ەرلىك ساباعى

جاڭا وقۋ جىلىندا ءار مەكتەپتە ءوتتى كەشە العاش رەت قازاقستان رەسپۋبليكاسىنىڭ بارلىق مەك­تەپتەرى مەن كوللەدجدەرىندە قور­عانىس مينيسترلىگى ءبىلىم جانە عىلىم مينيسترلىگىمەن بىرلەسىپ «ەرلىك ساباقتارىن» وتكىزدى. ول قازاق حاندىعىنىڭ 550 جىلدىعى مەن 1941-1945 جىلدارداعى ۇلى وتان سوعىسىنىڭ 70 جىلدىعىن مەرەكەلەۋ شەڭبەرىندە 1 قىركۇيەك – ءبىلىم كۇنىنە ورايلاستىرىلدى. «اسكەري-پاتريوتتىق تاربيەنى كەشەندى جۇرگىزىپ, ونى مەكتەپ وقۋشىلارى اراسىندا كەڭىنەن ناسيحاتتاۋ جانە جاس ۇرپاقتىڭ بويىنا ءسىڭىرۋ بۇگىنگى كۇننىڭ تالابى بولىپ وتىر. وسى ورايدا, «ەرلىك ساباقتارىن» ساپالى ۇيىمداستىرۋ ءۇشىن ادىستەمەلىك كەشەنى ازىرلەندى» – دەدى قورعانىس ءمينيسترىنىڭ ورىنباسارى, گەنەرال-مايور تالعات مۇحتاروۆ. رەسپۋبليكامىزدىڭ مەكتەپتەرى مەن كوللەدجدەرىندە «ەرلىك ساباقتارىن» وتكىزۋ ءۇشىن ەل قارۋلى كۇشتەرىنەن بارلىعى 1 300-دەن اسا اسكەري قىزمەتشى قاتىسقانىن اتاپ وتكەن ءجون. اكتسيا قازاقستاننىڭ بارلىق وڭىرلەرىن قامتىدى. ودان باسقا, العاشقى قوڭىراۋ س. نۇرماعامبەتوۆ اتىنداعى «جاس ۇلان» رەسپۋبليكالىق اسكەري مەكتەبىنىڭ تاربيەلەنۋشىلەرى ءۇشىن دە سوعىلدى. وسى وقۋ جىلىندا مەكتەپ 82 وقۋشىنى قابىلدادى. مۇنداعى جاڭالىق سول, بۇدان بۇرىن جاسوسپىرىمدەر 7-سىنىپتان باستاپ قابىلدانسا, ەندى جاڭا ەرەجەگە سايكەس «جاس ۇلانعا» جالپى ءبىلىم بەرۋ مەكتەبىنىڭ 9-سىنىبىن بىتىرگەن جانە نەگىزگى ورتا ءبىلىم تۋرالى كۋالىك العان بوزبالالار تۇسە الادى. «ەگەمەن-اقپارات».