قوستاناي. 20 مامىر. قوستاناي وبلىسىندا قىرىلعان اقبوكەندەردىڭ سانى 19 231-گە جەتتى. بۇل تۋرالى وبلىستىق توتەنشە جاعدايلار دەپارتامەنتىنە سىلتەمە جاساپ, egemen.kz ءتىلشىسى حابارلادى.
بۇعان دەيىن ولگەن جانۋارلاردىڭ سانى 10 مىڭنان اسقانى تۋرالى حابارلانعان. دەگەنمەن, اتالعان دەپارتامەنت بۇگىنگە دەيىن كومىلگەن اقبوكەندەردىڭ سانى جوعارىداعى كورسەتكىشكە جەتكەنىن ايتتى. الدىن الا بەلگىلى بولعان مالىمەتتەرگە سۇيەنسەك, ولاردىڭ جاپپاي قىرىلۋىنا پاستەرەللەز اۋرۋى سەبەپ بولۋى مۇمكىن.
قازىرگى تاڭدا توتەنشە جاعدايدىڭ سالدارىن جويۋ جۇمىستارى جۇرگىزىلۋدە. وعان 515 ادام جانە 76 تەحنيكا جۇمىلدىرىلعان. ءوڭىردىڭ وڭتۇستىگىندەگى امانگەلدى اۋدانىنىڭ اۋماعىندا ارنايى لاگەرلەر قۇرىلىپ, 100 ادام ورنالاستىرىلدى. تۇندە تۇنەۋ ءۇشىن اۋدان اكىمدىگى 3 كيىز ءۇي, اقمولا وبلىسى توتەنشە جاعدايلار دەپارتامەنتى – 3, قوستاناي وبلىسى توتەنشە جاعدايلار دەپارتامەنتى اسحاناعا ارنالعان – 1, №6697 اسكەري ءبولىمى 6 شاتىر تىكتى. ولاردىڭ ۇشەۋى قوسالقى ماقساتتا. جەكە قۇرام اۋىزسۋ, تەحنيكا جانە جانارمايمەن قامتاماسىز ەتىلگەن. سونداي-اق, اۋدان اكىمدىگى, اتالعان اسكەري ءبولىم جانە «التىن دالا» مەملەكەتتىك مەكەمەسىنىڭ ۇلەسىمەن 3 تاماقتاندىرۋ پۋنكتى جۇمىس ىستەۋدە.
ءنازيرا جارىمبەتوۆا.
دەرەك: قوستاناي وبلىستىق توتەنشە جاعدايلار دەپارتامەنتى.
سۋرەت: szh.kz.