ەلەكتروندىق ميكروسكوپ ىسكە قوسىلدى

«Quattro S» ماتەريالداردىڭ بەتىن جوعارى دالدىكپەن زەرتتەۋگە مۇمكىندىك بەرەدى. ول ۇلگىنىڭ بەتكى مورفولوگياسىن كورسەتەدى, ميكرو جانە نانوقۇرىلىمىن تالدايدى. بولشەكتەردىڭ ولشەمىن, كەۋەكتىلىگىن, سونداي-اق ماتەريال ىشىندەگى فازالاردىڭ بىرتەكتىلىگىن انىقتاي الادى.

ميكروسكوپ ەنەرگيا-ديسپەرسيالىق رەنتگەندىك سپەكتروسكوپيا (EDX) مودۋلىمەن جابدىقتالعان. بۇل مودۋل ماتەريالدىڭ ەلەمەنتتىك قۇرامىن ءدال ولشەيدى. اتالعان مۇمكىندىك اسىرەسە فۋنكتسيونالدى ماتە­ريالدار – MXene جانە مەتالل-ورگاني­كا­لىق قاڭقالار (MOF) ءۇشىن ماڭىزدى.

MXene قۇرىلىمدارىندا Ti, C, O, F سياقتى ەلەمەنتتەردىڭ اراقاتىناسىن باقىلاۋ قاجەت. ويتكەنى وسى قۇرام ەلەكتروتكىزگىشتىككە, كاتاليتيكالىق بەل­سەن­دىلىككە جانە سوربتسيالىق قاسيەتتەرگە تىكەلەي اسەر ەتەدى. ال MOF ماتەريالدارىندا مەتالل تۇيىندەرى مەن ورگانيكا­لىق ليگاندتاردىڭ تارالۋىن انىقتاۋ ماڭىزدى. بۇل كەۋەك قۇرىلىمىنىڭ تۇراقتىلى­عىن, ادسوربتسيالىق سىيىمدىلىعىن جانە تاڭداۋلى ءسىڭىرۋ قابىلەتىن باعالاۋعا مۇمكىندىك بەرەدى.

SEM–EDX كەشەنى ارقىلى ءتۇرلى ۇلگى زەرتتەلىپ جاتىر. ولاردىڭ قاتارىندا مەتاللۋرگيالىق شيكىزات, كەن مينەرالدارى, مەتالل قورىتپالارى, كومىرتەكتى جانە كرەمني نەگىزدى سوربەنتتەر, سونداي-اق MXene/MOF نەگىزىندەگى كومپوزيتسيالىق ماتەريالدار بار. بۇل زەرتتەۋلەر «قۇرىلىم – قۇ­رام – قاسيەت» بايلانىسىن ناقتى تۇسىن­دى­رۋگە كومەكتەسەدى. ناتيجەلەر ەكولوگيا جانە ەنەرگيا سالاسىنا ارنالعان جاڭا ءتيىمدى ­ماتە­ريالدار ازىرلەۋگە جول اشادى.

نانوولشەمدەگى وبەكتىلەردىڭ قاسيەتىن SEM قۇرالدارىنسىز انىقتاۋ قيىن. ءداستۇرلى وپتيكالىق ميكروسكوپ كوبىنە ميكرون دەڭگەيىندەگى نىسانداردى عانا كورسەتەدى. ال «Quattro S» نانوولشەمدى ماتەريالداردى تەرەڭ تالداۋعا ارنالعان.

«Quattro S» – قۇرىلىم مەن قۇرامدى ءبىر ۋاقىتتا ءدال زەرتتەيتىن اناليتيكالىق كەشەن. ول نانوماتەريالداردان باستاپ تاۋ-كەن جانە مەتاللۋرگيا سالاسىنداعى ۇلگى­لەر­گە دەيىن ءارتۇرلى ماتەريالمەن جۇمىس ىستەۋگە بەيىمدەلگەن. قۇرىلعى زەرتتەۋلەر­دىڭ ساپاسىن ارتتىرادى. الىنعان دەرەكتەر­دىڭ حالىقارالىق عىلىمي ستاندارتتارعا ساي ­بولۋىنا ىقپال ەتەدى.

جاڭا ميكروسكوپتىڭ ىسكە قوسىلۋى ۋني­ۆەرسيتەتتەگى عىلىمي جۇمىستىڭ قارقىنىن كۇشەيتەدى. ماگيسترانتتار مەن دوكتورانتتاردى دايارلاۋ ساپاسىن كوتەرەدى. سونداي-اق ونەركاسىپكە باعىتتالعان قولدانبالى زەرتتەۋلەردى دامىتۋعا جاعداي جاساي­دى. عىلىمي ناتيجەلەردى ناقتى وندىرىستىك شە­شىم­دەرگە ەنگىزۋ مۇمكىندىگىن كەڭەيتەدى.

جالپى, «Quattro S» سكانەرلەۋشى ەلەك­تروندىق ميكروسكوپىنىڭ قولدانىسقا بەرىلۋى ەلىمىزدەگى ماتەريالتانۋ جانە نانوتەحنولوگيا الەۋەتىن نىعايتاتىن ماڭىزدى قادام. بۇل ۇلتتىق عىلىمنىڭ باسەكەگە قابىلەتتىلىگىن ارتتىرۋعا قىزمەت ەتەدى.