اقتوبەگە گەرمانيانىڭ الماتىداعى باس كونسۋلدىعىنىڭ باس كونسۋلى گەرولد امەلۋنگ باستاعان دەلەگاتسيا كەلدى. دەلەگاتسيا مۇشەلەرى وبلىس ورتالىعىندا بىرقاتار كەزدەسۋلەر وتكىزدى. ال بۇل ساپاردى گەرمانيا سىرتقى ىستەر مينيسترلىگى گەتە ينستيتۋتىمەن بىرلەسىپ گەرمانيانىڭ قازاقستانداعى جىلى اياسىندا ۇيىمداستىرىپ وتىر.
قوناقتار وبلىس اكىمى ەلەۋسىن ساعىندىقوۆپەن كەزدەستى, وندا ەكى ەلدىڭ اراسىنداعى ەكونوميكالىق جانە ساۋدا بايلانىستارى, ءوزارا دوستىق قارىم-قاتىناستار توڭىرەگىندە رياسىز اڭگىمە ءوربىدى.
وبلىس اۋماعىندا گەرمانيانىڭ 10-عا جۋىق كومپانياسى جۇمىس ىستەيدى. ولاردىڭ قاتارىندا مۇناي-گاز ۇڭعىلارىن بارلاۋ جانە بۇرعىلاۋ جۇمىستارىن جۇرگىزەتىن “يتاگ-جە” بىرلەسكەن كاسىپورنى, ەكسپەديتورلىق جانە كولىك قىزمەتىن كورسەتەتىن “لوگيستيك پارتنەرس” جشس, سۋ, گاز جانە جىلۋ ەسەپتەگىشتەرىن شىعاراتىن “تسەننەر-اقتوبە” جشس, سىرا, تاماق ونىمدەرىن وندىرەتىن “اليانس سيتي” جشس جانە باسقالارى بار. بۇلار ءوڭىر ەكونوميكاسىن دامىتۋعا وزىندىك ۇلەس قوسىپ كەلەدى. كەزدەسۋ كەزىندە ولاردىڭ قاتارىن الدا دا تولىقتىرۋدىڭ مۇمكىندىكتەرى مول ەكەندىگى اتاپ ءوتىلدى. اسىرەسە, نەمىستەردىڭ قايتارا وڭدەلگەن ەنەرگيا الۋداعى جانە باسقا سالاداعى وزىق تەحنولوگياسى قىزىقتىرادى.
وبلىستىق اكىمدىكتە باس كونسۋل گەرولد امەلۋنگ باستاعان دەلەگاتسيا مۇشەلەرى وبلىستىق باسقارمالار مەن دەپارتامەنتتەر باسشىلارىمەن جانە كاسىپكەرلەرمەن دە كەزدەستى. وندا گەرمانيا ينۆەستيتسياسىن وبلىس ەكونوميكاسىنا تارتۋ, ءوزارا ەكونوميكالىق بايلانىستى ودان ءارى دامىتۋ, جاڭا وزىق تەحنولوگيانى ەنگىزۋ مۇمكىندىكتەرى ءسوز بولدى. باس كونسۋل بۇل كەزدەسۋدى بولاشاقتاعى ىرگەلى ىستەردىڭ باستاپقى قادامى, ۇلكەن ينۆەستيتسيالىق جوبالاردى بىرىگىپ يگەرۋدىڭ باستاماسى رەتىندە باعالادى. اقتوبەلىك كاسىپكەرلەر گەرمانيا ينۆەستيتسياسىنىڭ ۇلكەن وندىرىستىك جوبالارعا ءالى دە از تارتىلىپ وتىرعانىنا توقتالدى.
باس كونسۋل باستاعان دەلەگاتسيا, سونداي-اق “دوستىق” ۇيىندە بولىپ, وسىنداعى ەتنيكالىق نەمىستەردىڭ “ۆوزروجدەنيا” مادەني ۇيىمىنىڭ وكىلدەرىمەن كەزدەستى.
ال تۇستەن كەيىن “وسى زامانعى گەرمانيا” جانە “گەرمانيادا جاسالعان قايتا وڭدەلگەن ەنەرگيا” DENA تەحنولوگيا كوشپەلى كورمەلەرىنىڭ اشىلۋىنا قاتىستى. “وسى زامانعى گەرمانيا” كورمەسىنە بەرليندىك فوتوگراف تورستەن ەلگەردىڭ وسى ەلدىڭ كوپ قىرلى قوعامدىق, الەۋمەتتىك جانە ءمادەني ءومىرىن ايشىقتى كورسەتكەن 30 سۋرەتى قويىلعان. فوتوسۋرەتتەر قازىرگى گەرمانيانىڭ اسەم تابيعاتىن, ساۋلەتى كەلىسكەن قازىرگى زامانعى جانە تاريحي عيماراتتارىن كوز الدىڭىزعا اكەلەدى. ال “گەرمانيادا جاسالعان قايتا وڭدەلگەن ەنەرگيا” كوشپەلى كورمەسىنە كەلۋشىلەر 24 باننەردەن 13 قايتا وڭدەلگەن ەنەرگيا تەحنولوگياسىمەن تانىسا الادى. ولاردان جەل, كۇن, گەوتەرمالدىق, فوتوەلەكترلىك جانە باسقا قۋاتتاردى الۋدىڭ تەحنولوگياسى جايلى كەڭ ماعلۇمات الۋعا بولادى. كورمە تەك اقپاراتتىق سيپاتتا بولىپ قانا قويماي, گەرمانيا مەن قازاقستان اراسىندا وسىنداي تەحنولوگياعا قىزىعۋشىلىق تۋعىزۋعا ىقپال ەتەدى دەپ كۇتىلۋدە. كورمەنىڭ اشىلۋ راسىمىندە وبلىس اكىمىنىڭ ورىنباسارى روزا كەمالوۆا قازاقى داستۇرمەن باس كونسۋل گەرولد امەلۋنگتىڭ يىعىنا شاپان جاپتى.
ساتىبالدى ءساۋىرباي, اقتوبە وبلىسى.