كەشە ءماجىلىس سپيكەرى قابيبوللا جاقىپوۆتىڭ توراعالىعىمەن بەسىنشى سەسسيا بويىنشا ءماجىلىستىڭ العاشقى بيۋرو وتىرىسى ءوتتى, دەپ حابارلادى پالاتانىڭ ءباسپاسوز قىزمەتى.
ءماجىلىس توراعاسى دەپۋتاتتاردىڭ جازعى كانيكۋلى كەزىندە پرەمەر-مينيستر باستاعان جاڭعىرتۋ ءجونىندەگى ۇلتتىق كوميسسيا پرەزيدەنت اكىمشىلىگىمەن, ۇكىمەتپەن, پارلامەنت پالاتالارىنىڭ اپپاراتتارىمەن ەتەنە جۇمىس اتقارعانىن ايتا كەلىپ: «ەلباسىمىزدىڭ ۇلت جوسپارىن زاڭنامالىق تۇرعىدان قامتاماسىز ەتۋگە بايلانىستى بارلىعى 67 زاڭ قابىلداۋ ۇسىنىلىپ وتىر. ءبىز ونى ابىرويمەن ورىنداۋىمىز قاجەت. قازىردىڭ وزىندە 37 جاڭا زاڭ جوباسى ءماجىلىس قاراۋىنا ەنگىزىلدى», – دەدى ق.جاقىپوۆ.
ال بۇرىننان ءماجىلىس قورجىنىندا جاتقان 7 زاڭ جوباسىن قوسقاندا, الداعى جالپى وتىرىستا دەپۋتاتتار تالقىسىنا 44 زاڭ جوباسى ۇسىنىلماق. وسىعان بايلانىستى حالىقارالىق ىستەر, قورعانىس جانە قاۋىپسىزدىك كوميتەتىنە – 10, زاڭناما جانە سوت-قۇقىقتىق رەفورما كوميتەتىنە – 8, قارجى جانە بيۋدجەت كوميتەتىنە – 7, ەكونوميكالىق رەفورما جانە وڭىرلىك دامۋ كوميتەتىنە – 4, الەۋمەتتىك جانە مادەني دامۋ كوميتەتىنە – 8, اگرارلىق ماسەلەلەر كوميتەتىنە – 2, ەكولوگيا ماسەلەلەرى جانە تابيعات پايدالانۋ كوميتەتىنە 5 زاڭ جوباسى بويىنشا قورىتىندى ازىرلەۋ مەرزىمىن تاعايىنداۋ كوزدەلىپ وتىر.
ولاردىڭ قاتارىندا مەملەكەتتىك قىزمەت, جوعارى سوت كەڭەسى, قوعامدىق كەڭەستەر, سىبايلاس جەمقورلىققا قارسى ءىس-قيمىل, «استانا» حالىقارالىق قارجى ورتالىعى تۋرالى, ەڭبەك كودەكسىنىڭ جوباسى جونىندە, مىندەتتى الەۋمەتتىك مەديتسينالىق ساقتاندىرۋ, جەر كودەكسىنە وزگەرىستەر مەن تولىقتىرۋلار ەنگىزۋ, ورگانيكالىق ءونىم ءوندىرۋ, اقپاراتقا قول جەتكىزۋگە قاتىستى, سونداي-اق, قازاقستان – قىتاي مەملەكەتتىك شەكاراسىنىڭ رەجىمى تۋرالى كەلىسىمدى, شانحاي ىنتىماقتاستىق ۇيىمىنا مۇشە مەملەكەتتەردىڭ ۇكىمەتتەرى اراسىنداعى حالىقارالىق اۆتوموبيل تاسىمالدارى ءۇشىن قولايلى جاعدايلار جاساۋ تۋرالى كەلىسىمدى راتيفيكاتسيالاۋ تۋرالى زاڭ جوبالارى بار.