نەمەسە دارۆين سىيلىعى
ادامزات بالاسىنىڭ ەڭ اقىماق وكىلدەرىنە بەرىلەتىن «دارۆين سىيلىعى» دەيتىن بار. ەۆوليۋتسيا اتاسى چارلز ءدارۆيننىڭ قۇرمەتىنە اتالعان بۇل «اتاق» اقىماقتىعىمەن ءوزىن ءوزى جەر جاستاندىرىپ, ادامداردىڭ گەنەفوندىن تازارتقاندار ءۇشىن تاعايىندالادى. بىراق, ءوزىنىڭ تۇبىنە ءوزى جەتكەندەر مۇنداي سىيلىققا يە بولعاندارىن بىلمەي وتەدى.
وكىنىشكە قاراي, ادامزات بالاسى قانشاما وركەنيەتكە قول جەتكىزىپ, دۇنيە كوز ىلەسپەس جىلدامدىقپەن دامىپ جاتسا دا, «دارۆين سىيلىعىن» الۋشىلاردىڭ سانى ازايماي وتىر. كادىمگى ومىردە اقىلعا سىيمايتىن ارەكەتىمەن باقيلىق بولعاندارعا, ياعني ەندى وسى سىيلىقتى يەسىنە الىپ بەرۋگە «سەلفي» دەگەن دە سەپتەسۋدە.
مىسالى, الميساقتان بەرىلىپ كەلە جاتقان «دارۆين سىيلىعىنىڭ» 2014 جىلعى نومينانتتارى قاتارىن سەلفيلەتەمىن دەپ ءجۇرىپ, مەرت بولعاندار تولىقتىردى. كۇندىز-ءتۇنى الەۋمەتتىك جەلىلەرگە ادەمى سۋرەتىن سالىپ قويىپ, «لايك» جيناۋمەن ومىرلەرىن وتكىزىپ وتىرعاندار دا وتكەن جىلى بۇل سىيلىق كىمدەرگە بۇيىرعانىن بىلسە كەرەك. الايدا, «سەلفيمانيا» دەرتىنە شالدىققاندارعا ول دا توقتاۋ سالا الماي تۇر.
وكىنىشتىسى, وتكەن جىلى تۇبىنە سەلفي جەتكەندەر ىشىندە داپ-دارداي ادامدار دا بار. ءوزىنىڭ فوتوالبومىن اسەرلى سۋرەتتەرمەن تولىقتىرا تۇسپەك بولعان 42 جاستاعى لاس-ۆەگاس تۇرعىنى رەلستىڭ ۇستىندە وتىرىپ, جاقىنداپ قالعان پويىزدىڭ فونىندا سەلفي جاسايدى. جاي عانا تەمىرجولدىڭ جانىندا تۇرىپ سۋرەتكە ءتۇسۋ اركىمنىڭ قولىنان كەلەدى دەپ ويلاعان سەلفيشى سۋرەتكە تۇسۋمەن اۋەيىلەنگەنى سونشالىقتى, ءوزىن پويىز مىجىپ وتكەنشە وتىرا بەرگەن. ارينە, ونىڭ توبەسىنە پويىز ءتونىپ كەلە جاتقان سەلفيى عالامتوردى كەزىپ ءجۇر. بىراق, ءماشينيستىڭ سيگنال بەرگەنىنە قاراماي, جۇيتكىپ كەلە جاتقان جۇيرىك پويىز جولىندا ءبىر سەلفي ءۇشىن نەگە ومالىپ وتىرىپ قالعانىن ەشكىم تۇسىندىرە المايدى.
