استانا. 19 مامىر. پرەزيدەنت جانىنداعى ادام قۇقىقتارى جونىندەگى كوميسسيانىڭ «قازاقستان رەسپۋبليكاسىنداعى ادام ساۋداسىنا قارسى ءىس-قيمىل سالاسىنداعى ادام قۇقىقتارىن قورعاۋدىڭ وزەكتى پروبلەمالارى» اتتى ارناۋلى بايانداماسىنىڭ حالىقارالىق تانىستىرىلىمى ءوتتى. بۇل تۋرالى akorda.kz حابارلادى.
تانىستىرىلىم بارىسىندا مەملەكەتتىك حاتشى گۇلشارا ابدىقالىقوۆا كوميسسيا بايانداماسىنىڭ بىرەگەيلىگىن اتاپ ءوتتى جانە قۇقىق قورعاۋ ورگاندارىنىڭ ۇكىمەتتىك ەمەس ۇيىمدارمەن ادام ساۋداسىنا قارسى كۇرەس سالاسىنداعى ءوزارا ءىس-قيمىلىن جەتىلدىرۋگە, سونداي-اق, ترافيك قۇرباندارىنا ارنايى الەۋمەتتىك قىزمەت كورسەتۋگە باعىتتالعان ۇسىنىمدارعا نازار اۋداردى.
باياندامانىڭ تانىستىرىلىمىنا ورتالىق مەملەكەتتىك ورگانداردىڭ باسشىلارى, زاڭ شىعارۋشى, اتقارۋشى جانە سوت بيلىگى, قۇقىق قورعاۋ ورگاندارىنىڭ وكىلدەرى, قۇقىقتانۋشى-عالىمدار, قازاقستاندا تىركەلگەن حالىقارالىق ۇيىمدار مەن ديپلوماتيالىق وكىلدىكتەردىڭ باسشىلارى, ادۆوكاتۋرا, نوتاريات, ءبىلىم جانە عىلىم, دەنساۋلىق ساقتاۋ, مادەنيەت, بيزنەس جانە بۇقارالىق اقپارات قۇرالدارى وكىلدەرى قاتىستى.
كوميسسيا مۇشەلەرى مەن ساراپشىلارى ت.ابىشەۆ, ۆ.ۆورونوۆ, ن.شاحانوۆا, ر.يۋرچەنكو جانە ز.بايساقوۆا باياندامانى تانىستىرىپ, قاتىسۋشىلار مەن قوناقتاردىڭ قويعان سۇراقتارىنا جاۋاپ بەردى.
سونىمەن قاتار, باياندامادا قازاقستان بەكىتكەن حالىقارالىق كەلىسىم-شارتتاردىڭ نورمالارىنا سايكەس ادام ساۋداسى قۇرباندارىنىڭ قۇقىقتارىن قورعاۋ سالاسىنداعى زاڭناما مەن قۇقىق قولدانۋ تاجىريبەسىنىڭ سالىستىرمالى تالداۋى, قۇزىرلى مەملەكەتتىك ورگاندار قىزمەتىنە بەرىلگەن باعالاۋ, كونستيتۋتسيا نورمالارىنا جانە حالىقارالىق ستاندارتتارعا سايكەس حالىقتىڭ الەۋمەتتىك تۇرعىدان قورعالاتىن توپتارىنا جاتاتىن ازاماتتاردىڭ الەۋمەتتىك-ەكونوميكالىق, ەڭبەك جانە مادەني قۇقىقتارىن قورعاۋ تەتىكتەرىن ءارى قاراي جەتىلدىرۋ ماسەلەسى بويىنشا ناقتى قادامدار قامتىلعانى اتاپ ءوتىلدى.
سونداي-اق, ءىس-شارا بارىسىندا سىرتقى ىستەر ءمينيسترى ە.ىدىرىسوۆ, ادام قۇقىقتارى جونىندەگى كوميسسيانىڭ توراعاسى ق.سۇلتانوۆ, ىشكى ىستەر ءمينيسترى ق.قاسىموۆ, دەنساۋلىق ساقتاۋ جانە الەۋمەتتىك دامۋ ءمينيسترى ت.دۇيسەنوۆا, حالىقارالىق كوشى-قون ۇيىمىنىڭ ورتالىق ازياداعى ميسسياسىنىڭ باسشىسى د.كەسەروۆيچ, ەۋروپالىق وداقتىڭ قازاقستانداعى وكىلدىگى باسشىسىنىڭ ورىنباسارى ك.ۆەليچكوۆ, ۇلىبريتانيانىڭ قازاقستانداعى توتەنشە جانە وكىلەتتى ەلشىسى ك.براۋن, اقش-تىڭ قازاقستانداعى توتەنشە جانە وكىلەتتى ەلشىسى د.كرولل, نورۆەگيا كورولدىگىنىڭ قازاقستانداعى توتەنشە جانە وكىلەتتى ەلشىسى و.-ي.بەرنوي ءسوز سويلەدى.
ساراپشىلار ادام قۇقىقتارى جونىندەگى كوميسسيانىڭ ارناۋلى بايانداماسىنا جوعارى باعا بەردى جانە ونداعى ۇسىنىمداردىڭ ۇكىمەت پەن پارلامەنت تاراپىنان ناقتى ىسكە اسىرىلا باستاعانىن ايتتى.
ەلامان قوڭىر.
دەرەك, سۋرەت: akorda.kz.