وبلىستىق ءبىلىم باسقارماسىنىڭ ءمالىمەتتەرىنشە, جالپى وبلىس مەكتەپتەرىندە 92539 وقۋشى ءبىلىم الادى. بارلىق اۋىل مەن قالادا جاڭا وقۋ جىلىنا دايىندىق جۇمىستارى ءوز دەڭگەيىندە جۇرگىزىلدى. جالپى, “جول كارتاسى” باعدارلاماسى بويىنشا وبلىستاعى بىرقاتار مەكتەپتەر كۇردەلى جوندەۋدەن وتكىزىلدى. ال, ەرتىس اۋدانى يسا بايزاقوۆ اۋىلىنداعى 150 ورىندىق مەكتەپ جەرگىلىكتى بيۋدجەت ەسەبىنەن سالىنىپ جاتسا, ول وسى قىركۇيەك ايىندا پايدالانۋعا بەرىلەدى دەپ جوسپارلانعان.
وبلىس كولەمىندە 420 جالپى ءبىلىم بەرەتىن مەكتەپ بار. بۇلاردىڭ قاتارىنداعى 335 اۋىل مەكتەبىندە 35327 وقۋشى ءبىلىم الۋدا. وتكەن وقۋ جىلى مەكتەپتەردە 456 وزگە ۇلت وكىلدەرىنىڭ بالالارى قازاق تىلىندە وقىدى. بۇل كۇندەرى قازاق مەكتەپتەرىنىڭ سانى كوبەيۋدە. قازىر وبلىستا 147 قازاق مەكتەبى, 154 ارالاس مەكتەپ بار.
وسى جىلى 36 بيولوگيا كابينەتىن, 27 مۋلتيمەديالىق كابينەت اشۋ جوسپارلانۋدا. وبلىستاعى 123 مەكتەپتى كۇردەلى جوندەۋ ءۇشىن 1029,4 ميلليون تەڭگە قاراجات جۇمسالدى. جازعى كانيكۋل كەزىندە 1-10 سىنىپ وقۋشىلارى ءۇشىن ءار ءتۇرلى ۇلگىدە 608 لاگەر ۇيىمداستىرىلدى. سونىمەن قاتار, الداعى جىلدارى 216 ورىندىق 83 شاعىن ورتالىق اشۋ, 2435 ورىندىق 19 بالاباقشانى قايتا قالپىنا كەلتىرۋ, وبلىس ورتالىعىندا 1640 ورىندىق 8 بالاباقشا, اقسۋ قالاسىندا 270 ورىندىق 3 بالاباقشا, ەكىباستۇز قالاسىندا 100 ورىندىق 1 بالاباقشا, پاۆلودار اۋدانىندا 160 ورىندىق 3 بالاباقشا, جەلەزين, ماي, ەرتىس, شارباقتى اۋداندارىنىڭ ءارقايسىسىندا 1 بالاباقشادان اشۋ جوسپارلانىپ, بىرقاتارى قولدانىسقا بەرىلىپ تە جاتىر.
جاڭا وقۋ جىلىندا اۋىل مەكتەپتەرىنە 425 جاس مامان باردى. جاس مۇعالىمدەرگە تۇرعىن ءۇي ساتىپ الۋ ءۇشىن قاجەتتى كولەمدە نەسيە قاراجاتى قاراستىرىلعان.
فاريدا بىقاي, پاۆلودار وبلىسى.