مەملەكەت باسشىسى نۇرسۇلتان نازارباەۆ «قازاتومونەركاسىپ» ۇاك» اق باسقارما توراعاسى نۇرلان قاپپاروۆتى قابىلدادى, دەپ حابارلادى پرەزيدەنتتىڭ ءباسپاسوز قىزمەتى.
ن.قاپپاروۆ مەملەكەت باسشىسىنا كومپانيانىڭ ترانسفورماتسيا باعدارلاماسى اياسىندا جۇرگىزىپ جاتقان جۇمىسى تۋرالى باياندادى, سونداي-اق, ونىڭ جاڭارتىلعان دامۋ ستراتەگياسىن تانىستىردى.
قازاقستان پرەزيدەنتى ۋران ونەركاسىبى ەلىمىزدەگى نەگىزگى سالالاردىڭ ءبىرى ەكەنىنە جانە الەمدىك نارىقتا ەلەۋلى ورىنعا يە بولىپ وتىرعانىنا توقتالدى.
بۇل رەتتە نۇرسۇلتان نازارباەۆ ۋران ءوندىرىسىن ءتيىمدى باقىلاۋدى قامتاماسىز ەتۋ قاجەتتىگىنە, شەتەلدىك جەتەكشى كومپانيالارمەن ءوزارا ءتيىمدى ىنتىماقتاستىق ورناتۋدىڭ جانە بىرلەسكەن جوبالاردى جۇزەگە اسىرۋدىڭ ماڭىزدىلىعىنا نازار اۋداردى.
ن.قاپپاروۆ قازىرگى كەزدە قازاقستان جالپى الەمدىك كولەمدەگى ۋران ءوندىرىسىنىڭ 40 پايىزىن قامتاماسىز ەتىپ وتىرعانىن ايتتى. كومپانيانىڭ الدىندا تۇرعان نەگىزگى مىندەتتەردىڭ ءبىرى يادرولىق وتىن جەتكىزۋ سالاسىنداعى كوشباسشىلاردىڭ بىرىنە اينالۋ بولىپ وتىر.
«قازاتومونەركاسىپ» ۇاك» اق باسقارما توراعاسى كومپانيانىڭ جاڭارتىلعان دامۋ ستراتەگياسى حالىقارالىق كونسۋلتانتتاردىڭ اتسالىسۋىمەن ازىرلەنگەنىن, ينۆەستيتسيالىق جانە وپەراتسيالىق قىزمەتتىڭ تيىمدىلىگىن, سونداي-اق, ەڭبەك ونىمدىلىگىن ارتتىرۋدى كوزدەيتىنىن اتاپ ءوتتى.
كەزدەسۋ قورىتىندىسى بويىنشا مەملەكەت باسشىسى بىرقاتار ناقتى تاپسىرما بەردى.