بايلانىس جانە اقپارات مينيسترلىگىندە حالىقارالىق GSM اسسوتسياتسياسى, “كار-تەل” جشس جانە باسەكەلەستىكتى قورعاۋ اگەنتتىگى وكىلدەرىنىڭ قاتىسۋىمەن ينتەركوننەكت (جەلىارالىق قوسىلۋ) ستاۆكالارىن تومەندەتۋ ماسەلەلەرى جونىندە كەزدەسۋ بولىپ ءوتتى.
بۇل كەزدەسۋ بايلانىس جانە اقپارات مينيسترلىگىنىڭ ۇيالى بايلانىس قىزمەتى تاريفتەرىن تومەندەتۋ جونىندەگى جۇمىسى شەڭبەرىندە ۇيىمداستىرىلدى. وسى ورايدا ۇستىمىزدەگى جىلدىڭ شىلدە ايىندا بايلانىس جانە اقپارات ءمينيسترى ا.جۇماعاليەۆتىڭ قازاقستان بايلانىس وپەراتورلارى كەڭەسىمەن كەزدەسۋى بارىسىندا كومپانيانىڭ تاياۋ ۋاقىتتاردا ءوز قىزمەتتەرىنىڭ تاريفتەرىن تۇپكى تۇتىنۋشى ءۇشىن جانە “ينتەركوننەكتتىڭ” ەسەپتىك ستاۆكالارى بويىنشا تومەندەتۋ جونىنەن ءوز ۇسىنىستارىن بەرۋ تۋرالى مىندەتتەمە العانىن ەسكە سالا كەتۋ قاجەت.
كەزدەسۋدە بايلانىس جانە اقپاراتتاندىرۋ كوميتەتىنىڭ ءتوراعاسى ريزات نۇرشابەكوۆ حابارلاعانداي, ۇيالى بايلانىس وپەراتورلارى اراسىندا جەلىارالىق قوسىلۋلارعا سوناۋ 1999 جىلى بەلگىلەنگەن تاريفتەر سوڭعى 11 جىل بويىنا وزگەرمەگەن. سول سياقتى ول “ينتەركوننەكت” ستاۆكالارىنىڭ جوعارى بولۋىنىڭ ۇيالى بالانىس قىزمەتتەرى تاريفتەرىن تومەندەتۋگە كەدەرگى كەلتىرۋى مۇمكىن ەكەنىن دە اتاپ ءوتتى.
كەزدەسۋ قورىتىندىسىندا ر.نۇرشابەكوۆ مينيسترلىكتىڭ “ينتەركوننەكت” ستاۆكالارىن تومەندەتۋدى جۇزەگە اسىرۋ تۋرالى ۇيالى بايلانىس وپەراتورلارىنىڭ ورتاق شەشىمىن كۇتەتىندىگىن اتاپ كورسەتتى. ونىڭ ويىنشا, بۇل ماسەلەنى شەشۋدە حالىقتىڭ دا, سول سياقتى ۇيالى بايلانىس وپەراتورلارىنىڭ دا مۇددەلەرىن ەسكەرە وتىرىپ دۇرىس كوزقاراس تابا ءبىلۋ قاجەت.
“ەگەمەن-اقپارات”.