وسىناۋ قايعىلى وقيعامەن اينالىسقان مەديتسينالىق سوت ساراپشىلارى تەرگەۋ امالدارى ءۇشىن ونى ءوزى سەلفيلەتكەن جەرىندە قان-جوسا بولعان قالدىقتارىن قايتا تۇسىرۋگە جانە قالا اكىمشىلىگى پويىزدى توقتاتۋعا ءماجبۇر بولادى. دەگەنمەن, پويىزدا كەلە جاتقان 130 جولاۋشىعا زاقىم كەلمەگەن, ولارعا ساپارلارىن ءارى قاراي اۆتوبۋستارمەن جالعاستىرۋعا تۋرا كەلگەن.
«سەلفي» دەگەن سور قازاقستانعا دا باياعىدا جەتكەن. ايتقانداي, «سەلفي» ءسوزىن (selfie – ءوزىن ءوزى فوتوعا ءتۇسىرۋ) – 2013 جىلى وكسفورد ۋنيۆەرسيتەتىنىڭ سوزدىگىن قۇراستىرۋشىلار «جىل ءسوزى» دەپ مويىنداعان. ولار بۇل قورىتىندىنى بىلاي تۇسىندىرەدى: 2012 جىلى سەلفي ءسوزىن قولدانۋ 17 مىڭ پايىزعا... دەيىن وسكەن.
سونىمەن, ءومىرىن ءوزىن ءوزى سۋرەتكە تۇسىرۋمەن وتكىزىپ جۇرگەن اتاقتى سەلفيشىلەر بىزدە دە جەتىپ-ارتىلادى. ولار تاڭەرتەڭ تۇرعاننان باستاپ, تۇندە تالىقسىپ ۇيىقتاپ كەتكەنگە دەيىن ىشكەنىن, جەگەنىن, كيگەنىن, كورگەنىن گادجەتكە ءتۇسىرىپ, الەۋمەتتىك جەلىگە جۇكتەۋمەن بولادى. جەلىلەردە وتىراتىن جۇرتشىلىق تۋىسقاندارىنىڭ اتىن ۇمىتا باستاسا دا, تۇراقتى سەلفيلەتكەندەردىڭ ءيتى مەن مىسىعىنا دەيىن بىلەدى.
شىن مانىندە وزىنە ءوزى ەسسىز عاشىق بولىپ وتىراتىنداردىڭ بىتپەيتىن سەلفيلەرىنىڭ ار جاعىندا بىلىققان ءومىرى, كۇيىپ كەتكەن تاماعى, شاشىلعان كيىمى, جايراعان تىرلىگى جاتقانى ءسوزسىز. ماسەلەن, سەلفيلەتكەندەردىڭ سۇلۋ ءومىرىنىڭ ار جاعى مۇلدە باسقا. ۋاقىتىن «ينستاگرامدا» ۇرلاتىپ, كۇندىز-ءتۇنى قارا باسىنا ءسۇيسىنىپ وتىراتىنداردىڭ ىشىندە وپىق جەپ جۇرگەندەرى جەتەدى. ماسەلەن, الەۋمەتتىك جەلىدە بىتپەيتىن سۋرەتتەرىمەن بەلگىلى بولعان ءبىر بيكەشىمىزدىڭ سوڭعى 2-3 جىلداعى ءومىرىن الايىقشى. باستاپقىدا ءبىر بالاسى بار ونىڭ بۇرتيعان ەرنى, قايقيعان كىرپىگى بارىنە ۇناپ, كۇندەر وتە كەلە ونىڭ پاراقشاسىنا جازىلعاندار سانى قىرىق مىڭعا جەتكەن بولاتىن. سانقوي قىز ءوزىنىڭ بىتپەيتىن سەلفيلەرىمەن جالىقتىرا باستاعاندا, وعان «سەلكىلدەي بەرمەي, بالاڭا قاراسايشى!», «قىدىرعانعا كۇندە اقشانى قايدان الاسىڭ؟», «نەشە ءتۇرلى كويلەككە