وبلىس ورتالىعىنداعى قازاقستان حالقى اسسامبلەياسىنىڭ عيماراتىندا «ءبىلىم. جۇمىس. مانساپ» ءVىىى ارناۋلى كورمەسى وتكىزىلدى. ارناۋلى كورمەنى ۇيىمداستىرۋعا وبلىستىق ءبىلىم باسقارماسى, قالالىق جۇمىسپەن قامتۋ جانە الەۋمەتتىك باعدارلامالار ءبولىمى, وبلىستىق كاسىپكەرلەر پالاتاسى جانە «اقتوبە وبلىسىنىڭ كاسىپكەرلەر جانە جۇمىس بەرۋشىلەر وداعى» قوعامدىق بىرلەستىگى ۇيىتقى بولدى. شارانىڭ سالتاناتتى اشىلۋىندا ءسوز العان وبلىس اكىمىنىڭ ورىنباسارى سارا نۇرقاتوۆا مۇنداي كاسىبي باعدار بەرۋ ءۇردىسىنىڭ مەكتەپ تۇلەكتەرىنىڭ ماماندىقتارىن دۇرىس تاڭداۋىنا تيىمدىلىگى جوعارى ەكەنىنە توقتالدى. كورمەنىڭ ءداستۇرلى تۇردە وتكىزىلىپ كەلە جاتقانى دا سوندىقتان. بۇل كورمەنىڭ تيىمدىلىگى سول مەكتەپ تۇلەكتەرى قاي سالانىڭ مامانى بولۋعا, قاي جوعارى وقۋ ورنىندا نەمەسە كوللەدجدەر مەن ليتسەيلەردە وقۋعا تاڭداۋ جاساي الادى. ءومىر جولىنىڭ باستاۋىندا ماماندىقتى دۇرىس تاڭداۋ بۇل بولاشاقتىڭ تەمىرقازىعىنداي بولىپ, ادامعا قانات بىتىرەدى, دەدى سارا قايىرجانقىزى.
كورمەنىڭ ماقساتى سۇرانىس بار ماماندىقتاردىڭ تۇساۋكەسەرىن جاساۋ ارقىلى جاستارعا ماماندىقتى دۇرىس تاڭداۋعا كومەكتەسۋ, ءبىلىم مەكەمەلەرىنىڭ, جاڭا باعدارلامالاردىڭ, تەحنولوگيالار مەن وقۋ قۇرالدارىنىڭ مۇمكىندىكتەرىن ۇسىنۋ, جۇمىس بەرۋشىلەر مەن ءبىلىم مەكەمەلەرىنىڭ تۇلەكتەردى جۇمىسقا ورنالاستىرۋ ماسەلەسىن شەشۋ ىنتىماقتاستىعىنا ىقپال ەتۋ جانە كادرلار دايارلاۋ دەڭگەيىن ارتتىرۋ بولىپ تابىلادى. وعان 40-تان استام جوعارى وقۋ ورنى, كاسىپتىك كوللەدجدەر, ءبىلىم ورتالىقتارى, وقۋ كۋرستارى, كاسىپورىندار مەن ۇيىمداردىڭ كادرلىق قىزمەتتەرى قاتىستى. ولاردىڭ اراسىندا ق.جۇبانوۆ اتىنداعى اقتوبە مەملەكەتتىك وڭىرلىك ۋنيۆەرسيتەتى, ىشكى ىستەر مينيسترلىگى توتەنشە جاعدايلار جونىندەگى كوميتەتىنىڭ كوكشەتاۋداعى تەحنيكالىق ينستيتۋتى, استاناداعى قازاق ينجەنەرلىك-تەحنيكالىق اكادەمياسى, ورىنبور مەملەكەتتىك اگرارلىق ۋنيۆەرسيتەتتەرى, قازاق-ورىس حالىقارالىق ۋنيۆەرسيتەتى جانە باسقالار بار.
