الماتىدا «اتاكەنت» ىسكەرلىك ىنتىماقتاستىق ورتالىعىندا وسىمەن 22-ءشى رەت ءداستۇرلى «KIHE-2015 «دەنساۋلىق ساقتاۋ» حالىقارالىق كورمەسى ۇلكەن تابىسپەن ءوتتى. وعان بيىل الەمنىڭ 28 ەلىنەن 300-گە جۋىق كومپانيا ءوز ونىمدەرىن ۇسىندى. كورمەگە ازەربايجان, گرۋزيا, مىسىر جانە يزرايل ەلدەرىنىڭ مەديتسينا سالاسىندا قىزمەت اتقاراتىن كومپانيالارى ءبىرىنشى رەت قاتىسىپ وتىر.
كورمەنىڭ اشىلۋ سالتاناتىندا قازاقستاندا مەديتسينا سالاسىنداعى ەڭ ءىرى تاجىريبە الماسۋ الاڭدارىنىڭ ءبىرى ەكەنىن اتاپ وتكەن ەلىمىزدىڭ دەنساۋلىق ساقتاۋ جانە الەۋمەتتىك دامۋ ۆيتسە-ءمينيسترى الەكسەي تسوي وعان مەديتسيناعا ارنالعان ونىمدەر شىعاراتىن وتاندىق جانە شەتەلدىك وندىرۋشىلەر قاتىساتىنىن جەتكىزدى. سونىمەن قاتار, جىل سايىن وتكىزىلەتىن بۇل كورمە دەنساۋلىق ساقتاۋ سالاسىنداعى جاڭا تەحنولوگيالارمەن تانىسۋعا, ەمدەۋدىڭ جاڭا ادىستەرىن ۇيرەنۋگە جانە دەنساۋلىق ساقتاۋ سالاسىنىڭ دامۋ كەلەشەگىن انىقتاۋعا مۇمكىندىك بەرەتىنىن تىلگە تيەك ەتە كەلە, قازاقستان مەديتسيناسى بىرقاتار سالالار بويىنشا الەمدىك دەڭگەيگە كوتەرىلگەنىن, سونىڭ ارقاسىندا ەلىمىزدە ىشكى, سىرتقى مەديتسينالىق ءتۋريزمنىڭ جاقسى دامىپ كەلە جاتقانىن, استانا, الماتى سەكىلدى ەلىمىزدىڭ ءىرى مەديتسينالىق ورتالىقتارىنا وبلىستاردان كەلىپ ەم الىپ جاتقاندار, سونداي-اق, قازاقستاندا سىرتقى مەديتسينالىق ءتۋريزمنىڭ دە دامي باستاعانىن العا تارتتى. ويتكەنى, بۇل قالالارداعى زاماناۋي كلينيكالاردا جوعارى بىلىكتى ماماندار ەڭبەك ەتەدى.
«كورشى مەملەكەتتەردەن ەلىمىزگە كەلىپ, ەم-دوم الىپ جاتقاندار جەتەرلىك. ويتكەنى, قازاقستاندا ەمدەلۋ ەۋروپا ەلدەرىنەن ەكى ەسە, ال تۇركياعا قاراعاندا ءۇش ەسە ارزان. ونىڭ ۇستىنە قازاقستان مەديتسينانىڭ بىرقاتار سالالارى – كارديوحيرۋرگيا, نەيروحيرۋرگيا جانە ەكستراكورپورالدى ۇرىقتاندىرۋ باعىتتارى بويىنشا الەمدىك دەڭگەيگە كوتەرىلىپ, ءوز ايماعىندا باعىت-باعدار سىلتەيتىن دارەجەگە جەتىپ قالدى», – دەدى ا.تسوي. بيىلعى كورمەنىڭ ەرەكشەلىگى – العاش رەت ۆەنگريا, ۇزاق ۇزىلىستەن كەيىن – ءۇندىستان جانە جىل سايىنعى قاتىسۋشىلار گەرمانيا, قىتاي جانە رەسەي ءوز ستەندتەرىن ۇسىندى. وتاندىق دەنساۋلىق ساقتاۋ سالاسىنىڭ ەكسپوزيتسياسى قازاقستان رەسپۋبليكاسى پرەزيدەنتىنىڭ ءىس باسقارماسىنىڭ الماتى قالاسىنداعى ورتالىق كلينيكالىق اۋرۋحاناسى, الماتى قالاسى رەپرودۋكتسيالىق مەديتسينا ينستيتۋتى, سونداي-اق, قۇرامىنا كىرەتىن بارلىق عىلىمي ورتالىقتاردىڭ مەديتسينالىق قىزمەتتەرى كورسەتىلەتىن «ۇلتتىق مەديتسينالىق گوسپيتال» اق-تى جانە تاعى باسقالاردى قامتىدى. كورمە شەڭبەرىندە «ەمدەۋ-ساۋىقتىرۋ جانە مەديتسينالىق تۋريزم» تاقىرىبى ەكىنشى جىل قاتارىنان بولەك ەكسپوزيتسيا بولىپ ۇسىنىلدى. كورمەنىڭ تاعى ءبىر قىزىقتى ءبولىمى – «ەستەتيكالىق مەديتسينا» سەكتسياسى. ول سۇلۋلىق يندۋسترياسى, ەستەتيكالىق مەديتسينا جانە پلاستيكالىق حيرۋرگيا سالاسىنىڭ جەتەكشى وندىرۋشىلەرى مەن وكىلدەرىن ۇسىندى. جوباعا دەنساۋلىق ساقتاۋ جانە الەۋمەتتىك دامۋ مينيسترلىگى, الماتى قالاسى اكىمدىگى, الماتى قالاسى دەنساۋلىق ساقتاۋ باسقارماسى, دەنساۋلىق ساقتاۋ جانە الەۋمەتتىك دامۋ مينيسترلىگىنىڭ مەديتسينالىق جانە فارماتسەۆتيكالىق قىزمەتتى باقىلاۋ كوميتەتى, «ۇلتتىق مەديتسينالىق حولدينگ» اق, قازاقستانداعى حالىقارالىق فارماتسەۆتيكالىق وندىرۋشىلەر قاۋىمداستىعى جانە قازاقستان رەسپۋبليكاسى ۇلتتىق مەديتسينا قاۋىمداستىعى رەسمي تۇردە قولداۋ كورسەتتى.
گۇلزەينەپ سادىرقىزى, «ەگەمەن قازاقستان».