شورابەك ايداروۆ ايتىس ساحناسىنا العاش رەت 1989 جىلى شىعىپتى. العاشقى قارسىلاسى قىزىلوردالىق اقىن. ول دا شورابەك سياقتى اۋىلدان كەلگەن, كادىمگى قاراپايىم, قاپ-قارا جىگىت ەكەن. شوكەڭ ەلدىڭ كۇلكىسىن كەلتىرىپ, قۇرىق ۇستاعانداي قولىنداعى دومبىراسىن ساحناعا موينىنان سۇيرەپ شىققان كورىنەدى. بۇرىن-سوڭدى ايتىس الەمىندە ەسىمدەرى مۇلدەم ەستىلمەگەن ەكى جىگىتتىڭ پوشىمىنا كورەرمەننىڭ كوڭىلى تولماي, «وسى ەكەۋى نە جارىتادى؟» دەگەندەي, مەنسىنبەگەن جۇزبەن قاراعاندارى انىق. سودان ساحناعا شورابەك قارسىلاسىنا قاراپ: – قاراعىم, سەن دە اق ماڭداي, مەن دە اق ماڭداي, قوسىلسا ەكى ماڭداي شام جاققانداي. ەكەۋمىز اي مەن كۇندەي بوپ وتىرمىز, ۆاگونعا كومىر ارتقان سولداتتارداي, – دەپ, جينالعان قاۋىمدى دۋ كۇلدىرىپ, وتكىر دە ۇتىمدى ءازىل سوزدەرىمەن ەلدى بىردەن باۋراپ الىپ كەتىپتى. «ادەتتە ايتىستا كورەرمەن اقىن ءبىر شۋماقتى قايىرعاندا كۇلەدى ەمەس پە؟ ءبىر ايتىستا ەلدىڭ شوكەڭنىڭ شۋماعىنىڭ ءاربىر قاتارىنا ريزا بولىپ, ىشەك-سىلەسى قاتىپ كۇلگەنىنە كۋا بولعانىم بار. اقىننىڭ «ەەە-ەي, اعايى-ە-ەن...» دەگەن داۋىلپاز ءۇنىن ەستىگەندە-اق ەل ەلەڭدەپ, ەزۋىنە كۇلكى ۇيىرىلە بەرەدى. وسىنداي وزىندىك ستيلىمەن, ەشكىمگە ۇقسامايتىن ەرەكشەلىگىمەن, تاۋىپ ايتاتىن قاسيەتىمەن ەلدى باۋراپ الدى», دەيدى بۇل جونىندە مەملەكەتتىك سىيلىقتىڭ لاۋرەاتى, قوعام قايراتكەرى بەكبولات تىلەۋحان. مىنە, سودان بەرى شيرەك عاسىردان استام ۋاقىت ءوتتى. وسى جىلدار ىشىندە جامبىل جەرىنەن تۇلەپ ۇشقان اقىن شىنىندا, ەلدىڭ اسىعا كۇتەتىن, ءاربىر ءسوزىن ىنتىعا تىڭدايتىن ارداقتى اقىنىنا اينالدى. سوندىقتان شورابەك ايداروۆتى شوقتىعى بيىك, ايتىستىڭ اقتاڭگەرى دەپ ايتۋعا ابدەن لايىق. سوڭعى جىلدارى ايتىستا كورىنبەي كەتكەن اقىنعا ء«سىز نەگە ايتىستى تاستاپ كەتتىڭىز؟» دەگەن سۇراق قويىلعان-دى. سوندا اقىن «ايتىستى مەن ەمەس, ايتىس مەنى تاستاپ كەتتى», دەپ جىر دوداسىندا كەيىنگى جاس تولقىنعا جول بەرگەنىن ايتىپ, اعىنان جارىلعان-دى. ايتسە دە, ارقالى اقىن ايتىستى ءبىرجولاتا دوعارماعان ەكەن. بۇعان شوكەڭنىڭ سوڭعى كەزدەرى بىرنەشە رەت ايتىس ساحناسىنا كوتەرىلىپ, ءوز قاتارى, زامانداس ايتىسكەرلەرمەن ءسوز قاعىستىرعانى دالەل بولسا كەرەك. وتكەن اپتادا جامبىل وبلىسىنداعى تالاس اۋدانىنىڭ ورتالىعى قاراتاۋ قالاسىندا شورابەك ايداروۆتىڭ 60 جاسقا تولۋىنا وراي رەسپۋبليكالىق ايتىس ءوتتى. «شوق ءتىلدى شايىر – شورابەك» اتتى بۇل جىر دوداسىنا ەلىمىزدىڭ تۇكپىر-تۇكپىرىنەن 20 ايتىسكەر قاتىستى. تالاس جەرىن جىرعا بولەپ, ەلدىڭ ەزۋىنە كۇلكى ۇيالاتىپ, ەلدى ءبىر سەرپىلتكەن بۇل دودانىڭ باس جۇلدەسىنە اينۇر تۇرسىنباەۆا لايىق دەپ تانىلدى. باس جۇلدەگەرگە 1 ميلليون تەڭگە تابىس ەتىلدى. ءبىرىنشى ورىنعا استانالىق سەرىكزات دۇيسەنعازين, ەكىنشى ورىنعا الماتى وبلىسىنان كەلگەن ايتاقىن بۇلعاقوۆ, ال ءۇشىنشى ورىندارعا جامبىلدىق التىنكۇل قاسىمبەكوۆا مەن شىمكەنتتىك اقمارال لەۋباەۆا يە بولدى. جامبىل وبلىسى اكىمىنىڭ ورىنباسارى ەرقانات مانجۋوۆ پەن تالاس اۋدانىنىڭ اكىمى بولات رىسمەنديەۆ توي يەسىن ارنايى قۇتتىقتاپ, ات مىنگىزدى. جانە اقىنعا «تالاس اۋدانىنىڭ قۇرمەتتى ازاماتى» اتاعىن بەردى. ال تارازدىق كاسىپكەر قايرات قاجى مومىنوۆ توي يەسىنە تەمىر تۇلپاردىڭ كىلتىن تابىس ەتتى. بۇل كۇنى شوق ءتىلدى شورابەكتىڭ قۇشاعى شوق گۇلگە تولىپ, ەڭ باستىسى كوپتەن ايتىستى ساعىنىپ قالعان اعايىن ءبىر جادىراپ قالدى. ورالحان ءداۋىت, «ەگەمەن قازاقستان». جامبىل وبلىسى. سۋرەتتەردى تۇسىرگەن اقادىل رىسماحان.