شانحاي ىنتىماقتاستىق ۇيىمىنىڭ ناتيجەلى جۇمىسىنىڭ ءبىر كورىنىسى – قازاقستان رەسپۋبليكاسى مەن قحر اراسىنداعى ساۋدا-ساتتىق, جالپى ەكونوميكالىق بايلانىس جىلدان-جىلعا ۇلعايىپ كەلەدى. مەملەكەتتىك ماڭىزى بار بۇل جۇمىسقا ايماقتار دا بەلسەندى اتسالىسۋدا. جۋىردا الماتى وبلىستىق كاسىپكەرلەر پالاتاسىندا قحر-دىڭ شانسي ايماعىنان كەلگەن ارنايى دەلەگاتسيامەن تالدىقورعان قالاسىنىڭ اكىمى ەرمەك الپىسوۆ كەزدەسىپ, قوس تاراپقا ءتيىمدى جوبالاردى تالقىلادى.
«Xing Huo» كورپوراتسياسىنىڭ وكىلدەرى قالا باسشىلىعىمەن كەزدەسۋى بارىسىندا اسپان استى ەلى ءوڭىردىڭ اگرارلىق سالاسىن دامىتۋعا قىزىعۋشىلىق تانىتاتىندىعىن ايتىپ, بۇل ماقساتتى ورىنداۋعا جەتىسۋ جەرى تاپتىرماس ولكە بولىپ تابىلاتىندىعىن جەتكىزدى. سونىمەن قاتار, وزگە سالالارعا دا ينۆەستيتسيا سالۋدى جوسپارلاعان قوناقتار تالدىقورعاننىڭ قازىرگى تىنىسى جايلى مالىمەت سۇرادى. ءوز كەزەگىندە قالا اكىمى ەرمەك الپىسوۆ شانسي ايماعىنىڭ وكىلدەرى قولعا الماق بولىپ وتىرعان «يننوۆاتسيالىق اۋىلشارۋاشىلىق پاركىن» وبلىس ورتالىعىندا تۇرعىزۋ وزگە اۋداندارداعىداي لوگيستيكالىق جانە تاعى باسقا شىعىندارىن ازايتىپ, جوبانىڭ كەڭ اۋقىم الىپ, ءونىمنىڭ وزىندىك قۇنىنىڭ تومەندەۋىنە سەپ بولاتىندىعىن جەتكىزدى. ونىڭ ۇستىنە قالا اۋەجايى الداعى ۋاقىتتا جۇك تاسىمالداۋشى ۇشاقتاردى قابىلداۋ مۇمكىندىگىنە يە بولاتىندىعىن دا ايتقان قالا باسشىسى كەلىسسوزگە كەلگەن ينۆەستورلاردىڭ قىزىعۋشىلىعىن تۋعىزدى. سونىمەن بىرگە, وبلىس ورتالىعىنىڭ جاڭادان بوي كوتەرگەن وڭتۇستىك-باتىس اۋدانىندا تۇرعىن ءۇي سالۋ جايىن تالقىلاعان قوس تاراپ, بۇگىندە كوپ قاباتتى تۇرعىن ۇيلەردىڭ جوبالىق-سمەتالىق قۇجاتتارى مەن جوبالارى ۋاقىتتى ۇنەمدەپ, سالىنعان قارجىنىڭ قايتارىمىن جىلدامداتىپ, قارجىنى ۇنەمدەۋگە بولاتىندىعىن ايتتى. قالا اكىمىنىڭ ءۇشىنشى ۇسىنىسى وبلىس باسشىلىعىنىڭ قولداۋىمەن ينفراقۇرىلىمى جاڭارتىلىپ جاتقان «شىعىس» يندۋستريالىق ايماعىندا قانت زاۋىتىن سالۋ بولدى. تالدىقورعاننىڭ لوگيستيكالىق مۇمكىندىكتەرىن ەسكەرسەك, بۇل ينۆەستورلارعا ۇتىمدى ۇسىنىس. توعىز جولدىڭ تورابى, جۇك تاسىمالداۋشى ۇشاقتاردى قابىلدايتىن اۋەجاي, تەمىرجول تاعى بار. ونىڭ ۇستىنە بۇگىندە ەلباسى تاپسىرماسىنا سايكەس الماتى وبلىسىندا قانت قىزىلشاسىنىڭ القاپتارىن ۇلعايتۋ جۇمىسى جۇيەلى تۇردە جۇرگىزىلىپ جاتقاندىقتان شيكىزات تا تاپشى بولمايدى.
كەلىسسوزدەر اياقتالىسىمەن قوس تاراپ ىنتىماقتاستىق تۋرالى مەموراندۋمعا قول قويىپ, قولعا الىنار جوبالاردى الداعى ۋاقىتتا تاعى دا تەرەڭىرەك زەرتتەپ, ەكى جاققا دا ءتيىمدى جولدى قاراستىراتىندىعىن ايتىپ ۋاعدالاستى.
نۇربول الدىباەۆ, «ەگەمەن قازاقستان».
تالدىقورعان.