«قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىن تاعايىنداۋ تۋرالى» پرەزيدەنت جارلىعى شىققالى بۇكىل ەلىمىز بولەكشە ءبىر ورلەۋ ۇستىندە. بارشا حالىق قازىرگىدەي كۇردەلى كەزەڭنىڭ ەرەكشەلىگىن ەسكەرۋدەن, مەملەكەتتىڭ ەڭسەلى ەرتەڭىن قامداۋدان تۋعان بۇل شەشىمنىڭ ءارى ۋاقتىلى, ءارى ۇتىمدى ەكەنىن ايتىپ تا, جازىپ تا جاتىر. ەل جۇرتشىلىعى, ءبىر جاعىنان, ەلباسىمىزدىڭ قازاقستان حالقى اسسامبلەياسىنىڭ ۇسىنىسىن قولداعان توقتامىنا قۋانۋدا, ەكىنشى جاعىنان, الداعى سايلاۋعا حالىق باعىنا تۋعان پەرزەنتتىڭ – نۇرسۇلتان نازارباەۆتىڭ ءتۇسۋىن قالاعان كوڭىلدەرىن اق ءتىلەكتەر اعىنى رەتىندە اقتارىپ سالۋدا. جان ءجۇرەگىن جارىپ شىققان تىلەگىن ولەڭ ورنەگىمەن ءورىپ تە, قارا سوزبەن تەرىپ تە جەتكىزۋشىلەر بار. سولاردىڭ ءبىرى – بەلگىلى اقىن اۋىت مۇقيبەك. ول پرەزيدەنت جارلىعى باسپاسوزدە جاريالانعان كۇنى-اق جۇرەگىنەن توگىلىپ تۇسكەن «دانا شەشىم» اتتى ولەڭىن «ەگەمەن قازاقستانعا» جولداپ, اقىن جىرى سول كۇنى شىعىپ بارا جاتقان نومىردە (27 اقپان) جەدەعابىل جاريالانعان بولاتىن. ءبىز بۇگىن اۆتوردىڭ ەلباسىمىز نۇرسۇلتان نازارباەۆتىڭ اتىنا جولداعان حاتىن وقىرمان نازارىنا ۇسىنىپ وتىرمىز. بۇل حاتتى تاۋەلسىزدىك جىلدارىندا پرەزيدەنت قامقورلىعىمەن وتانىنا ورالعان جۇزدەگەن مىڭ اعايىنداردىڭ عانا ەمەس, قازاق جەرىنە بەت العان ۇلى كوشتىڭ ۇلعايا ءتۇسۋىن توسىپ, ءسات ساعاتىن كۇتكەن قانداستارىمىزدىڭ دا ورتاق وي-تىلەگى دەپ قاراۋعا بولادى.
اسا مارتەبەلى نۇرسۇلتان ءابىش ۇلى! قازاقستان حالقى اسسامبلەياسى 2015 جىلى كەزەكتەن تىس پرەزيدەنت سايلاۋىن وتكىزۋ تۋرالى ۇسىنىس بىلدىرگەنى بارشاعا بەلگىلى. ءسىز 26 ساۋىردە پرەزيدەنت سايلاۋىن تاعايىنداۋ تۋرالى جارلىق شىعاردىڭىز. قازىر بۇل شەشىمىڭىزدى قوعامنىڭ ءار سالاسى, زيالى قاۋىم وكىلدەرى: «دۇرىس جاسالعان تاڭداۋ!» دەپ جوعارى باعالاپ, جارىسا ءۇن قوسۋدا.
مۇنداي تاريحي, ساياسي ءمانى زور ماسەلەنى, ارينە, اركىم ءوز كوزقاراسى, ءوز مۇددەسى تۇرعىسىنان زەردەلەيدى. ءبىز سەكىلدى شەتتەن كەلگەن جانە كەلۋگە قۇلشىنىپ وتىرعان قانداستارىڭىز ءۇشىن دە بۇل تاڭداۋدىڭ ورنى ءتىپتى بولەك. قازاق كوشى, الىستا جۇرگەن اعايىندى اتاجۇرت قازاقستانعا شاقىرۋ – تاۋەلسىزدىكتىڭ تاڭى جاڭا اتقان سوناۋ العاشقى جىلدارى-اق ءسىز قولعا العان ۇلى باستاما.