قارجىنى قايدان تاباسىڭ؟» دەگەن كوممەنتتەر جازىلىپ ءجۇردى. وكىنىشكە قاراي, ەسەسىنە وعان ەلىكتەيتىندەر وتە كوپ ەدى. قىسقاسى, سەلفيلەتىپ ءجۇرىپ كۇيەۋگە شىققان, سەلفيلەتىپ ءجۇرىپ تاعى دا اجىراسىپ تىنعان, وسىنداي ۆيرتۋالدى ءومىرى ءۇشىن ءوز ومىرلەرىن سارپ ەتىپ وتىرعان جاستار نەگە كوبەيىپ بارادى؟ باسقالاردىڭ جالعان ءومىرى نەگە جەتكىنشەكتەرىمىزدى جالىقتىرمايدى؟ ايتپەسە, الەۋمەتتىك جەلىلەردەن جەريتىن كەز باياعىدا كەلىپ جەتكەن جوق پا؟
قازىرگى زامان ادامىن ەسىرتكىدەن بەتەر ەلىتتىرگەن بۇل دەرتتىڭ ەندىگى ەمى قانداي؟ كۇندىز كۇلكىنى, تۇندە ۇيقىنى جيناستىرىپ قويىپ, گادجەتكە ءۇڭىلىپ وتىرعان ۇرپاقتى ەندى ودان قالاي سۋىرىپ الامىز؟
بۇل ساۋالدار بۇگىندە پسيحولوگتاردى دا, پسيحياترلاردى دا الاڭداتا باستادى. ال ەگەر بۇل دەرت بولاتىن بولسا, وندا ونىڭ قانداي داۋاسى بار؟ جاۋابى جوق. بىراق, ەسەسىنە ساراپشىلار «ينتەرنەت-تۇلعالاردىڭ» كۇندىگىنە قانشا رەت اۆتوپورترەتى ءۇشىن دابىل قاعۋعا بولادى, قانشاسى جاي ينتەرنەتتى قىزىقتاۋ ەكەندىگىن اجىراتۋعا تىرىسىپ باعۋدا.
بۇل ماسەلەنى ءبىزدىڭ ارىپتەستەرىمىز دە كوتەرىپ ءجۇر. ماسەلەن, كتك تەلەارناسى ءبىزدىڭ جوعارىداعى كەيىپكەرىمىز سياقتى پاراقشاسىنا جازىلۋشىلارىنىڭ سانى 40 مىڭعا جەتكەن (كوپتەگەن گازەتتەردىڭ تارالىمى 5 مىڭنان ازەر اسادى, 2 مىڭ دانامەن شىعاتىن جۋرنالدار بار), سەلفي جاسامايتىن كۇنى جوق لۋيزا دەگەن قىزدان سۇحبات الدى.
اڭگىمەسىنە قۇلاق تۇرسەڭ, ءومىرىنىڭ ءمانى – سەلفي. سورىمىزعا قاراي, ول جالعىز ەمەس, سەلفي جاساماسا تۇرا المايتىن ادام قازىر ءار ەكى ءۇيدىڭ بىرىندە بار. ماسەلەن, باستاپقىدا پسيحولوگتار بۇل ءۇردىس وتكىنشى دەپ ەسەپتەگەن ەدى. الايدا, سەلفي دەگەن دەرت قازىر ءورشىپ تۇرعانى وتىرىك ەمەس.
ەندىگى جەردە پسيحولوگتار ءوز ءوزىن سۋرەتكە تۇسىرۋمەن الەك بولىپ جۇرگەندەردىڭ بارشاسىنىڭ اقىل-ەسىنىڭ دۇرىستىعىنا كۇمان كەلتىرىپ, دياگنوز قويا بەرۋگە بولادى دەپ وتىر. مىسالى, جۇرت نارتسيسسيزم دەگەن اۋرۋدىڭ بار ەكەنىن بىلەدى. دەمەك, سەلفيمانيا دا وسى دەرتتىڭ ەكىنشى ءتۇرى, دەيدى پسيحولوگ يرينا تەرەنتەۆا.
