قۋانىش تەربەپ كوڭىلدى,
جۇزدەردەن الاۋ توگىلدى.
تىڭداشى سىرى مول ءۇندى,
العاشقى قوڭىراۋ سوعىلدى.
قۇشاققا گۇلدەر كومىلدى,
شۋاققا مەكتەپ شومىلدى.
قۇتتىقتاپ ۇستاپ قولىڭدى,
العاشقى قوڭىراۋ سوعىلدى.
جايلى ءبىر داۋىس قونىمدى,
ۇيالاپ الدى كوگىمدى.
كورسەتەر وڭ مەن سولىڭدى,
العاشقى قوڭىراۋ سوعىلدى.
نۇرلى تاڭ قايتا جالعاستى,
ارمانعا ارمان ارنا اشتى.
سىڭعىرلاي بەرشى ءبىر تىنباي,
قوڭىراۋىم مەنىڭ العاشقى!
ۇستازعا حات
بويعا جيعان تاربيە مەن ءتالىمدى,
اينالايىن, ارىپتەستەر, دارىندى!
وتقا ءتۇستىڭ باقىتى ءۇشىن بالانىڭ,
جالاۋ قىلىپ ارمانىڭ مەن ارىڭدى.
قۋات الىپ بىلىمىڭنەن, باتاڭنان,
قانشاما جاس وزىپ شىقتى قاتاردان.
وزدەرىڭ عوي ەڭ اياۋلى ادامدار,
ەل ىشىندە وزدەرىڭ عوي قاھارمان!
ءبىرى – كۇننىڭ ساۋلەسىندەي, ءبىرى – ايدىڭ,
سەندەرسىڭدەر – شىرايلى دا شۇرايلى.
جارىق دۇنيەدە ەش جاماندىق كورمە دەپ,
جاراتقاننان جالىنىپ مەن سۇرايمىن.
اتاجۇرتتى مەكەندەگەن تەكتى ەلدىڭ,
پەرزەنتىنە ءبىلىم-بىلىك جەتكەردىڭ.
انىق باسىپ جالىقپاۋعا ۇمتىلىپ,
ۋاقىتىڭدى ۇرپاققا ارناپ وتكەردىڭ.
بولاشاقتى تاربيەلەۋ حاقىندا,
ساۋلەلى ويدى جيدىڭ ىلعي اقىلعا.
شاكىرتتەردىڭ كۇلكىسىنە بولەنىپ,
شارشاماڭدار, ماقۇل ما؟
جۇرەكتەردەن اراي شاشىپ ماڭايعا,
تالاپتىعا قانات بولدىڭ قالايدا.
بولاشاقتىڭ باقىتى ءۇشىن, دوستارىم,
امان-ەسەن بولىڭدارشى, جاراي ما؟!
سەندەرسىڭدەر جۇرەگىمە ەڭ ىستىق,
ەڭبەگىڭنەن راحات كۇت, جەڭىس كۇت!
باسەكەدە باس بايگەنى الايىق,
كەلىستىك پە؟ كەلىستىك!
نۇرعالي يبرايىم,
ا.يمانوۆ اتىنداعى جالپى
ورتا مەكتەپ ديرەكتورى.
وڭتۇستىك قازاقستان وبلىسى,
شاردارا قالاسى.