پرەزيدەنت جانىنداعى ورتالىق كوممۋنيكاتسيالار قىزمەتىندە قازاقستان رەسپۋبليكاسىنداعى ادام قۇقىقتارى جونىندەگى ۋاكىل (ومبۋدسمەن) اسقار شاكىروۆ بريفينگ وتكىزدى. وندا مەملەكەت باسشىسى نۇرسۇلتان نازارباەۆ ۇسىنعان 5 ينستيتۋتتىق رەفورما نەگىزىندە ادام قۇقىقتارىن قورعاۋدىڭ ۇلتتىق جۇيەسىن جەتىلدىرۋ جانە ازاماتتىق قوعام دامۋىنىڭ تالاپتارى ءسوز بولدى.
جيىن بارىسىندا اسقار شاكىروۆ 5 ينستيتۋتتىق رەفورمانىڭ ماڭىزدىلىعىنا جانە ەلىمىزدەگى ادام قۇقىقتارىن قورعاۋ ماسەلەلەرىنە كەڭىنەن توقتالا كەلىپ:
– رەسپۋبليكامىزدا ادام قۇقىقتارى كوبىنە جەكەلەگەن شەنەۋنىكتەر تاراپىنان بۇزىلادى. مۇنداي كەلەڭسىزدىكتەر بارلىق سالالاردا ورىن الۋدا. سوندىقتان دا, بەس ينستيتۋتتىق رەفورماداعى ماڭىزدى اسپەكتىلەردىڭ ءبىرى رەتىندە مەملەكەتتىك اپپاراتتى جەتىلدىرۋ قاراستىرىلىپ وتىر. بۇل وسى ماسەلەگە قاتىستى مەملەكەت الدىندا تۇرعان اۋقىمدى مىندەتتەردى جۇزەگە اسىرۋعا مۇمكىندىك بەرەدى, – دەدى.
سپيكەردىڭ ايتۋىنشا, قازىرگى تاڭدا ومبۋدسمەن مەكەمەسىنە ازاماتتاردان كەلىپ تۇسەتىن شاعىمداردىڭ 14 پايىزىندا راسىمدەردى بۇزۋ, سالعىرتتىق پەن اۋرە-سارساڭعا سالۋ جانە لاۋازىمدى تۇلعالاردىڭ ارەكەتسىزدىگى تۋرالى فاكتىلەر كورسەتىلەدى ەكەن. سونىمەن قاتار, ازاماتتار كوبىنەسە وزدەرىنىڭ ناقتى زاڭنامالار مەن حالىقارالىق قۇجاتتار اياسىنداعى قۇقىقتارى دا ءجيى بۇزىلاتىندىعىنا بايلانىستى ارىزداناتىنى بەلگىلى بولدى. بۇعان قوسا, كەيبىر جەكە لاۋازىمدى تۇلعالار تۇرعىنداردىڭ ماسەلەلەرى مەن ساۋالدارىنا ءوز دەڭگەيىندە جاۋاپ بەرۋ قاجەتتىگىن ەسكەرمەيتىنى دە كوپ كەزدەسەتىن كورىنەدى.
اسقار شاكىروۆ بالالاردىڭ قۇقىعىن قورعاۋ ىسىنە قاتىستى دا ءوز پىكىرىن ءبىلدىردى.
– بالالاردىڭ قۇقىن قورعاۋ – ەڭ ماڭىزدى جۇمىستاردىڭ ءبىرى. بۇل باعىتتا كوپتەگەن شارالار قولعا الىنۋدا. ماسەلەن, ءبىز حالىقارالىق ساراپشىلاردى تارتا وتىرىپ, بالالار مەن جاسوسپىرىمدەرگە ءجابىر كورسەتۋ ماسەلەسى جونىندە بىرقاتار زەرتتەۋلەر جۇرگىزدىك. سونىڭ ناتيجەسىندە, بىرقاتار جايتتاردىڭ وزەكتى بولىپ كەلە جاتقانىنا كوز جەتكىزدىك, – دەدى ۋاكىل.
جولدىباي بازار,
«ەگەمەن قازاقستان».
سۋرەت: inform.kz