بادەن-ۆيۋرتەمبەرگ فەدەرالدىق جەرىنىڭ شتۋتتگارت قالاسىنداعى جۇمىس ساپارى شەڭبەرىندە قازاقستاننىڭ گفر-داعى ەلشىسى بولات ءنۇسىپوۆ اتالعان جەردىڭ ەو جانە حالىقارالىق قارىم-قاتىناستار ماسەلەلەرى جونىندەگى ءمينيسترى پەتەر فريدريحپەن كەزدەسۋ وتكىزدى. كەلىسسوزدەردىڭ كۇن تارتىبىندە قازاقستان مەن بادەن-ۆيۋرتەمبەرگ اراسىنداعى ەكىجاقتى ساۋدا-ەكونوميكالىق قاتىناستى جەتىلدىرۋ ماسەلەلەرى تالقىلاندى. سونداي-اق, نەمىس مينيسترى جوسپارلانعان ەكونوميكالىق ايماقتىق دەلەگاتسيانى قازاقستانعا ءوزى باستاپ كەتەتىندىگىن حابارلادى. بادەن-ۆيۋرتەمبەرگكە ساپار بارىسىندا قازاقستاندىق ديپلومات كارلسرۋە جانە ۋلم سياقتى ءىرى يندۋستريالىق قالالارىنداعى قازاقستاننىڭ ەكونوميكا كۇندەرىنە قاتىستى جانە ايماقتىڭ باستى كومپانيالارىنىڭ باسشىلىعىمەن كەزدەستى. «قازاقستان جولى – 2050: قازاقستاندىق-گەرماندىق ىنتىماقتاستىقتىڭ جاي-كۇيى جانە دامۋ بولاشاعى» اتتى ەكونوميكالىق فورۋمدار قازاقستاننىڭ گەرمانياداعى ەلشىلىگىنىڭ باستاماسى نەگىزىندە بادەن-ۆيۋرتەمبەرگ فەدەرالدىق جەرىنىڭ ۇكىمەتى مەن كارلسرۋە جانە ۋلم قالالارىنىڭ ساۋدا-ونەركاسىپتىك پالاتالارىنىڭ ۇيىمداستىرۋىمەن ءوتتى. اتالعان فورۋمدار بارىسىندا قازاقستان ەلشىسى نەمىس بيزنەس-قاۋىمداستىعى وكىلدەرىن «نۇرلى جول – بولاشاققا باستار جول» جاڭا ەكونوميكالىق ساياساتىنىڭ نەگىزگى جاعدايىمەن جانە ەكسپو-2017 حالىقارالىق كورمە شەڭبەرىندەگى ينۆەستيتسيالىق احۋالىنىڭ مۇمكىندىكتەرى بويىنشا شەتەلدىك ينۆەستورلاردى قولداۋعا جانە قورعاۋعا ارنالعان شارالارىمەن تانىستىردى. ءوز كەزەگىندە نەمىس تاراپى ايماقارالىق ارەكەتتەستىكتىڭ نىق دامۋىنا جانە ەلىمىزدىڭ ينۆەستيتسيالىق احۋالىنىڭ ارتۋىنا وسىنداي ءىس-شارالار مەن كەلىسسوزدەردىڭ ماڭىزدىلىعى ەرەكشە ەكەنىن اتاپ ءوتتى. گفر-عا وسى ايماقتىڭ ىسكەر توبى قازاقستاندىق نارىققا قاتىسۋعا دەگەن ىنتالارى مەن نيەتتەرىن ءبىلدىردى. «ەگەمەن-اقپارات».
سۋرەت: bnews.kz