سول سياقتى, كتك جۋرناليستەرى ايەلىنە جىبەرگەن «نيۋ» ستيلىندەگى سەلفيى ايدالاداعى كورەي قىزىنىڭ تەلەفونىنان ءبىر-اق تابىلىپ, ازيا ويىندارى كەزىندە باسى بالەگە شاتىلعان ۋ-شۋ بويىنشا قازاقستاندىق باس جاتتىقتىرۋشى مەدەت ءابجانوۆتان دا سۇحبات الدى. ول ايەلى ەكەۋى ەروتيكالىق سەلفي الماسىپ تۇراتىنىن, تەلەديداردا حيدجابقا ورانىپ وتىرعان جۇبايى بۇدان وعاشتىق كورمەيتىنىن ورتاعا سالىپ وتىر.
قىسقاسى, جاستارىمىز جالىن اتقان شاعىندا ارماندارىنا قاراي ادىمداۋدىڭ ورنىنا, وزدەرىنىڭ سۋرەتتەرىنە ءسۇيسىنىپ, تەلەفونعا تەلمىرىپ قالعانىنا قانشالىقتى الاڭداۋعا بولادى؟
پسيحولوگتاردىڭ ايتۋىنشا, ەندىگى جەردە ابدەن قوعامعا دەندەپ كەتكەن بۇل دەرتپەن پسيحياترلار اينالىسۋى قاجەت.
شىندىعىندا دا الاڭدايتىن, ءتىپتى دابىل قاعاتىن جەرگە جەتكەن سياقتىمىز. ءسوزىمىز دايەكتى بولسىن, وسى جۋىردا جاقىن دوسىمنىڭ ۇيىنە شارۋامەن باس سۇقساق, ۇيىندە شاتاق شىعىپ جاتىر ەكەن. ۇلىنىڭ مەكتەپ ءبىتىرۋ قۇرمەتىنە جاياتىن داستارقانعا قىزى ءبىر كويلەگىن كيمەيمىن دەپ الەك سالىپ جاتىر. قىز دەگەندە دە ول بالاباقشاعا بارمايمىن دەپ قيعىلىق سالاتىنداي جاستا ەمەس, ۋنيۆەرسيتەت ءبىتىرىپ, جۇمىس ىستەپ جۇرگەن مامان. سونداعى ايتقان ءۋاجى: «مەن مۇنىمەن سەلفي جاساپ قويعانمىن, مۇنداي كويلەگىم بار ەكەنىن جۇرتتىڭ ءبارى بىلەدى...».
نە كۇلەرىن, نە جىلارىن بىلمەي وتىرعان زامانداسقا مۇندايدا نە دەرسىڭ؟!
ال پسيحولوگتاردىڭ ايتۋىنشا, زامانا وسىنداي بولىپ تۇرعاندا اپتاسىنا 3-4 سەلفي جاساۋ قالىپتى جاعداي كورىنەدى. ال ەگەر سەلفيىڭىز جيىلەپ كەتسە, الاڭداي باستاۋعا تۋرا كەلەدى. ەگەر كۇنىنە جوق دەگەندە 3-4 سەلفي جاسايتىن بولساڭىز, وندا پسيحياترعا ەشكىم ماجبۇرلەمەي-اق بارۋعا تۋرا كەلەدى.
ءبىز جوعارىدا سەلفيگە دەگەن تاۋەلدىلىك, پسيحولوگتاردىڭ عانا ەمەس, تراۆماتولوگتاردىڭ دا كومەگىنە جۇگىنۋگە ءماجبۇر ەتەتىنىن ازداپ جازدىق. الايدا, ءوزىن ءوزى سۋرەتكە تۇسىرەمىن دەپ جازىم بولعاندار سانى مۇنان الدەقايدا كوپ.
