استانا. 13 ناۋرىز. يتاليانىڭ جوعارعى سوتى ەلدىڭ بۇرىنعى پرەمەر-ءمينيسترى سەلۆيو بەرلۋسكونيدىڭ اتى-شۋلى «رۋبي ءىسى» بويىنشا اقتالعانىن راستادى. بۇل تۋرالى ريا نوۆوستي حابارلادى.
اتالعان ءىس بويىنشا ۇكىمدى ميلاننىڭ اپەللياتسيالىق سوتى وتكەن جىلدىڭ شىلدەسىندە شىعارعان بولاتىن. ەندى مىنە, ەلدىڭ جوعارعى سوتى دا سول ۇكىمدى راستاپ وتىر. دەگەنمەن, يتاليا سوتتارى مۇنداي شەشىم شىعارۋ ءۇشىن ۇزاق كەڭەستى. ءتىپتى 10 ناۋرىزداعى سوڭعى وتىرىستارى 10 ساعاتقا سوزىلىپ, شەشىم جەرگىلىكتى ۋاقىت بويىنشا تۇنگى 23:40-تا بەلگىلى بولدى.
يتاليادا جوعارعى سوتتىڭ شەشىمى ەڭ سوڭعى ءسوز بولىپ سانالادى. سوندىقتان قايتا شاعىمدانۋ بويىنشا ىستەر قارالمايدى. وسىلايشا, يتاليا سوتى الەمنىڭ نازارىن اۋدارعان داۋلى ىسكە نۇكتە قويدى. ەلدىڭ باس پروكۋرورى اقتاۋ ۇكىمىنىڭ كۇشىن جويىپ, ءىستى قايتا قاراۋدى سۇراعانىمەن, ەش ناتيجە شىقپادى.
ەستەرىڭىزگە سالا كەتەيىك, «رۋبي ءىسى» 2011 جىلدىڭ ساۋىرىندە باستالدى. ءىستىڭ «رۋبي» دەپ اتالۋى ماروككولىق كاريما ەل-مارۋگ ەسىمدى قىزدىڭ لاقاپ اتىمەن بايلانىستى. بەرلۋسكونيگە تاعىلعان ايىپ قىزدىڭ 18 جاسقا تولماعانىنا قاراماي, ونىڭ قىزمەتىنە جۇگىنگەن. ياعني, كامەلەتتىك جاسقا تولماعانداردىڭ جەزوكشەلىكپەن اينالىسۋىنا قاتىسى بار جانە ءوز قىزمەت بابىن اسىرا پايدالاندى دەگەن ايىپ بويىنشا ءىسى سوتقا جىبەرىلگەن ەدى. وسىعان بايلانىستى, 2013 جىلدىڭ ماۋسىمىندا ميلان سوتى بۇرىنعى پرەمەر-ءمينيستردى 7 جىلعا باس بوستاندىعىنان ايىرۋ تۋرالى ۇكىم شىعاردى. الايدا, 2014 جىلدىڭ شىلدە ايىندا ميلاننىڭ اپەللياتسيالىق سوتى ايعاقتاردىڭ جەتىسپەۋىنە بايلانىستى بەرلۋسكونيدى اقتاپ شىقتى.
ەلامان قوڭىر.
دەرەك: ريا نوۆوستي.
سۋرەت: qelsi.it.