الماتى. 21 مامىر. يسلامدىق قارجىلاندىرۋ قىزمەتى جونىندەگى كەڭەستىڭ (IFSB) ءحىى حالىقارالىق ءسامميتى ەكى كۇنگە سوزىلعان ءوز جۇمىسىن اياقتادى. حالىقارالىق قاراجات جيىنىنا باحرەين, ەگيپت, مالايزيا, ءباا, سۋدان, تۇركيا, كاتار مەن ساۋد ارابياسى, سونداي-اق باسقا دا بىرقاتار مۇسىلمان مەملەكەتتەرىنىڭ بانك وكىلدەرى قاتىستى. بۇل تۋرالى forbes.kz حابارلادى.
نەگىزگى اڭگىمە – قارجىلىق بۇل سالانىڭ قازاقستانداعى بۇگىنگى تىنىسى مەن بولاشاق دامۋ كوكجيەگى توڭىرەگىندە بولدى. ءسامميتتىڭ باس قوناعى – IFSB باس حاتشىسى ياسيم احمەد يسلامدىق قارجىلاندىرۋدىڭ جوعارى ەتيكالىق ستاندارتتارى مەن قارجى رىنوگىندە ۇشىرىساتىن قانداي دا ءبىر ەكسترەمالدى قۇبىلىستان الشاق بولۋ قاعيداتتارى تۋرالى ءسوز قوزعادى. باتىستان نەسيە تاراتۋ قىسقارعان قازىرگى كەزەڭدە بۇل تالاپتار بۇرىنعىدان دا كۇشەيتىلەتىنى ەسكەرتىلدى. دۇنيەجۇزىندە بانكينگتى شاريات نەگىزىنە ورايلاستىرىپ قۇرعان زايىرلى مەملەكەتتەر دە بار ەكەن. ماسەلەن, ۇلىبريتانيا, ليۋكسەمبۋرگ پەن سينگاپۋر سكۋك اتالاتىن يسلامدىق وبليگاتسيالاردى كوپتەپ شىعارا باستادى.
قازاقستان ۇلتتىق بانكىنىڭ توراعاسى قايرات كەلىمبەتوۆ: «ءبىزدىڭ ەلدە يسلامدىق قارجىلاندىرۋدىڭ نەگىزى ەلباسىنىڭ تاپسىرىسىمەن 2009 جىلى قالاندى. 2013 جىلى قازاقستان العاشقى سكۋك وبليگاتسيالارىن شىعاردى. ۇستىمىزدەگى جىلدىڭ ساۋىرىندە رەسپۋبليكا پرەزيدەنتى نۇرسۇلتان نازارباەۆ «يسلامدىق قارجىلاندىرۋ تۋرالى» زاڭعا قول قويدى» دەدى.
سامميت بارىسىندا قازاقستاننىڭ بۇل سالاداعى بۇگىنگى ۇلەسى 1 پايىزعا دا جەتپەيتىنى, قازىر – دايىندىق كەزەڭى ەكەنى دە اشىپ ايتىلدى.
تالعات ءسۇيىنباي.
دەرەك, سۋرەت: forbes.kz.