مەملەكەتتىك حاتشى بىرقاتار ەلشىلەردەن سەنىم گراموتالارىن قابىلدادى

استانا. 20 مامىر. مەملەكەتتىك حاتشى گۇلشارا ابدىقالىقوۆا مەكسيكا, ۆەنەسۋەلا, كونگو رەسپۋبليكاسى, كورەيا حالىقتىق دەموكراتيالىق رەسپۋبليكاسى, سۋدان رەسپۋبليكاسى جانە ەل-سالۆادور رەسپۋبليكاسىنىڭ قازاقستانداعى توتەنشە جانە وكىلەتتى ەلشىلەرىنەن سەنىم گراموتالارىن قابىلدادى. بۇل تۋرالى akorda.kz حابارلادى. مەملەكەتتىك حاتشى مەكسيكا, ۆەنەسۋەلا, كونگو جانە كحدر-دىڭ ۋاكىلەتتى وكىلدەرىن «ەكسپو 2017» كورمەسىن وتكىزۋ قۇقىعىن الۋ بارىسىندا استانانىڭ كانديداتۋراسىنا قولداۋ كورسەتكەندەرى ءۇشىن, سونداي-اق, مەكسيكا, ۆەنەسۋەلا, سالۆادور جانە كحدر ەلشىلەرىنە 2017-2018 جىلدارى بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە قازاقستان رەسپۋبليكاسىنىڭ كانديداتۋراسىن قولداعاندارى ءۇشىن العىسىن ءبىلدىردى. گۇلشارا ابدىقالىقوۆا مەكسيكا ەلشىسى مارتا ەلەنا بارسەنامەن اڭگىمە بارىسىندا مەكسيكا قازاقستاننىڭ لاتىن امەريكاسىنداعى برازيليادان كەيىنگى ءىرى ساۋدا سەرىكتەسى ەكەنىن اتاپ كورسەتتى. قازاقستان مەن مەكسيكا اراسىنداعى 2014 جىلعى تاۋار اينالىمى 120,8 ملن. اقش دوللارىن قۇرادى. مەملەكەتتىك حاتشى قازاقستاندا اشىلۋى 2015 جىلعا جوسپارلانىپ وتىرعان مەكسيكانىڭ ەلشىلىگى ارقىلى تىكەلەي ديپلوماتيالىق قارىم-قاتىناس ورناتۋ ەلارالىق بايلانىستاردى ساياسي جانە ەكونوميكالىق قانا ەمەس, الەۋمەتتىك-گۋمانيتارلىق سالالاردا دا تەرەڭدەتۋگە مۇمكىندىك تۋعىزاتىنىن اتاپ ءوتتى. ەكىجاقتى كەزدەسۋ بارىسىندا مەملەكەتارالىق قارىم-قاتىناستاردى دامىتۋدىڭ جاي-كۇيى مەن كەلەشەگى تالقىلاندى. گۇلشارا ابدىقالىقوۆا اتاپ كورسەتكەندەي, جاھاندانۋ جاعدايىندا ساياسي, ەكونوميكالىق, ساۋدا, عىلىمي, مادەني جانە باسقا سالالارداعى ىنتىماقتاستىقتى دامىتۋ ءبىزدىڭ مەملەكەتتەرىمىزدىڭ ۇلتتىق مۇددەلەرىنە ساي كەلەدى. وسىعان وراي, ديپلوماتيانىڭ تابىستىلىعىن ءوزارا ءىس-قيمىلدىڭ دەڭگەيى ايقىندايدى. تاراپتار كەڭ اۋقىمدى ماسەلەلەر بويىنشا بايلانىستاردى كەڭەيتۋگە ءوزارا مۇددەلىلىك تانىتتى. ولاردىڭ قاتارىندا, قارجى, مۇناي-گاز جانە تاۋ-كەن ونەركاسىبى سالالارىنداعى, ازىق-ت ۇلىك ونىمدەرى وندىرىسىندەگى, بالامالى ەنەرگەتيكاداعى جانە باسقا دا سالالارداعى ىنتىماقتاستىقتار بار. مەملەكەتتىك حاتشى اتالعان مەملەكەتتەردىڭ توتەنشە جانە وكىلەتتى ەلشىلەرىنىڭ قىزمەتتەرى ءبىزدىڭ ەلدەرىمىزدىڭ اراسىنداعى ىنتىماقتاستىق الەۋەتىن ارتتىرۋعا ىقپال ەتەدى دەپ ۇمىتتەنەتىنىن ايتتى. ەلامان قوڭىر. دەرەك, سۋرەت: akorda.kz.