مىنە, قازاق ەلى تاۋەلسىزدىكتىڭ 24-ءشى جىلىنا اياق باستى. ءبىز ءسىزدىڭ سول تاۋەلسىزدىكتى جاريالاي سالىپ, جارتى اي وتپەي جاتىپ-اق «قىمباتتى وتانداستار! ەجەلگى اتامەكەنىنەن جىراقتاپ قالعان سىزدەردى كەشەگى كۇنگە دەيىن اتا-بابا جەرىنە قايتىپ كەلە الامىز با دەگەن سۇراقتىڭ الاڭداتىپ كەلگەنىن مەن جاقسى ءبىلەمىن. تۋعان جەردىڭ ءتۇتىنى دە ىستىق دەيدى حالقىمىز. قانداس باۋىرلارىمىزدى بايىرعى اتاقونىسىنا تارتۋ ماقساتىندا ادام پراۆوسى تۋرالى ەلارالىق ەرەجەلەردى باسشىلىققا الا وتىرىپ, قازاقستان ۇكىمەتى «باسقا رەسپۋبليكالاردان جانە شەتەلدەردەن سەلولىق جەرلەردە جۇمىس ىستەۋگە تىلەك ءبىلدىرۋشى بايىرعى ۇلت ادامدارىن قازاقستاندا قونىستاندىرۋ ءتارتىبى مەن شارتتارى تۋرالى» ارنايى قاۋلى قابىلدادى. سوندىقتان اتامەكەنگە كەلەمىن دەۋشى اعايىندارعا جول اشىق. اتا-بابا ارۋاعى الدارىڭىزدان جارىلقاسىن!», – دەپ اعىڭىزدان جارىلعان اق تىلەگىڭىزدى ءومىر بويى اۋزىمىزدان تاستاماي, ايتىپ كەلەمىز. ءار جازعان ماقالامىزعا تۇزدىق ەتۋدەن جاڭىلعان كەزىمىز جوق. كۇن وتكەن سايىن ونىڭ قۇنى ارتا تۇسكەندەي. قازاق كوشىنە كولەڭكە تۇسە باستاسا, بىردەن سونى كوتەرىپ شىعامىز...
ءسىزدىڭ قامقورلىعىڭىز بەن قاجىرلى ەڭبەگىڭىزدىڭ ارقاسىندا 2015 جىلعا دەيىن الىس-جاقىن شەتەلدەن ەلىمىزگە 952 882 ەتنوستىق قازاق ورالىپتى. سول ءبىر قاۋىم ەل بۇل كۇندە جەرگىلىكتى حالىقپەن بىتە قايناسىپ, قۇدا-جەگجات بولىپ, اتاجۇرتتا جارقىن, ازات ءومىر سۇرۋدە.
دەگەنمەن, 2013 جىلعى ءتورت جىلسىز ازاماتتىق بەرىلمەيتىن زاڭنىڭ قابىلدانۋى كوڭىلىمىزگە قاياۋ ءتۇسىرىپ, كوش قارقىنىن تىم باياۋلاتىپ جىبەردى. ءسىز وسىناۋ ساياسي ماسەلەنى بىردەن اڭعارىپ, حالقىڭىزدىڭ باعىنا تۋعان ۇل ەكەنىڭىزدى تاعى ءبىر مارتە دالەلدەدىڭىز. اسقان سۇڭعىلالىق كورسەتتىڭىز! تۋا ءبىتتى كەمەڭگەرلىك بولمىسىڭىزدى ايگىلەپ, ۇلىلىق تانىتتىڭىز! اراعا التى اي سالماي جاتىپ, اتالمىش زاڭ جوباسىنا وزگەرىس ەنگىزۋ تۋرالى تاپسىرما بەردىڭىز. «قانداستارىمىزعا جول اشۋىمىز كەرەك. قازاقتىڭ جەرى كەڭ. ورنالاسامىن دەگەن جەرىن ءوزى تاڭداسىن!», – دەپ, ءبىر-اق كەستىڭىز!
سولتۇستىككە ورنالاسقان جەتى وبلىسقا كەلەتىن اعايىندارعا ەرەكشە قامقورلىق جاساۋ تۋرالى شەشىم قابىلداتتىڭىز! الىستا جۇرگەن قانداستارىڭىزدى اتاجۇرتىنا ورالتۋدى ارمانداپ جۇرگەن ءبىز سەكىلدى ىنىلەرىڭىز بۇل ىزگى نيەتىڭىز بەن ادال جۇرەگىڭىزگە اقسارباس اتاپ, قۇدايدان ءسىزدىڭ تىلەۋىڭىزدى تىلەدىك!