قايران ءبىزدىڭ اتا-بابالار ءبىر كەزدە ۇرپاعى ادام اقىلىنا سىيمايتىن جاعدايدا, سوعىس بولماي-اق, اپات كەلمەي-اق اجال قۇشاتىنىن ءبىلدى مە ەكەن؟!
مىسالى, وسى زاماننىڭ ينتەرنەتتە وتىراتىن حالايىعى جاقسى بىلەدى, نەشە ءتۇرلى جاعدايلاردى جاريالايتىن سايتتار بار.
سونىڭ ءبىرى Ofigenno.cc كەرەمەت سەلفي جاسايمىن دەپ ءجۇرىپ, انا دۇنيەدەن ءبىر-اق شىققانداردى ءتىزىپ بەردى. سوندىقتان دا «ءبىر رەت سەلفي جاساپ, ونى جاريالاماس بۇرىن جەتى رەت ويلان» دەگەن جاڭا ماتەل شىعارۋعا تۋرا كەلەدى.
وزگەلەرگە ساباق بولۋى ءۇشىن تۇبىنە سەلفي جەتكەندەردى ءبىز دە ەسكە سالا كەتۋدى ءجون كوردىك.
جاردان قۇلاپ ولگەن جۇبايلار. 2014 جىلى پورتۋگالياعا كۋرورتقا دەمالۋعا بارعان ەرلى-زايىپتىلاردىڭ قايعىلى ءولىمى عالامتور ارقىلى الەمدى شارلادى. ايەلى مەن كۇيەۋى بيىك جارتاستىڭ شەتىندە وزدەرىن ءوزدەرى سۋرەتكە ءتۇسىرىپ تۇرىپ, اياقتارى تايىپ كەتىپ, تۋرا بالالارىنىڭ كوزىنشە جاردان قۇلاپ ءولدى. انا دۇنيەگە قول ۇستاسىپ كەتكەن جۇپتىڭ ۇلى مەن قىزىنا پسيحياتر ءدارىگەرلەرگە ۇزاق ۋاقىت بويى ەم جۇرگىزۋگە تۋرا كەلدى.
جەتكىنشەك پەن اجەت كۇبىسى. بۇل قايعىلى وقيعا 2015 جىلدىڭ قاڭتارىندا ورىن الدى. بۇل بوزبالا الدىمەن الەۋمەتتىك جەلىگە «سپونج بوبتىڭ» كوستيۋمىن كيگەن سەلفيىن سالادى. جەتكىنشەك «سۇمدىق» لايك جيناعان سۋرەتىنەن كەيىن جەلىدەگى دوستارىن ودان دا بەتەر ريزاشىلىققا بولەۋ ءۇشىن اجەتحانادا ەرەكشە سەلفي جاساماقشى بولادى. جىلتىرعا اياعى تايىپ كەتكەن بالانىڭ باسى ۋنيتازعا قاتتى سوعىلىپ, جارىلعان جەرى قانجوسا بولىپ, جەدەل جاردەم كەلگەنشە ءجانتاسىلىم ەتەدى.
قىز بەن كوپىر. سانكت-پەتەربۋرگتىڭ سۇيكىمدى بويجەتكەنى كسەنيا يگناتەۆانىڭ كامەلەتتىك جاسىنا جارتى اي قالعاندا تۇبىنە سەلفي جەتتى. ول ءوزىن پيتەردىڭ كورىكتى جەرلەرىندە سۋرەتكە ءتۇسىرىپ, الەۋمەتتىك جەلىلەردە جاريالاۋعا ابدەن اۋەستەنىپ العان. ول ءحوببيىن ودان ءارى جەتىلدىرىپ, دوستارىن تاڭ قالدىرۋ ءۇشىن بيىك كوپىردىڭ جاقتاۋىنا شىعىپ قۇس قاناتتى سەلفي جاساماقشى بولعاندا, اياعى تايىپ كەتىپ, قۇلاپ بارا جاتىپ ساسقانىنان قولدارىمەن جالاڭاش ەلەكتر جەلىسىنە جارماسادى. كۇشتى ەلەكتر قۋاتى ونى امان قالدىرماعانى ايان.
