جاسىراتىن ەشتەڭەسى جوق, وسىعان دەيىن بايقوڭىر قالاسىنداعى 6 مەكتەپتە رەسەيلىك ستاندارتتار بويىنشا ءبىلىم بەرىپ كەلگەن. ءبىر كەزدەرى قابىلدانعان شەشىمنىڭ كەسىرىنەن قازاقتىڭ قاراكوز بالالارى انا تىلىندە ءبىلىم الا المادى. تاريحىن تانىماي, قازاقستاندىق بىلىممەن سۋسىنداۋعا مۇمكىندىكتەرى بولمادى. باسقا ەلدىڭ تاريحىن وقىپ كەلگەن پەرزەنتتەردىڭ بيىلدان باستاپ قازاقستاندىق ستاندارتتارعا كوشەتىنىن بۇعان دەيىن حابارلاعان ەدىك. جاڭا وقۋ جىلى باستالار تۇستا ءسوزدىڭ ناقتى ىسكە ۇلاسقانىن كوردىك.
ءبىلىم كۇنى №277 مەكتەپتىڭ تابالدىرىعىن 642 بايقوڭىرلىق ءبۇلدىرشىن العاش رەت اتتادى. ك.توقمۇحامەدوۆ اتىنداعى مەكتەپتە وتكەن «العاشقى قوڭىراۋ» سالتاناتتى شاراسىنا وبلىس اكىمى قىرىمبەك كوشەرباەۆ قاتىستى.
– بيىلعى وقۋ جىلى بارشامىزعا ۇلكەن قۋانىشپەن باستالىپ وتىر. ويتكەنى, رەسەيدىڭ وقۋ ستاندارتىنا ءوتىپ كەتكەن قازاق مەكتەپتەرىن وزىمىزگە قايتارىپ الدىق. بۇگىننەن باستاپ وسىنداعى 6 قازاق مەكتەبى وتاندىق ءبىلىم بەرۋ جۇيەسىمەن جۇمىس ىستەيدى. بۇل تاۋەلسىز ەلىمىز ءۇشىن جانە وسىنداعى قاراكوز بالالارىمىزدىڭ بولاشاعى ءۇشىن ماڭىزدى,– دەدى ايماق باسشىسى.
اتا-انالاردىڭ قۋانىشىندا شەك جوق. تۇيتكىلدى ماسەلەنى شەشىپ بەرگەن ەلباسىنا العىستارىن ايتتى. ال, ايماق باسشىسى ءبىرىنشى سىنىپ وقۋشىلارىنا ەلباسىنىڭ «مەنىڭ وتانىم – قازاقستان» كىتابىن تابىس ەتتى.
2015 جىلعا اتالعان ءبىلىم بەرۋ نىساندارىنىڭ شىعىندارىنا رەسپۋبليكالىق بيۋدجەتتەن 982,1 ميلليون تەڭگە قارجى ءبولىندى. وسى قىركۇيەك ايىنىڭ وزىندە اتالمىش ءبىلىم مەكەمەلەرىنىڭ ماتەريالدىق-تەحنيكالىق كەرەك-جاراعىن تولىق قامتۋعا قوسىمشا 200 ميلليون تەڭگە ءبولىندى. سونداي-اق, مۇنداعى مەكتەپتەرگە قاجەتتى 90442 دانا وقۋلىق تولىعىمەن جەتكىزىلگەن.
ەرجان بايتىلەس,
«ەگەمەن قازاقستان».
بايقوڭىر.