مىنە, سول تاپسىرماڭىزدىڭ ارقاسىندا, «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ كوشى-قونى جانە جۇمىسپەن قامتىلۋى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى زاڭىنىڭ جوباسى قازىر ماجىلىستە تالقىلانۋدا. ءبىز, ءۇش ازامات, قوعامدىق ۇيىم ەسەبىنەن, ماجىلىستە قۇرىلعان جۇمىس توبىنا شاقىرىلىپ, ءوز تاراپىمىزدان ۇسىنىستار بەرۋ مۇمكىندىگىن الدىق. ءسويتىپ, جاس مەملەكەتىمىزدە ءسىز قالىپتاستىرعان دەموكراتيا مەن پارلامەنتاريزمنىڭ يگىلىگىن كورىپ جاتىرمىز. الداعى ۋاقىتتا, وسى زاڭعا ساي, قر ۇكىمەتى 2014 جىلعى 19 اقپاندا شىعارعان №111 قاۋلىداعى ەكى كەدەرگى الىنىپ تاستالسا, الىستان كەلەتىن اعايىنعا داڭعىل جول اشىلماق. دۇنيەجۇزى قازاقتارى قاۋىمداستىعىنىڭ 2002 جىلى تۇركىستان قالاسىندا وتكەن ەكىنشى قۇرىلتايىندا ءسىزدىڭ ءبىر جارىم ساعات سويلەگەن جان تەبىرەنتەرلىك ءسوزىڭىز جازىلعان ۆيدەونى شاڭ باسقان ارحيۆتەن تاۋىپ, قايتا-قايتا جاڭعىرتۋىمىزدىڭ, ەل ەسىنە سالۋىمىزدىڭ دا باستى سەبەبى – سول سىزگە دەگەن تىلەۋلەستىكتىڭ بەلگىسى.
كورىپ وتىرمىز, حالىقتىڭ سىزگە دەگەن ىقىلاسىندا, سەنىمىندە شەك جوق. شەشەندەرىمىز بۇل جولى دا سىزگە تەڭ كەلەر, سىزبەن ورىن تالاستىرار ەشكىم جوق دەپ جار سالىپ جاتىر. سولاي! ءشۇبامىز جوق!
ءتىلىم تاسقا, ساياساتشى, كوشباسشى رەتىندەگى ءسىزدىڭ ورنىڭىزدىڭ تىم بيىكتە, الەمدىك دەڭگەيدە ەكەنى يادرولىق قارۋدان باس تارتىپ, تاۋەلسىزدىگىمىز بەن تۇراقتىلىعىمىزعا الپاۋىت بەس مەملەكەتتىڭ كەپىلدىگىن الۋىڭىزدان-اق مويىندالعان. ودان بەرگى استانانىڭ ارقا توسىنە كوشىرىلۋى, شىتتاي جاڭا, ادەمى قالانىڭ بوي كوتەرۋى, شەكارامىزدىڭ تولىعىمەن الەمدىك تالاپقا ساي بەكەمدەلۋى, قازاقستان حالقى اسسامبلەياسىنىڭ قۇرىلىپ, ۇلتارالىق قاتىناستىڭ ساقتالۋى, ۇلى جىبەك جولىنىڭ قايتا جاڭعىرتىلىپ, «باتىس ەۋروپا – باتىس قىتاي» الىپ ماگيسترالىنىڭ سالىنۋى دەگەندەرىڭىز, قۇداي-اۋ, عاسىردا عانا ەڭسەرىلەتىن شارۋالار عوي! ءسىز سونىڭ بارىنە اسقان جۇرەكتىلىكپەن شەشىم قابىلدادىڭىز جانە ابىرويمەن اتقارىپ شىقتىڭىز! ريزامىز سىزگە, نۇراعا!
ال تمد-داعى تىنىشتىقتى ساقتاۋ, ۋكرايناداعى شيەلەنىستى شەشۋ ىسىندە ءسىزدىڭ ءرولىڭىزدىڭ زور ەكەنىنە تورتكۇل دۇنيەنىڭ كوزى ابدەن جەتتى. تۇلعالىق بولمىسىڭىز ءتىپتى اسقاقتاي ءتۇستى. ءبىز تەك كوزىمىزدى تارس جۇمىپ الىپ, ءبىر قۇدايعا, سوسىن وزىڭىزگە سەندىك تە وتىردىق.