قايعىلى قوشتاسۋ. ماسەلەن, ەۋروپا حالىقتارىندا كۇيەۋگە شىعاتىن قىز توي الدىندا «دەۆيچنيك», ياكي ۇيلەنگەلى وتىرعان جىگىت «مالچيشنيك» جاسايدى. 26 جاستاعى كوللەت مورەنونىڭ كوڭىلدى بەينەسىن دوستارى ەشقاشان ۇمىتپايتىن بولار. قۇربىسى ەشلي ەكەۋى ماشينامەن جۇيتكىپ كەلە جاتىپ سەلفيلەتۋمەن بولادى. ءبىر كەزدە قۇربىسى كولىكتىڭ رولىنە يە بولا الماي, قارسى بەتتەگى جولعا شىعىپ كەتىپ, جول اپاتىنا ۇشىرايدى. بۇل اجال قۇشقان سۇلۋلاردىڭ سوڭعى سەلفيى بولاتىن. ال كوللەت تۇرمىسقا شىعار الدىندا قۇربىلارىمەن قوشتاسۋ كەشىنە اسىعىپ كەلە جاتقان-دى.
تاعى دا قىز, تاعى دا كوپىر. 23 جاستاعى پولشا ستۋدەنتى سيلۆيا رەيچەل يسپانياعا جاساعان ساياحاتىنان ءمايىت بولىپ ورالۋعا دا وسى سەلفي سەبەپكەر. بويجەتكەن يسپانياداعى اتاقتى پۋەنتە-دە-تريانا كوپىرىنىڭ ۇستىندە ەستە قالارلىق ەرەكشە سەلفي تۇسىرۋگە ارەكەت ەتىپ جاتقاندا, 4 مەتر بيىكتىكتەن قۇلاپ كەتىپ, بەتون قابىرعاعا سوعىلىپ ولگەنى, جۇرەگى بىردەن توقتاعانى بەلگىلى بولدى.
ايدىڭ ەڭ اقىماق ءولىمى. 18 جاستاعى اننا ۋرسۋدى دا ەت-جاقىندارى ادام اقىلىنا سىيمايتىن جاعدايدا قارا جەردىڭ قوينىنا تاپسىردى. ول ءوز قۇربىسىمەن پويىزدىڭ ۇستىنە شىعىپ, ەرەكشە كادر ءتۇسىرمەك بولادى. اننانىڭ ءولىمى دە «دارۆين سىيلىعىنا» سۇرانىپ تۇر. ۆاگوننىڭ ۇستىندە جاي عانا سەلفي جاساۋ قىزىقسىز كورىنگەن قىز سۋرەتى اسەرلىرەك بولۋى ءۇشىن اياعىن اسپانعا كوتەرەمىن دەپ, ەلەكتر جەلىسىن جاناپ كەتەدى. 27 مىڭ ۆاتتىق ەلەكتر قۋاتى كوزدى اشىپ-جۇمعانشا قىزدى كۇيدىرىپ جىبەرەدى. دەنەسىنىڭ 50 پايىزىن كۇيىك شالعان اننا اجال قۇشتى.
