اقتوبە. 20 مامىر. اقتوبە وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى جەرگىلىكتى حالىقتى ءدۇر سىلكىندىرگەن قىلمىستىق ىسكە نۇكتە قويدى. بۇل تۋرالى egemen.kz ءتىلشىسى حابارلادى.
ناقتى ايتساق, 2012 جىلدىڭ قىركۇيەگىندە جانە 2015 جىلدىڭ قاڭتار ايىندا ازامات ۆ.ليتۆينوۆ اقتوبە قالاسىندا ەكى ادامدى ولتىرگەن. ونىمەن قويماي, قۇرباندارىنىڭ ءبىرىنىڭ مۇلكىن ۇرلاعان. وسى قىلمىسى ءۇشىن قىلمىستىق كودەكستىڭ 99-بابى, 2-بولىگى, 13-تارماعى جانە 188-بابىنىڭ 1-بولىگى بويىنشا كىنالى دەپ تانىلىپ, 18 جىلعى باس بوستاندىعىنان ايىرىلدى. جازاسىن قاتاڭ رەجىمدەگى تۇزەۋ كولونياسىندا وتەيدى.
قىلمىسكەر 2012 جىلدىڭ قىركۇيەك ايىندا «التاي» ساۋدا ۇيىندە جەكە كاسىپكەر ازامات ر.مۇحامبەتالينگە اياق كيىم ساتۋشى بولىپ جۇمىسقا ورنالاسقان. باۋ-باقشا ۋچاسكەسىندەگى سپيرتتىك ىشىمدىك ىشۋدەن كەيىن كاسىپكەرمەن جانجالداسىپ قالادى. ناتيجەسىندە قاساقانا كەۋدە قۋىسىنا پىشاق سالعان. جابىرلەنۋشى العان جاراقاتتان قايتىس بولدى. ال ليتۆينوۆ سول كۇنى كەشكە ءمايىتتى قىلمىس قۇرالىمەن بىرگە اتالعان ۋچاسكەگە كومىپ تاستاعان.
قولى قانعا مالىنعان قىلمىسكەر وسى جىلدىڭ 17 قاڭتارىندا تاعى ءبىر ادامنىڭ ءولىمىنى سەبەپ بولدى. ول ءۇي تەلەفونىمەن قوڭىراۋ شالامىن دەگەن سىلتاۋمەن ءوزىنىڭ بۇرىنعى تانىسى گ.كوركينانىڭ ۇيىنە كىرگەن. اڭگىمە بارىسىندا ازاماتشا ونىڭ الكوگولدىك ىشىمدىكتەرگە جاقىن ەكەنىن, سول ءۇشىن دە جۇمىستا جوقتىعىن ايتقان. وزىنە قاتىستى سىندى جەكە باسىنا ءتىل تيگىزۋ دەپ قابىلداعان ليتۆينوۆ كىرەبەرىس بولمەدەگى شكافتىڭ ۇستىندە جاتقان بالتانى الىپ, ونىڭ باسىنا 20-عا جۋىق سوققى جاسايدى. سالدارىنان جابىرلەنۋشى وقيعا ورنىندا قازا تاپتى. ال ۆ.ليتۆينوۆ جابىرلەنۋشىنىڭ پاتەرىنەن 3 000 تەڭگە مەن 25 000 ءرۋبلدى جانە باعاسى 3000 تەڭگە تۇراتىن Panasonic ماركالى راديوتەلەفونىن ۇرلاپ كەتكەن.
ساتىبالدى ءساۋىرباي.
دەرەك, سۋرەت: egemen.kz.