مىنە, تاعى سىزگە بار ءۇمىتىمىزدى ارتىپ, الداعى سايلاۋعا ءتۇسۋىڭىزدى ءوتىنىپ وتىرمىن. وعان سەبەپ, جوعارىداعى ەڭسەرىلگەن ۇلى ەڭبەكتەرىڭىزدەن تىس, باستالعان, بىراق ءالى كومبەسىنە جەتىپ ۇلگەرمەگەن, ۋاقىت كۇتىپ تۇرعان جوبالارىڭىزدىڭ ءالى دە كوپ ەكەندىگى. اتاپ ايتار بولساق, «قازاقستان حالقىنىڭ سانىن 2020 جىلعا قاراي 20 ميلليونعا جەتكىزەمىز!» دەگەن كەرەمەت ۇندەۋىڭىز بار.
قازاق كوشى, مىنە, ءتىل-كوزدەن ايىعىپ, قايتا جاڭعىرۋ الدىندا تۇر.
ءسىزدىڭ تىكەلەي باستاماڭىزبەن قۇرىلعان ەۋرازيالىق ەكونوميكالىق وداق جۇمىسىن جاڭا باستادى.
باتىس سالعان سانكتسيالاردان باس كوتەرە الماي قالعان رەسەيدىڭ ءبىزدىڭ ەكونوميكامىزعا اسەرى ايقىن كورىنە باستاعانىن ايتىپ, وعان توتەپ بەرۋ جولدارىن نۇسقاپ جاتىرسىز.
ءسوز رەتى كەلگەندە ايتا كەتەيىن, ەاەو-نىڭ ەل ايتىپ جۇرگەن قاۋىپتىلىگىنەن گورى, تاۋەلسىزدىگىمىزگە تونەتىن قاۋىپ-قاتەرلەرگە توتەپ بەرۋگە جول اشاتىن ۇتىمدى ءتاسىل ەكەنىنە ءوز باسىم انىق كوز جەتكىزدىم. ەندىگى جەردە ىشكى قۋاتىمىزدى كۇشەيتۋدىڭ كەزەك كۇتتىرمەس شارۋاسى تۇر.
حالقىڭىز ءسىزدىڭ وسى ۇلى جوسپارلارىڭىزدى ويداعىداي ورىنداپ شىعۋىڭىزعا مۇمكىندىك بەرۋدە, نۇراعا. سونىمەن بىرگە, ەاەو-عا بايلانىستى تىعىرىقتان الىپ شىعۋدىڭ دا نىق سەنىمى تاعى سىزگە جۇكتەلىپ وتىر. ونىڭ ار جاعىندا ەكسپو-2017 جانە بار.
تاۋەلسىزدىكتىڭ ءتول تۋمالارى جەتىلىپ كەلەدى. بۇلار – بوداندىققا ساناسى ۋلانباعان, وتارشىلىققا جۇرەگى شايىلماعان ناعىز ءجاۋجۇرەكتەر. ەڭ باستىسى, تىزگىنىن ءسىز ۇستاپ, ءوز قولىڭىزبەن قۇرعان جاڭا, تاۋەلسىز قازاقستاننىڭ كەۋدەسى اسقاق, رۋحى بيىك, مۇراتى ايقىن ۇل-قىزدارى. ولار جاتقا جالتاقتاۋدى بىلمەيدى! عاجابى – سول, ءسىز جولعا قويعان «بولاشاق» باعدارلاماسى ارقىلى الەمنىڭ بارلىق ەلىنەن ءبىلىم مەن عىلىمنىڭ ءنارىن جۇتقان, تاجىريبەدەن وتكەن ۇرپاق. ودان دا ماڭىزدىسى, ولاردىڭ بويىندا سىزدەن دارىعان وتانسۇيگىشتىك پەن قاجىرلى رۋح مول! كەزەگى كەلگەندە, مەملەكەتتىك قىزمەتتىڭ قاندايىن بولسا دا, شەتىنەن دوڭگەلەتىپ اكەتەدى.
