ورال. 12 اقپان. سوڭعى كەزدە باتىس قازاقستان وبلىسى اۋماعىنداعى شەكارا بەكەتتەرىنىڭ قىزمەتىنە شاعىم ايتۋشىلار كوبەيىپ كەتتى. بۇل تۋرالى egemen.kz ءتىلشىسى حابارلادى.
ايتالىق رەسەي تاراپىنان كەزەك مۇلدەم از. ءتىپتى جوق دەسە دە بولعانداي. ءارى ساپارعا شىعۋشىلاردىڭ شەكارا بەكەتىنەن ءوتۋ ۋاقىتى ون بەس مينۋتتان اسپايدى. ال قازاقستان جاعىنان ادامداردىڭ ءارى-بەرى ءوتۋى ءۇشىن جەتى-سەگىز ساعاتقا دەيىن سارىلىپ كۇتۋىنە تۋرا كەلەدى. مۇنداي كورىنىس اسىرەسە رەسەيدىڭ سامارا قالاسى باعىتىنداعى «سىرىم» شەكارا بەكەتىندە ءجيى ورىن الۋدا. الدىڭعى جىلمەن سالىستىرعاندا رەسەي باعىتىنا ساپارلاۋشىلار سانى قىرىق پايىزعا ۇلعايعان كەزدە بۇل ماسەلەنى شۇعىل تۇردە رەتتەۋ قاجەت.
وسى ارادا ايتا كەتەرلىك ماسەلە, ءوڭىر اۋماعىندا №2029 اسكەري ءبولىم قىزمەت جاسايدى. ونىڭ قۇرامىنا جەتى شەكارا بەكەتى كىرەدى. شەكارا – ەلدىڭ ايناسى. سولاي بولعاندىقتان دا مۇنداعى جەكە قۇرامنىڭ قازىرگى سىلبىر قىزمەتىن شۇعىل شيراتىپ, قاجەتتى ۇيىمداستىرۋ جۇمىستارىن جۇرگىزسە, كولىك يەلەرىنىڭ ساعاتتار بويى كەزەكتە تۇرۋ كورىنىستەرى ازايار ما ەدى؟
راس, جوعارىدا اتالعان اسكەري ءبولىم كومانديرى باۋىرجان رىسبەكوۆتىڭ مالىمدەۋىنشە, رەسەي تاراپىنان قوزعالىس التى جولاقتى. سوندىقتان ولاردىڭ وتكىزۋ قابىلەتى دە جوعارى. قازاقستاندىق بولىكتە دە شەكارادان وتكىزۋ ينفراقۇرىلىمى رەسەيدەن ارتىق بولماسا كەم ەمەس بەكەتتەر بار. الايدا ءبارىبىر مۇندا دا كەزەك از ەمەس. بۇل ورايدا مۇنى مۇمكىندىك بولا تۇرا قولدان جاسالعان قىرسىزدىق دەمەسكە لاج جوق.
ەڭ باستىسى بۇگىندە شەكارا قىزمەتىن وڭتايلى تۇردە جولعا قويۋ ءىسى كەزەك كۇتتىرمەيدى. بۇگىنگى كەزدە – ۋاقىت اسا قىمبات قوعامدىق قۇندىلىق قاتارىنا كىرەدى.جەكە ادامدار عانا ەمەس, شەكارالىق وڭىرلەر اراسىندا تاۋارلار مەن جۇك تاسىمالداۋشىلار دا ۋاقىتتان ۇتىلماۋى اسا ماڭىزدى. بۇل ارادا ارتىق تالاپ قويىلىپ وتىرعان جوق. ءبارى دە ءتيىستى زاڭدىلىقتار اياسىندا جۇيەلى تۇردە جولعا قويىلعانى ءجون دەمەكپىز.
تەمىر قۇسايىن.
دەرەك: egemen.kz.
سۋرەت: panoramio.com.