مەملەكەتتىك ءتىلدى دامىتۋ قورى پرەزيدەنت جانىنداعى ورتالىق كوممۋنيكاتسيالار قىزمەتىندە iPhone جانە iPad تۇتىنۋشىلارى ءۇشىن قولجەتىمدى «ايتىس» اتتى تۇڭعىش قازاقستاندىق مەسسەندجەردىڭ تۇساۋكەسەرىن وتكىزدى.
اتالعان جاڭا وتاندىق جوبانى تانىستىرعان مەملەكەتتىك ءتىلدى دامىتۋ قورىنىڭ ديرەكتورى ازات شاۋەەۆ iTys (ايتىس) موبيلدىك قوسىمشاسى قولدانۋشىلارعا مەملەكەتتىك تىلدە تولىققاندى حات-حابار الماسۋعا مۇمكىندىك بەرىپ قانا قويماي, سونداي-اق, الەمنىڭ ءار قيىرىنداعى بارشا قازاقستاندىقتاردى بىرىكتىرۋدى كوزدەيتىندىگىن جەتكىزدى. بۇل iTys ءونىمى ەلباسى نۇرسۇلتان نازارباەۆتىڭ ەلىمىزدى قارقىندى دامىتۋدىڭ باستى باعدارى رەتىندە ايقىنداعان يننوۆاتسيالىق جوبالارىنىڭ قاتارىنا جاتادى, دەپ اتاپ وتكەن ا.شاۋەەۆ العاش رەت «ايتىس» قازاقستاندىق مەسسەندجەرىنىڭ تۇساۋكەسەرى وتكەن جىلدىڭ قاراشاسىندا وتكىزىلگەندىگىن ەسكە سالدى. بيىلعى جىلعى تۇساۋكەسەردە اتالعان جوبانىڭ جەتىلدىرىلىپ, ءبىرشاما ۇتىمدى تۇستارى بار ەكەندىگىن اتاپ ءوتتى. iTys قازاقستاندا, اسىرەسە, جاستار اراسىندا ەرەكشە تانىمال بايلانىس تۇرىنە اينالدى. ەلىمىزدەگى iTys-تى قولدانۋشىلار كۇن سايىن ءۇش ميلليوننان استام حابارلاما جىبەرىپ, مۋلتيمەديالىق فايلدار الماسىپ وتىرادى, دەدى ول.
سونداي-اق, قور ديرەكتورى اتالمىش مەسسەندجەر بارشا قازاقستاندىقتاردىڭ, سونداي-اق, شەتەلدىكتەردىڭ دە قولداۋىنا يە بولىپ, وعان قاتىستى وڭ پىكىرلەر ايتىلىپ جاتقاندىعىن تىلگە تيەك ەتتى.
سونىمەن قاتار, جوبا جەتەكشىسى ءداۋىت شايحيسلاموۆ بىرنەشە ايدىڭ ىشىندە بۇل مەسسەندجەردى ۇيالى تەلەفوندارىنا جۇكتەپ العان تۇتىنۋشىلار سانى 150 000-نان استى, ولاردىڭ قاتارىندا تەك قازاقستان تۇرعىندارى عانا ەمەس, رەسەي, اقش, قىتاي, كورەيا, تۇركيا, فرانتسيا جانە جاپونيا ەلدەرىنىڭ ازاماتتارى بار, دەپ اتاپ كورسەتتى. ونىڭ ايتۋىنشا, باعدارلامانىڭ بىرقاتار ۇتىمدى دا ءتيىمدى تۇستارى بارشىلىق: مۇندا جەكە حابارلامالاردىڭ قۇپيالىلىعىن ساقتاۋعا مۇمكىندىك بەرەتىن اۆتوماتتى ءوشىرۋ فۋنكتسياسى بار, ۇلتتىق ناقىشتاعى ستيكەرلەر مەن سمايليكتەر دە ورىندى تاڭدالعان, ينتەرفەيستى دە قازاق, ورىس جانە اعىلشىن تىلدەرىندە قولدانۋعا بولادى. جانە دە ەڭ ءتيىمدى تۇسى – تەگىن پايدالانۋ مۇمكىندىگى.
اقپارات ءۇشىن قوسا كەتسەك, iTys – بارشامىز بىلەتىن Whatsapp-تىڭ قازاقشا بالاماسى. ول تۇڭعىش قازاقستاندىق ماماندار ازىرلەپ شىعارعان, جەدەل حابار الماسۋ مۇمكىندىگىن بەرەتىن ارنايى موبيلدىك قوسىمشا.
«ايتىس» كومانداسى العاشقى قازاقستاندىق مەسسەندجەردى جەتىلدىرۋ جۇمىستارىن توقتاۋسىز جۇرگىزۋدە. جوبا ازىرلەۋشىلەرى تاياۋ ارالىقتا iTys سەرۆيسىنىڭ بازاسىندا تەگىن دىبىستىق قوڭىراۋلار, قازاق ءتىلىنىڭ اۆتوتۇزەتۋشىسى, گرافيكالىق رەداكتور سەرۆيستەرىن ۇسىنىپ, ۇلتتىق ناقىشتاعى جاڭا ستيكەرلەر مەن انيماتسيالار ءتۇرىن قوسپاقشى. iPhone جانە iPad قۇرىلعىلارىنا ورناتىلاتىن مەسسەندجەردىڭ قازاقشا كلاۆياتۋراسى دا قولايلى, ورىس جانە اعىلشىن ارىپتەرىنە كوزدەرى ۇيرەنگەن تۇتىنۋشىلار ەندى قازاق ءالىپبيىن دە ەركىن پايدالانا الادى.
بۇل مىندەتتەردى جوعارى دەڭگەيدە ورىنداپ, كوپشىلىك كوڭىلىنەن شىعۋ ءۇشىن جەتىلدىرۋ جۇمىستارىنا قازاقستاندىق دارىندى سۋرەتشىلەر, ديزاينەرلەر جانە تەحنيكالىق ماماندار جۇمىلدىرىلماق.
ەلميرا ماتىباەۆا,
«ەگەمەن قازاقستان».