ەلدىڭ ەسىندە بولسا, قازاقتىڭ كورنەكتى جازۋشىسى قابدەش جۇمادىلوۆ 1993 جىلى جازعان «بولاشاقتى بولجاعاندا» اتتى ماقالاسىندا «كونە تاريحقا كوز جىبەرسەك, حالقىمىزدىڭ وسىنداي ءداۋىرلەگەن, باسىنا باق قونعان كەزدەرى از بولماعان. سونداي جالاۋلى زامانداردان كەيىنگى ۇرپاققا: «قاسىم سالعان قاسقا جول», «ەسىم سالعان ەسكى جول» دەگەن ەسكەرتكىشتەر قالىپتى. ءسوز جوق, ءبىزدىڭ حالقىمىز قازىر دە سونداي جاڭعىرۋ كەزەڭىندە تۇر. ەگەر پرەزيدەنت نازارباەۆ وسىنداي قيىن وتكەلدەن سۇرىنبەي ءوتىپ, «قازاقستان» اتتى كەمەنى قاقپا تاستاردىڭ ەشقايسىسىنا سوقتىرماي, امان الىپ شىعار بولسا, ول تاڭداعان تاۋەلسىزدىك جولى دا بولاشاقتا «نۇرسۇلتان سالعان نۇرلى جول» اتالارىنا كۇمان جوق! ءيلايىم, سولاي بولعاي! «كەمەدەگىنىڭ جانى ءبىر» دەگەندەي, سول جولدىڭ نۇرلى دا باياندى بولۋىنا ازاتتىق تاڭىن قاتار تۇرىپ قارسى العان ءبارىمىز دە مۇددەلىمىز», دەگەن ەدى.
قۇدايعا شۇكىر, قازاقستانىڭىزدى بۇگىنگە دەيىن قاناتتىعا قاقتىرماي, تۇمسىقتىعا شوقىتتىرماي امان الىپ كەلدىڭىز. ءبىز قازىر سول «نۇرسۇلتان سالعان نۇرلى جولعا» ەسەن-ساۋ ىلىندىك. الداعى كۇندەرگە اپاراتىن جوبا-جوسپار تاس-ءتۇيىن جاساۋلى! ءبىزدى ءالى دە ءبىراز بيىك بەلەسكە ءوزىڭىز باستاپ بارۋىڭىز كەرەك!
مەن ساياساتكەر ەمەسپىن. بۇل – مەنىڭ اقىندىق تۇيسىكپەن قابىلداعان اسەرىم, اقجارما جۇرەكپەن ايتقان اپپاق تىلەگىم!
الىستا جۇرگەن اعايىننىڭ سىزگە, ءسىزدىڭ جۇرگىزىپ وتىرعان دانا ساياساتىڭىزعا دەگەن قۇرمەتى بولەك. ولار قانداي قيىن-قىستاۋ جاعدايدى باسىنان وتكەرىپ جۇرسە دە, ءوزىڭىز ايتقانداي, حالقىمىزدىڭ اسىل قازىناسى – ءتول مادەنيەتىن جوعالتپاۋعا, ءتىلىن, ءدىنىن ساقتاۋعا بارىن سالىپ كەلەدى. قۇدايعا تاۋبە, قازىرگە دەيىن وزدەرى تۇرعان ەلدەردە ۇلتارالىق قاتىناس پەن قوعامدىق تىنىشتىقتى قاتاڭ ساقتاعاندارىنىڭ ارقاسىندا, قازاقستاننىڭ, ونى باسقارىپ وتىرعان ءسىزدىڭ بەدەلىڭىزگە زارەدەي نۇقسان كەلتىرگەن ەمەس.
مىنە, قازاق حاندىعىنىڭ 550 جىلدىعى تويلانادى دەگەن اقجولتاي شەشىمدى ەستىپ, قىتاي حالىق رەسپۋبليكاسىنان 2014 جىلدىڭ قىركۇيەگىندە ماناعى ءسىز قايتا جاڭعىرتقان ۇلى جىبەك جولىن بويلاپ, تاراز قالاسىن بەتكە الىپ مادەنيەت كەرۋەنى جولعا شىعىپتى. كەرۋەندە 136 تۇيە, 10 ات اربا, 25 اۆتوكولىك جانە جۇزدەن اسا كەرۋەنشى بار كورىنەدى.
