كونفەرەنتسيا جۇمىسى ارالىعىندا № 8 بالالار ۇيىندە جاپون مادەنيەتىنىڭ كۇنى وتكىزىلدى. بالالار ءۇيىنىڭ جەتكىنشەكتەرى جاپون حالقىنىڭ سالت-ءداستۇرى مەن ادەت-عۇرپىنا ارنالعان ۆيكتورينا ويىنىنا زور بەلسەندىلىكپەن قاتىستى. ۆيكتورينا جەڭىمپازدارى ارنايى سىيلىقتارمەن ماراپاتتالدى.
داۋلەت سەيسەن ۇلى. سەمەي.
ساياحاتشىلاردى تارتۋ ءۇشىن. بۇگىندە ەل-ەلدى تانۋدا, تاريحي ەسكەرتكىشتەرىمەن كوزبە-كوز تانىسۋدا, تۇرعىلىقتى حالىق ادەت-عۇرىپتارىن قىزىقتاۋدا ەكوتۋريزمنىڭ مۇمكىندىگى زور. وسى سەبەپتى ونى قالاۋشىلار ۇلعايىپ كەلە جاتقاندىعى ءمالىم. بۇل ساياحات ءتۇرىن ۇناتۋشىلار, اسىرەسە, جەرى كەڭ, ۇلتتىق ەرەكشەلىكتەرى ساقتالعان, وسىمدىكتەر, جانۋارلار دۇنيەسى باي قازاقستان سياقتى ەلدەردى كورۋگە قۇشتار. قاراعاندىدا وتكەن “قازاقستاندا ەكوتۋريزمدى دامىتۋ” تاقىرىبىنداعى حالىقارالىق كونفەرەنتسيادا وسى ماسەلە جونىندە ءسوز قوزعالدى. وعان قاتىسۋشىلار وسى باعىتتا مەملەكەتتىك جانە قوعامدىق ۇيىمدار اراسىنداعى شارالاردى بىرلەستىرىپ, ىسكە اسىرۋدىڭ جولدارىن تالقىلادى.
ايقىن نەسىپباي. قاراعاندى.
قالا مەرەكەسىنە ارنالعان شارا. وسكەمەننىڭ 290 جىلدىعى قارساڭىندا تەڭىز دەڭگەيىنەن 522 مەتر بيىكتىكتە جەلبىرەگەن جالاۋعا جىلدام جەتكەن 11 مەن 72 جاس ارالىعىنداعى ازاماتتار بۇل تابىستارىن تۋعان قالالارىنىڭ قۇرمەتىنە ارنادى. قالا اكىمى يسلام ابىشەۆ بۇقارالىق سپورتتىڭ دامۋىنا ۇلەس قوسىپ جۇرگەن جانى جايساڭ جاندارعا باعالى سىيلىقتار مەن گراموتالار تابىس ەتتى. “قازاقستان” دەگەن جازۋى بار الىپ تۋدىڭ جانىندا ەسكەرتكىش سۋرەتكە ءتۇستى. يسلام ءالماحان ۇلى بولاشاقتا ابىلاي كەتكەن تاۋىنىڭ شىڭىنداعى جالاۋ مەن بوكتەردە, “قازاقستان” دەگەن جازۋى بار جەردە تۇندە جارىق بولاتىنىن, تاۋعا شىعامىن دەۋشىلەرگە اۆتوكولىك جولى سالىناتىنىن, جاياۋلار ءۇشىن باسپالداقتار ورناتىلاتىنىن ايتتى.
وڭداسىن ەلۋباي وسكەمەن.