كۇن تارتىبىندە – «جاڭا جىبەك جولىن» دامىتۋ جايى

22 مامىردا استاناداعى ەكونو­مي­كالىق فورۋم اياسىندا «جاڭا جىبەك جولى» 3-ءشى حالىقارالىق كولىك­تىك-لو­گيس­تي­كالىق بيزنەس-فورۋمى وتكىزىلەدى.

فورۋمعا 200 تەمىرجول اكىمشىلىكتەرى مەن حالىقارالىق كولىكتىك-لوگيستيكالىق كومپانيالاردىڭ وكىلدەرى قاتىسادى.

وندا حالىقارالىق كولىكتىك دالىزدەردى دامىتۋداعى مەملەكەتارالىق سەرىكتەستىكتىڭ جايلارى, ترانسكاسپي حالىقارالىق كولىك باعدارى, ەۋرازيالىق قۇرلىقتا كولىكتىك-لوگيستيكالىق شەشىمدەردى جۇزەگە اسىرۋ جايى قارالادى.

فورۋم بارىسىندا «جاڭا جىبەك جولىن» دامىتۋ بارىسى تالقىلانادى. وعان قاتىسۋشىلار حالىقارالىق تاسىمالدى تۇراقتى جاساقتاۋ, ازيا مەن ەۋروپا اراسىنداعى كونتەينەرلىك سەرۆيستى ىقپالداستىرۋ, كولىكتىك-لوگيستيكالىق ينفراقۇرىلىمدى دامىتۋداعى بيزنەستىڭ ءرولىن كوتەرۋ جايىن ءسوز ەتەدى.

اتالمىش كولىكتىك-لوگيستيكالىق فورۋم مەملەكەت باسشىسىنىڭ «نۇرلى جول» جولداۋىنداعى تاپسىرمالاردى تابىستى جۇزەگە اسىرۋدىڭ قادامدارىن قاراپ, ونى الەمدىك دەڭگەيگە كوتەرۋدى كوزدەيدى.

«قازاقستان ءوزىنىڭ تاريحي ءرولىن قالپىنا كەلتىرىپ, ورتالىق ازيا وڭىرىندەگى ترانزيتتىك جانە ءىرى ىسكەرلىك حابىنا, ەۋروپا مەن ازيا اراسىنداعى وزىندىك كوپىرگە اينالۋى ءتيىس. ۇسىنىلىپ وتىرعان «جاڭا جىبەك جولى» جوباسى باسەكەلەستىككە ساي ءتورت ءتارتىپتى: جىلدامدىق, سەرۆيس, قۇنى, ساقتالۋى مەن تۇراقتىلىعىن جۇزەگە اسىرادى», – دەپ اتاپ وتكەن ەدى پرەزيدەنت شەتەل ينۆەستورلارى كەڭەسىنىڭ كەزەكتى وتىرىسىندا.

قازىرگى تاڭدا «قتج» ۇك» اق قازاقستاننىڭ جاھاندىق ينفراقۇرىلىمدىق ىقپالداسۋىن قامتاماسىز ەتۋ ءۇشىن ەۋرازيا قۇرلىعىنداعى تاسىمالداۋ جۇيەسىن جاساقتاۋ جوبالارىن جۇزەگە اسىرۋدى باستادى, دەپ حابارلادى «قتج» ۇك» اق-تىڭ ءباسپاسوز قىزمەتى.