استانا. 12 ناۋرىز. بۇگىن استانادا سپورتتىق جەكپە-جەك جانە كۇش قولدانىلاتىن سپورت تۇرلەرى كونفەدەراتسياسىنىڭ جيىنى ءوتتى. وعان ۇيىمنىڭ توراعاسى تيمۋر ق ۇلىباەۆ قاتىسىپ, كەلەسى جىلعى ريو-دە-جانەيرو وليمپياداسىنا سپورتشىلاردىڭ دايىندىعى جايىندا ايتتى. بۇل تۋرالى egemen.kz حابارلادى.
«سپورتشىلارىمىزدىڭ ناتيجەلەرى وقۋ-جاتتىعۋ جيىندارىنىڭ قالاي جۇرگىزىلگەنىنە بايلانىستى. بىزدە ەلىمىزدىڭ مادەنيەت جانە سپورت مينيسترلىگىمەن تىعىز قارىم-قاتىناس ورناتىلعان. وليمپيادا ويىندارىنا دايىندىق ماقساتىندا بوكسشىلارىمىز برازيليادا وقۋ-جاتتىعۋ جيىندارىن وتكىزەدى. بۇل سول جاقتىڭ كليماتىنا بوي ۇيرەتۋ ءۇشىن اسا ماڭىزدى دۇنيە. ەلىمىزدەگى باسقا فەدەراتسيالاردى دا وسىعان شاقىرامىن. ءبىز ريو-دە-جانەيروعا جولداما الۋى مۇمكىن سپورتشىلارىمىزدىڭ بارلىعىن سول جاققا جاتتىعۋ جيىندارىنا جىبەرۋىمىز كەرەك», – دەدى ق ۇلىباەۆ مىرزا.
سونىمەن قاتار, كونفەدەراتسيا توراعاسى ايماقتارداعى سپورتتىڭ دامۋىنا دا كوڭىل ءبولۋىمىز كەرەكتىگىن تىلگە تيەك ەتتى. سەبەبى, ۇلتتىق قۇرامادا ايتارلىقتاي ماسەلە بولماسا دا وبلىستارداعى سپورتتىڭ دەڭگەيى ءالى دە دامىتۋدى قاجەت ەتەدى. وسى ماقساتتا تيمۋر اسقار ۇلى ءتيىستى ادامداردى ايماقتارداعى سپورتشىلاردىڭ قارجى ماسەلەسىندە تاپشىلىق كورمەۋىن ءجىتى قاداعالاۋعا شاقىردى. قارجىنى ماقساتتى جۇمساپ, ونىڭ ەسەپ-قيسابىنا مۇقيات بولۋ كەرەكتىگىن ايتقان توراعا: «ءبىزدىڭ ءبىر عانا ماقساتىمىز بار. ول – 2016 جىلى وليمپيادا ويىندارىندا جوعارى ناتيجەگە قول جەتكىزۋ. سول ءۇشىن ارقايسىسىمىز ادال جۇمىس ىستەۋىمىز كەرە», – دەدى.
جيىن بارىسىندا تيمۋر ق ۇلىباەۆ كونفەدەراتسيانىڭ جاڭا باس ديرەكتورى بولىپ تاعايىندالعان دانيار ابىلعازيندى تانىستىردى. وسىعان دەيىن بۇل قىزمەتتى ساكەن مۇسايبەكوۆ اتقارىپ كەلگەن ەدى. ول جۋىردا ۇكىمەتتىڭ قاۋلىسىمەن مادەنيەت جانە سپورت مينيسترلىگىنىڭ ۆيتسە-ءمينيسترى لاۋازىمىنا تاعايىندالعان بولاتىن.
باسقوسۋدا كوتەرىلگەن تاعى ءبىر ماسەلە سپورت مەديتسيناسىنا قاتىستى بولدى. بۇدان بىلاي ۇلتتىق قۇراماعا مۇشە سپورتشىلاردىڭ بارلىعى زاماناۋي ءدارى-دارمەكپەن قامتاماسىز ەتىلەدى. اتالعان مەديتسينالىق پرەپاراتتار ارنايى كەلىسىم بويىنشا جەڭىل باعامەن ساتىپ الىنادى. جيىندا تىيىم سالىنعان ءدارى-دارمەكتى پايدالانۋ ماسەلەسى دە قاتاڭ تەكسەرىلەتىنى ايتىلدى. سونداي-اق, سپورتتىق تولقۇجاتتاردى جاساۋ جۇمىستارى دا جالعاسىپ جاتقانى بەلگىلى بولدى. ودان بولەك, حالىقارالىق وليمپيادالىق كوميتەت قازاقستاندىق 15 سپورتشىعا ارنايى ستيپەنديا تاعايىنداعان. سوعان وراي, اتالعان سپورتشىلارعا 2016 جىلدىڭ شىلدەسىنە دەيىن اي سايىن 305 اقش دوللارى كولەمىندە اقشا تولەنەدى. ستيپەندياعا ىلىككەن ساڭلاقتارىمىزدىڭ سپورت تۇرلەرى بويىنشا فەدەراتسيالارى كونفەدەراتسيانىڭ قۇرامىنا كىرەتىنىن ايتا كەتەيىك.
ريو-دە-جانەيروداعى وليمپيادا ويىندارى 2016 جىلدىڭ 5-21 تامىزى ارالىعىندا وتەدى. ال ەلىمىز سپورتشىلارىنىڭ برازيلياداعى وقۋ-جاتتىعۋ جيىندارى وسى جىلدىڭ تامىزىنا جوسپارلانعان.
ەلامان قوڭىر.
دەرەك: egemen.kz.
سۋرەت: confederation.kz.