– بۇل كورمەگە جىلدا قاتىسامىز. كوللەدجدىڭ قانداي ماماندىقتارعا دايارلايتىنىن, ماتەريالدىق-تەحنيكالىق مۇمكىندىكتەرى قانداي ەكەنىن, بىزدە وقىپ جاتقان شاكىرتتەرىمىزدىڭ ماماندىق الۋ دەڭگەيىن كورسەتەمىز. سول ارقىلى ءوزىمىزگە وقۋشىلاردى كوپتەپ تارتۋعا تىرىسامىز. بۇل جولى دا كورمەگە تياناقتى دايىندالدىق. كوللەدج تۋرالى مول اقپاراتتارمەن قامتاماسىز ەتىلەدى. وقۋشىلارىمىزدىڭ قولىنان شىققان شىعارماشىلىق بۇيىمدارىن دا الا كەلىپ, كورسەتۋدەمىز, – دەيدى اقتوبە قۇرىلىس جانە بيزنەس كوللەدجىنىڭ قىزمەتكەرى قامالحان قۋانوۆ.
– مەن بىلتىر 9-سىنىپتان كەيىن قاي ماماندىقتى تاڭداعانىم دۇرىس دەگەن ويدا ءجۇردىم. وسىنداي كورمە ءجۇرىپ جاتىر دەگەن سوڭ بارىپ كورەيىن دەپ تالاپ قىلدىم. بەكەر كەلمەپپىن, وسىنداعى ارناۋلى كورمەگە اقتوبە پوليتەحنيكالىق كوللەدجى دە قاتىسىپ جاتىر ەكەن. كوللەدجدىڭ قانداي ماماندىقتارعا دايارلايتىنىن ءبىلدىم, ماتەريالدىق-تەحنيكالىق بازاسىنىڭ جاقسى ەكەنىنە كوزىم جەتتى. ماعان ەلەكترومەحانيك ماماندىعى ۇنادى. سول جىلى 9-سىنىپتى تامامداعان سوڭ قۇجاتىمدى وسى كوللەدجگە تاپسىردىم. بيىل 1-كۋرستى اياقتايمىن. ەندى وندىرىستىك تاجىريبەدەن ءوتۋ ءۇشىن قاي كاسىپورىنعا بارسام ەكەن دەپ, تاڭداپ ءجۇرمىن. ماعان ءوزىم تاڭداعان ماماندىق ۇنايدى, – دەيدى اقتوبە پوليتەحنيكالىق كوللەدجىنىڭ ستۋدەنتى داستان امانوۆ.
بۇل ارناۋلى كورمەگە تەك وبلىستىڭ عانا ەمەس, ەلىمىزدىڭ باسقا وڭىرلەرىندەگى, سونداي-اق, كورشىلەس رەسەيدىڭ كاسىپتىك ءبىلىم بەرەتىن جوعارى وقۋ ورىندارى مەن كوللەدجدەرى دە قاتىستى. شارا سوڭىندا وبلىس پەن كورشىلەس وڭىرلەردىڭ كاسىپورىندارى مەن كاسىپتىك ءبىلىم بەرۋ مەكەمەلەرى اراسىندا ىنتىماقتاستىق تۋرالى كەلىسىمگە قول قويىلدى.
ارناۋلى كورمە اياسىندا بوس جۇمىس ورىندارى جارمەڭكەسى ۇيىمداستىرىلدى, وعان وبلىستاعى 30-دان استام كاسىپورىن مەن ۇيىم قاتىسىپ, 200-دەن استام بوس جۇمىس ورنىن ۇسىندى.
– جىل وتكەن سايىن كورمەگە قاتىسۋشىلاردىڭ سانى ارتىپ, كوكجيەگى كەڭەيىپ كەلەدى. بۇعان دەيىن ەلىمىزدىڭ كورشىلەس وبلىستارى عانا قاتىسىپ كەلسە, بيىل رەسەيدىڭ ورىنبور جانە استراحان وبلىستارىنان جوعارى وقۋ ورىندارى مەن كوللەدجدەرى كەلىپ قاتىسۋدا. مۇنىڭ ءوزى مۇنداي ارناۋلى كورمەنى ۇيىمداستىرۋدىڭ تيىمدىلىگىن كورسەتەدى, – دەيدى ايماقتىق كاسىپكەرلەر پالاتاسى ديرەكتورىنىڭ ورىنباسارى داميليا قۇنانوۆا.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.