تابىتقا سالعان ماحاببات. قازىرگى تاڭدا ينتەرنەت ارقىلى تانىسىپ, تابىسىپ جاتقاندار تۇك تە تاڭسىق ەمەس. حوللوۋەي چەيني مەن دجەيسم نيكولاس تا الەۋمەتتىك جەلى ارقىلى دوستاسىپ ءجۇرىپ, وڭتۇستىك افريكا رەسپۋبليكالارىنىڭ بىرىندەگى قالادا كەزدەسۋگە ۇيعارىم جاسايدى. عاشىقتار العاشقى كەزدەسۋلەرىن ماڭگىلىك ەستە قالدىرۋ ءۇشىن قىراتقا شىعىپ سۋرەتكە تۇسپەكشى بولادى. دجەيمس فوتواپپاراتتىڭ ءشتاتيۆىن ورناتىپ جۇرگەندە, حوللوۋەي جاردىڭ شەتىنە تىم جاقىنداپ كەتكەنى سونشالىقتى, ول وپىرىلىپ كەتىپ, تومەندە كۇتىپ تۇرعان اجالىنا قاراي زۋلايدى.
ءومىر مەن ءولىم اراسىنداعى ەكستريم. پۋەرتو-ريكو قالاسىنىڭ تۇرعىنى رامون گونسالەس كادىمگىدەي تانىمال, تابىسكەر رەپپەر بولاتىن. ءبىر كۇنى ونىڭ ويىنا ەرەكشە سەلفي جاساۋ تۋرالى يدەيا كەلىپ, ءبىر قولىمەن موتوتسيكل ءرولىن ۇستاپ, ەكىنشى قولىندا – تەلەفون, سەلفي جاساماق بولادى. ءارى قارايعى ستسەناري بەلگىلى. موتوتسيكل قارسى بەتكە شىعىپ كەتىپ, جۇيتكىپ كەلە جاتقان كولىككە سوعىسادى. ناتيجەسىندە رامون جالىنداعان جاس شاعىندا ءبىر سەلفيدىڭ كەسىرىنەن بۇل ومىردەن كەتتى.
وكىنىشكە قاراي, مۇنداي قايعىلى مىسالدار از ەمەس. ءبىزدىڭ وسى ماقالامىزدان كەيىن جۇرت سەلفي جاساماي قويادى دەپ ويلاۋدىڭ ءوزى كۇلكىلى. بىراق, قاسيەتتى ۋاقىتتى سەلفيلەتۋگە سارپ ەتۋگە نەمەسە ءبىر سۋرەت ءۇشىن اجال قۇشۋعا بولا ما؟ سول سەلفيدىڭ قۇنى ادام ومىرىنە تۇرا ما؟
وسى قايعىلى سەلفيلەردى ءتىزىپ شىققان سايتتاردىڭ ءوزى ونى جاريالاعاندا دوستارىڭمەن الەۋمەتتىك جەلىلەردە ءبولىسۋدى ءوتىنەدى. سەلفيگە تىم اۋەس بولماۋعا, اباي بولۋعا كەڭەس بەرەدى. ايتپەسە, جوعارىداعى جاعدايدىڭ ءبارى جازاتىن دا, ءسۇيىنشى سۇرايتىن دا جايتتەر ەمەس.
سەلفيگە قاتىستى ماسەلە مۇنىمەن دە شەكتەلمەيدى. ماسەلەن, بريتاندىق The Daily Mail باسىلىمى دا 2014 جىلى ەڭ اقىماق سەلفيلەردىڭ ءتىزىمىن جاسادى. كەيبىر سەلفيلەرگە قاراپ وتىرىپ, ادام بالاسىنىڭ اقىماقتىعىندا شەك جوق ەكەندىگىنە كوزىڭ جەتە تۇسەدى. كەيبىر سەلفيلەردىڭ فونى ادامنىڭ اشۋ-ىزاسىن تۋعىزادى. انتيرەيتينگكە ىلىككەن سەلفيلەردى كورىپ, ءتىپتى, ادام بالاسى قايدا كەتىپ بارادى دەپ شوشىنۋعا ءماجبۇرسىڭ.