25 اقپان كۇنى الماتىدا «جەبەۋ» رەسپۋبليكالىق قوعامدىق بىرلەستىگى ارنايى ءباسپاسوز ءماسليحاتىن وتكىزىپ, قازاقستان حالقى اسسامبلەياسىنىڭ 2015 جىلى كەزەكتەن تىس پرەزيدەنتتىك سايلاۋ وتكىزۋ تۋرالى جاساعان ۇسىنىسىن ءبىر اۋىزدان قولدايتىندىقتارىن ءبىلدىردى. بۇكىل ورالمان قاۋىمنىڭ سىزگە دەگەن ىقىلاسىن, تىلەگىن جەتكىزدى. بۇل – اتاجۇرتقا ەرتەرەك كەلگەن قانداس باۋىرلارىڭىز وزدەرى قۇرعان زاڭدى ۇيىم. بۇل دا بولسا, سىزگە دەگەن زور قۇرمەتتىڭ, ساعىنىشتىڭ, سەنىمنىڭ بەلگىسى دەر ەدىم! مەن ءوزىم دە شەتتەن كەلگەن قانداستارىڭىزدىڭ وكىلى رەتىندە دە, اقىن رەتىندە دە, قازاق كوشىنىڭ جاناشىرى تۇرعىسىنان دا بۇل ۇسىنىستى قۋانا-قۋانا قوستادىم.
نەگىزى, بۇل ۇسىنىستى اسسامبلەيادان بۇرىن ءبىز – شەتتەن كەلگەن قانداستارىڭىز جاسايتىن ءجونىمىز بار ەدى. ءبىزدىڭ وتانىمىزعا ورالۋىمىزعا سىڭىرگەن ۇشان-تەڭىز ەڭبەگىڭىزدى ءبىر اقتاۋىمىز كەرەك-ءتى. امال نە, اناتولي افاناسەۆيچ باشماكوۆ مىرزا الدىمىزدى وراپ كەتتى. مەن, شىنىمدى ايتسام, كادىمگىدەي قىزعانىپ قالدىم ءسىزدى, نۇراعا!
كەيدە بىرەۋلەر قازاق كوشىنە كەدەرگى جاساپ, ءسىز بەن ءبىزدىڭ ارامىزعا وت جاققىسى كەلەتىن كورىنەدى. سەنبەڭىز! الەمدەگى قازاقتىڭ ەكى دۇنيەدەگى جالعىز وتانى – قازاقستان تۇرسا; ءسىز بىزگە تەڭدەسى جوق قامقورلىق جاساپ, شاقىرىپ جاتساڭىز, مۇندا كەلگەن اعايىندارىڭىزدىڭ قالاي سىزگە قارسى كەلۋگە ءداتى بارادى؟! قۇداي ۇرماي ما توبەمىزدەن تارس ەتكىزىپ!!! ءبىز بوستاندىقتىڭ نارقىن وتە جاقسى بىلەمىز! ءبىز سىزبەن ماڭگى بىرگەمىز, نۇرسۇلتان ءابىش ۇلى!
سايلاۋعا كانديداتۋراڭىزدى ۇسىنعان حالىق تىلەگىنە كەلىسىم بەرىڭىز! قۇدايعا شۇكىر, الداعى ۋاقىتتا قانداستارىڭىز ءسىزدى قولدايدى. شەتتەن كەلىپ, قازاقستان ازاماتى اتانعان, ون سەگىز جاسقا تولعان قانشا قانداسىڭىز سايلاۋعا قاتىناسسا, سونىڭ 99,99 پايىزىنىڭ داۋىسى سىزدىكى دەپ سەنە بەرىڭىز!
مەن قانداس اعايىنداردى سىزگە داۋىس بەرۋگە ۇندەۋگە, جاقسىلىقتىڭ جارشىسى بولىپ, بەلسەندى قىزمەت اتقارۋعا قازىردەن باستاپ ءازىر ەكەنىمدى بىلدىرگىم كەلەدى!
ءارى ءسىزدىڭ جەڭىسكە جەتەتىنىڭىزگە كامىل سەنەمىز!
اللا ءسىزدى جامبىل اتاڭىزدىڭ جاسىنا جەتكىزسىن!
جاراتقان يەم ءسىز ءوز قولىڭىزبەن نەگىزىن قالاعان تاۋەلسىز قازاق ەلىندە الەمدەگى بار قازاقتىڭ باسىن قوسۋعا ءناسىپ ەتسىن!!!
ىزگى نيەت, زور قۇرمەتپەن,
اقىن
اۋىت مۇقيبەك.