استانا. 31 ناۋرىز. ەندى ەكى ساعاتتان كەيىن فۋتبولدان رەسەي مەن قازاقستان قۇرامالارى اراسىندا جولداستىق كەزدەسۋ باستالادى. اتالعان ويىندى ستاديوننان 9 مىڭنان استام جانكۇيەر تاماشالاماق. بۇل تۋرالى sport-express.ru حابارلادى.
ويىننىڭ حيمكي قالاسىندا وتەتىنى بەلگىلى. استانا ۋاقىتى بويىنشا ساعات 23:00-دە باستالاتىن ويىندى «حابار» تەلەارناسى تىكەلەي ەفيردە كورسەتەدى.
رەسەي قۇراماسىنىڭ باس جاتتىقتىرۋشىسى فابيو كاپەللو بۇگىنگى كەزدەسۋگە ەرەكشە ءمان بەرىپ وتىر. «بۇل ماتچ ويىنشىلارىمىزدىڭ شاما-شارقىن انىقتاۋعا مۇمكىندىك بەرەدى. ءبىزدى الدا 2016 جىلعى ەۋروپا چەمپيوناتىنىڭ ىرىكتەۋ ءتۋرنيرى اياسىنداعى شەشۋشى ويىندار كۇتىپ تۇر. سونداي ماڭىزدى كەزدەسۋلەردىڭ الدىندا دايىندىقتارىمىزدى پىسىقتاۋ ءۇشىن بۇگىنگى ويىنعا ەرەكشە ءمان بەرىپ وتىرمىز», – دەدى كاپەلو مىرزا.
ءوز كەزەگىندە, قازاقستان قۇراماسىنىڭ باس جاتتىقتىرۋشىسى يۋري كراسنوجان الداعى كەزدەسۋدى تاجىريبە الماسۋ جانە ءوز ويىن ورنەگىمىزدى جەتىلدىرۋ ءۇشىن بەرىلگەن مۇمكىندىك دەپ باعالادى.
«ەكى مەملەكەتتىڭ دوستىق قاتىناستا ەكەنى بەلگىلى. سونداي-اق, ەكى كوماندانىڭ دا بولاشاعى جارقىن دەپ بىلەمىن. رەسەي 2018 جىلدان زور ءۇمىت كۇتەدى. بۇگىنگى ويىنعا بايلانىستى قارسىلاستارىمىز الداعى ماتچتاردا الاڭعا شىعاتىن قۇراماسىن جاساقتاماق. ال بىزدەر 2016 جىلعى ەۋروپا چەمپيوناتىنىڭ ىرىكتەۋ ويىندارىنا قاتىسپاعان كەيبىر فۋتبولشىلارىمىزعا مۇمكىندىك بەرمەكپىز», – دەدى يۋري كراسنوجان.
ەلامان قوڭىر.
دەرەك: sport-express.ru.
سۋرەت: eurosport.ru.