ماسەلەن, الەۋمەتتىك جەلىنىڭ تۇراقتى پايدالانۋشىلارى دا سۋعا كەتىپ بارا جاتقان ادامنىڭ فونىندا سەلفي جاساعاندى, تابىتتىڭ تۇسىندا ءوزىن ءوزى سۋرەتكە ءتۇسىرگەندەردى, دارىگەرلەر پاتسيەنت ومىرىمەن الىسىپ جاتقاندا سەلفيلەتكەن مەدبيكەنى, ءتىپتى, ءورتەنە باستاعان ۇشاقتىڭ ىشىندە سەلفي جاساپ ۇلگەرگەندەردى كوردى. وزىمىزدە دە جالاڭاش سەلفيلەرىن فەيسبۋكقا سالىپ, جەلىدەگى دوستارىن شۋلاتىپ جۇرگەندەر جەتكىلىكتى. قىزدار ق ۇلىن مۇشەلەرىن اشىپ, جالپاق جۇرتقا جاريالاۋعا قىمسىنبايتىن بولدى...
كۇندە كيگەنى, قىدىرعانى, ىشكەن-جەگەنى مەن توڭازىتقىشتاعى سوعىمىمەن سەلفيلەتە بەرگەن ءبىر تانىمال اقىن قىزىمىزدى دا الەۋمەتتىك جەلىدەگىلەر ءتوزىمى تاۋسىلعاندا جەر-جەبىرىنە جەتكەنىن بەلسەندى ينتەرنەت قولدانۋشىلار بىلەدى.
سەلفيدىڭ كوپشىلىگى ادامنىڭ سۇيكىمىن كەتىرىپ قويماي, جاپ-جاقسى جۇمىسىنان, تۇراقتى جالاقىسىنان ايىرعانىنا دا كۋا بولدىق. ماسەلەن, وتكەن جىلى رەسەيلىك ءبىر مەدبيكە جانساقتاۋ بولىمىندە وتا جاسالىپ جاتقاندا قان ساۋلاعان قانداۋىردى ۇستاپ سەلفيلەتكەنى جۇرتتىڭ اشۋ-ىزاسىن تۋعىزىپ قانا قويماي, جۇمىستان قۋىلۋىنا سەبەپكەر بولعانىن وقىدىق.
ءوزىمىز دە ءاپ-اجەپتاۋىر تانىلعان, ءتىپتى, رەسەيدەگى سۇلۋ اكتريسالاردىڭ قاتارىنان ورىن العان قازاق قىزىن الەۋمەتتىك جەلى ارقىلى تاۋىپ, سۇحباتتاسۋعا ارەكەت جاساعاندا, باستاپقىدا ءبىر ءتۇيىر انا ءتىلىن بىلمەگەنىنە وكپەلەپ جۇرسەك, كەيىن كەيىپكەرىمىزدى زەرتتەپ وتىرىپ, كوبىنەسە اجەتحانا اينالارىندا ءوز-وزىنە ءسۇيسىنىپ, سەلفيلەتە بەرەتىنىن تۇسىنبەي, اڭگىمەلەسۋدەن باس تارتقانىمىز راس.
ەندى نە دەسەك تە, ادام بالاسى ءوزى ويلاپ تاپقان يگىلىكتەرگە تاۋەلدى عانا ەمەس, سونىڭ يكەمىندە ادامگەرشىلىكتى ۇمىتىپ بار جاتقانداي ما؟ سەلفيلەرىنە باسىلعان «لايكتاردى» ساناۋمەن عۇمىرىن وتكىزىپ جاتقاندار وزگەگە قارايلاسپاق تۇگىلى, ءوز اكە-شەشەسىنىڭ ءحالىن سۇراۋعا مۇرشاسى جوق. قالا ادامدارىنىڭ قازىرگى قايعىسى وسى بولسا, دالا بالاسى دا وسى كەلەڭسىز ۇردىسكە ىلەسە باستاعانى ەندى ءبىزدى ويلانتۋى ءتيىس.
سونىمەن, ءسوز ءتۇيىنى – ساقتانىڭىز: سەلفي!
ايناش ەسالي,
«ەگەمەن قازاقستان».