الماتى وبلىسىنىڭ اكىمى اماندىق باتالوۆ 8 ناۋرىز – حالىقارالىق ايەلدەر مەرەكەسىنە وراي, جەتىسۋ جەرىندەگى 200-گە جۋىق اق جاۋلىقتى انالاردى سالتاناتتى تۇردە قۇتتىقتادى. شاراعا سوعىس ارداگەرلەرى مەن تىل ەڭبەككەرلەرى, قوعام قايراتكەرلەرى, كوپ بالالى انالار جانە ءتۇرلى سالادا ەڭبەك ەتىپ جۇرگەن نازىك جاندار قاتىستى.
«سۇلۋلىق پەن نازىكتىكتىڭ يەسى – سىزدەردى وسىناۋ مەرەكەمەن شىن جۇرەكتەن قۇتتىقتايمىن. دانا حالقىمىز «ايەل كۇلكىسى ەستىلگەن ەل – باقىتتى ەل» دەيدى» دەپ وبلىس اكىمى كوپ بالالى انالارعا «التىن القا», «كۇمىس القا» توسبەلگىلەرىن تابىستاپ, بىرقاتار ازاماتشالارعا قۇرمەت گراموتالارى مەن العىس حاتتارىن تاپسىردى.
ءوز كەزەگىندە جيىنعا قاتىسۋشى انالار ريزاشىلىقتارىن جەتكىزىپ, وسىنداي سىي-قۇرمەت كورسەتكەندەرىنە شەكسىز العىستارىن ءبىلدىردى.
جيىن سوڭىندا قازاقستاننىڭ ەڭبەك سىڭىرگەن ءارتىسى نۇرلان ونەرباەۆ انالارعا, ايەلدەر قاۋىمىنا ارناپ ءان اۋەلەتتى.
نۇربول الدىباەۆ,
«ەگەمەن قازاقستان».
تالدىقورعان.