استانا. 17 مامىر. كەشە استانادا رەجيسسەر دوسحان جولجاقسىنوۆ تۇسىرگەن «قۇنانباي» تولىقمەتراجدى كوركەم ءفيلمنىڭ تۇساۋكەسەرى بولىپ ءوتتى. بۇل تۋرالى Baq.kz حابارلادى.
ءفيلمنىڭ سيۋجەتى ابايدىڭ اكەسى, اتاقتى دالا كەمەڭگەرى قۇنانباي وسكەنباي ۇلىنىڭ ونەگەلى ءومىرىنىڭ ءبىر كەزەڭىنەن سىر شەرتەدى.
تاريحتان بەلگىلى, قۇنانبايعا ەل بيلەۋ ءىسى, ودان قالدى, اعايىن اراسىنداعى شيەلىنىستەر مەن رۋارالىق داۋ-دامايلاردى شەشۋ وڭايعا تۇسكەن جوق. سونداي ساتتەردە ول قاشاندا ادىلدىكەە جۇگىنگەن. قۇنانباي ءوز حالقىنىڭ جاناشىر پەرزەنتى رەتىندە قالىڭ بۇقارا الدىنداعى قارىزى مەن پارىزىن تەرەڭ تۇسىنگەن. فيلمدە ونىڭ كورەگەندىگى, دانىشپاندىعى, ادىلدىگى, ءداستۇردى قۇرمەتتەيتىنى ايقىن كورسەتىلەدى.
رەجيسسەر كارتينادا قۇنانبايدىڭ تەك جەكە باسى عانا ەمەس, سونىمەن قاتار, XIXعاسىرداعى قازاق قوعامىنىڭ شىنايى كەلبەتىن كورسەتۋگە ۇمتىلىپتى.
«بۇل تىڭ شەشىمدەرگە تولى تۋىندىدا قازاقتىڭ وتكەن ەسكى ءومىرىن دە كورۋگە بولادى. لەنتادا جالپى قۇنانبايدىڭ وزگە دە قىرلارىن اشقىمىز كەلدى. قۇنانباي – اسا كۇردەلى تۇلعا, بيلىك تىزگىنىن ۇستاعان كەزىندەگى قايراتكەرلىگى قاراما-قايشىلىقتارعا تولى. ول بي, بولىس, اعا سۇلتان بولىپ بيلىكتىڭ ءۇش تۇتقاسىن قاتار ۇستاپ, شاريات جولىنا تۋرا كوزقاراسپەن قاراعان ۇلى ادام. قۇنەكەڭنىڭ وسىنداي ەرەكشە قىرلارىن ءبىر فيلمگە سىيدىرۋعا تىرىستىق», - دەدى رەجيسسەر.
فيلم اباي اۋدانى, قاراۋىل اۋىلىندا تۇسىرىلگەن. ءتۇسىرىلىم جۇمىستارى 1 اي 18 كۇندە اتقارىلعان. دايىندىققا تۋرا بەس جىلداي ۋاقىت جۇمسالعان.
«كينونى حاديشا بوكەەۆا اپامىزدان, كەشە دۇنيەدەن وزعان اشىربەك سىعاي اعامىزدان ءدارىس العان مەنىڭ ۇزەڭگىلەس دوستارىمنىڭ باسىن قوسىپ ءتۇسىردىم. ءتۇسىرىلىم بارىسىندا بەس جۇزدەي كيىز ءۇي تىكتىك. ءتىپتى, قارا داۋىل سوعىپ, 200-گە جۋىق كيىز ءۇيدى جەل كوتەرىپ كەتكەن كەزدەر دە بولدى. تاماشالاعان كورەرمەن قاۋىمنىڭ قازاقتىڭ ەسكى ومىرىنە ساياحاتتاپ قايتقانداي اسەر الاتىنىنا سەنىمىم مول», - دەدى د.جولجاقسىنوۆ.
كوركەم ءفيلمنىڭ ستسەناريىن دوسحان جولجاقسىنوۆپەن بىرگە تاياۋدا عانا ومىردەن كەتكەن جازۋشى تالاسبەك اسەمقۇلوۆ جازعان. ال مۋزىكا اۆتورى - بەلگىلى كومپوزيتور تولەگەن مۇحامەدجانوۆ.
فيلمگە ەلىمىزگە تانىمال اكتەرلارمەن بىرگە سەمەيدەگى اباي اتىنداعى جانە دوستوەۆسكي اتىنداعى تەاترلاردىڭ اكتەرلارى دا تارتىلعان.
ايتا كەتەيىك, فيلم جالپىۇلتتىق پروكاتقا 25 مامىردان باستاپ شىعادى.
قايرات ق ۇلىمبەت.
دەرەك, سۋرەت: Baq.kz.