ۇستىمىزدەگى جىلدىڭ كۇزىندە, دالىرەك ايتساق 18-20 قازان ارالىعىندا استانادا رۋحاني مادەنيەتتىڭ بۇكىلالەمدىك فورۋمى وتپەك. مۇنداي شارا تاريحتا تۇڭعىش رەت ۇيىمداستىرىلىپ وتىر.
فورۋمعا ءتۇرلى ەلدەردىڭ كوزى ءتىرى رۋحاني كوسەمدەرى, مادەنيەت پەن ونەر مايتالماندارى, ساياسات جانە قوعام قايراتكەرلەرى, عالىمدار قاتىسپاق. مىسالى, فورۋمعا مەكسيكالىق جازۋشى, قوعام قايراتكەرى گابريەل گارسيا ماركەس, برازيليالىق اتاقتى جازۋشى پاۋلو كوەلو, رەسەيلىك كينورەجيسسەر, وسكار سىيلىعىنىڭ يەگەرى نيكيتا ميحالكوۆ, جازۋشى ولجاس سۇلەيمەنوۆ سەكىلدى تۇلعالار شاقىرىلىپ وتىر. ولار بۇگىنگى زامان الدىندا تۇرعان ماسەلەلەر, ادامزات وركەنيەتىندەگى داعدارىستار جۇيەسى توڭىرەگىندەگى ويلارىن ورتاعا سالىپ, سونداي-اق رۋحاني جانە مادەني قۇندىلىقتاردىڭ مارتەبەسىن جوعارىلاتۋ ماقساتىندا وي وربىتەدى. بۇكىلالەمدىك فورۋمدى وتكىزۋ ءجونىندەگى يدەيانى “مير چەرەز كۋلتۋرۋ” حالىقارالىق اسسوتسياتسياسى, “رۋحاني كەلىسىم كونگرەسى” حالىقارالىق قوعامدىق قورى, سونداي-اق ەلىمىزدىڭ, رەسەيدىڭ, ەۋروپانىڭ قوعامدىق ۇيىمدارى ۇسىنىس ءبىلدىرىپ, ول ۇسىنىس رەسپۋبليكا باسشىلىعى تاراپىنان قولداۋ تاپتى.
ادامزاتتىڭ زور رۋحاني قۋاتقا يە وكىلدەرىنىڭ باستارىن ءبىر قاۋىمداستىققا بىرىكتىرىپ, ءبىر ارناعا توعىستىرۋ, سول ارقىلى بۇكىل الەم ەلدەرىنە توزىمدىلىك, تۇسىنىستىك, دوستىق, كورشىلىك قارىم-قاتىناستى ورناتۋ يدەيالارىن, ادام ساناسىندا جاقسىلىققا دەگەن سەنىمدى جانداندىرىپ, قالىپتاستىرۋعا تالپىندىراتىن الەمدىك ۇيىم قۇرۋ ماقساتىمەن ءوتكىزىلگەلى وتىرعان رۋحاني مادەنيەتتىڭ بۇكىلالەمدىك فورۋمى ەلباسىنىڭ ءوز ۇسىنىسىمەن باستالىپ, ءتىكەلەي جەتەكشىلىگىمەن وتكەن بۇكىلالەمدىك رۋحاني كەلىسىم كونگرەسىنەن كەيىن تۋىنداعان. بۇل فورۋم الەم تاجىريبەسىندە العاشقى بولىپ رۋحاني مادەنيەتتىڭ قوس قاناتى: ءدىني رۋحانيات پەن دۇنيەلىك رۋحانياتتى قوسۋدى ماقسات ەتىپ وتىر. فورۋم ماقساتى بۇۇ-نىڭ بيىلعى جىلدى مادەنيەتتەر ديالوگى جىلى دەپ جاريالاعان باعدارلاماسىمەن ۇشتاستىرىلىپ وتىر.
ۆەنەرا تۇگەلباي.