قوستانايداعى ل.تولستوي اتىنداعى وبلىستىق امبەباپ كىتاپحانادا قازاقتىڭ ادۋىن اقىنى نۇرجان ناۋشاباي ۇلىنىڭ «ۇيىقتاما, ويان, الاشىم!» اتتى كىتابىنىڭ تۇساۋكەسەرى ءوتتى.
ونى قۇراستىرعان بەلگىلى اقىن, نۇرجانتانۋشى, ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىنىڭ پروفەسسورى اقىلبەك شاياحمەت جينالعان قاۋىمعا نۇرجاننىڭ شىعارماشىلىعى تۋرالى ايتىپ بەردى. ول الدىمەن كىتاپتىڭ اتىن «ۇيىقتاما, ويان, الاشىم!» قويعان سەبەبىنە توقتالدى.
– نەگىزى ءحىح عاسىردىڭ اياعى مەن حح عاسىردىڭ باسىندا حالقىمىزدىڭ الدىڭعى ويلى ازاماتتارى قازاقتىڭ ءىلىم-بىلىمنەن كەيىن قالىپ بارا جاتقانىنا الاڭدادى. عۇمار قاراش «جاتپا, قازاق!», شاڭگەرەي «تۇر, قازاق!» دەدى. ءمىرجاقىپ «ويان, قازاق!» دەپ جار سالدى, سول ءۇشىن ءجابىر كوردى. ۇلت ۇستازى احمەت بايتۇرسىنوۆ: «ۇيقىسىن از دا بولسا بولمەس پە ەكەن, قويماستان قۇلاعىنا ىزىڭداسا؟» دەپ قامىقتى. ولاردىڭ بارلىعىنىڭ ۇرانى بىرەۋ, ول – قازاقتى قاراڭعىلىقتان الىپ شىعۋ, ءبىلىمدى ەتۋ, وزگە جۇرتتار سەكىلدى العا وزدىرۋ بولدى.
1997 جىلى نۇرجاننىڭ 1910 جىلى قازاندا باسىلعان «الاش» اتتى كىتابى جاديدشەدەن كيريلليتساعا كوشىرىلىپ, قايتا باسىپ شىققان بولاتىن. نۇرجان كىتابىن جاديدشەدەن كوشىرۋگە مارال يشان اتىنداعى مەشىتتىڭ نايب يمامى باقىتجان يكرام ۇلى دا كوپ كومەك ەتتى. سونىمەن قاتار, اقىن كەشىنە قوستانايعا ىسساپارمەن جولى ءتۇسكەن قازاقستان مۇسىلماندارى ءدىني باسقارماسىنىڭ نايب ءمۇفتيى سەرىك قاجى وراز قاتىسىپ, رۋحاني قۇندىلىقتارىمىز تۋرالى ويىن ايتا كەلىپ, ءدىني تاقىرىپقا جازعان نۇرجاننىڭ ولەڭدەرى رۋحاني قازىنامىز ەكەنىن ورتاعا سالدى. نۇرجان ناۋشاباي ۇلى تەك اقىن عانا ەمەس, ونىڭ ارقاداعى انشىلىك-جىرشىلىق مەكتەپتىڭ قالىپتاسۋىنا ۇلەسى بار. ا.زاتاەۆيچ ونىڭ ءۇش ءانىن جازىپ العان بولاتىن. وبلىستىق فيلارمونيانىڭ ءانشىسى ماناپبەك قادىروۆ نۇرجاننىڭ «كوكەن-اي» دەگەن ءانىن قۇيقىلجىتا ورىندادى.
ءنازيرا جارىمبەتوۆا,
«ەگەمەن قازاقستان».
قوستاناي.