كەشە اقوردادا مەملەكەتتىك حاتشى گۇلشارا ابدىقالىقوۆا 2015-2016 جاڭا وقۋ جىلىنىڭ قارساڭىندا ەلىمىزدىڭ ءبىلىم بەرۋ جۇيەسىنىڭ ءبىر توپ ۇزدىك قىزمەتكەرلەرىمەن كەزدەستى. ولاردىڭ اراسىندا اۋىل مۇعالىمدەرى, جاڭاشىل پەداگوگتار, پەداگوگيكالىق جانە عىلىمي مەكەمەلەر جەتەكشىلەرى بار. كەزدەسۋگە ءبىلىم جانە عىلىم ءمينيسترى ا.ءسارىنجىپوۆ قاتىستى.
ءوزىنىڭ كىرىسپە سوزىندە گۇلشارا ءابدىقالىقوۆا ەلباسى ن.نازارباەۆتىڭ: «باسەكەگە قابىلەتتى دامىعان مەملەكەت بولۋ ءۇشىن ءبىز ساۋاتتىلىعى جوعارى ەلگە اينالۋىمىز كەرەك», دەگەن ءسوزىن قاتىسۋشىلاردىڭ نازارىنا سالدى. ودان ءارى «100 ناقتى قادام» ۇلت جوسپارىنىڭ اياسىنداعى ءبىلىم جۇيەسىن جاڭعىرتۋدىڭ بۇگىنگى كەزەڭدەگى باستى ايىرماشىلىعى – ەكونوميكالىق ىنتىماقتاستىق جانە دامۋ ۇيىمى ەلدەرىنىڭ ستاندارتتارى نەگىزىندە ادامي كاپيتالدىڭ ساپاسىن كوتەرۋگە ماڭىز بەرۋ ەكەنىن اتاپ ءوتتى.
بيىلعى جىلى ءبىلىم بەرۋدىڭ 2011-2020 جىلدارعا ارنالعان مەملەكەتتىك باعدارلاماسى ءبىرىنشى كەزەڭىنىڭ ىسكە اسىرىلۋى اياقتالادى. وسى ۋاقىت ىشىندە باستاۋىش ءبىلىم بەرۋدىڭ جالپىعا مىندەتتى مەملەكەتتىك ستاندارتى قابىلداندى, مەكتەپكە دەيىنگى جالپى ورتا ءبىلىم بەرۋ ستاندارتتارىنىڭ جوبالارى ازىرلەندى, پەداگوگيكالىق كادرلاردىڭ بىلىكتىلىگىن ارتتىرۋدىڭ تۇبەگەيلى جاڭا جۇيەسى قۇرىلدى.
مەكتەپكە دەيىنگى ءبىلىم بەرۋ جۇيەسى تابىستى دامىدى, قازىرگى ۋاقىتتا ەلىمىزدە 8780 مەكتەپكە دەيىنگى مەكەمە جۇمىس ىستەيدى, ول 3-6 جاس ارالىعىنداعى سابيلەردىڭ 78,6 پايىزىن قامتيدى. ەلىمىزدىڭ بارلىق وڭىرلەرىندە بالالاردى وقىتۋدىڭ جانە تاربيە بەرۋدىڭ يننوۆاتسيالىق تاسىلدەرىن تابىستى ەنگىزىپ كەلە جاتقان 19 نازارباەۆ زياتكەرلىك مەكتەبى قۇرىلىپ, جۇمىس ىستەۋدە.
جالپى جانە كاسىپتىك تەحنيكالىق ءبىلىم بەرۋ جۇيەسىندە دۋالدى وقىتۋدىڭ جاڭا تەحنولوگيالارى ەنگىزىلۋدە. «100 ناقتى قادامدى» ىسكە اسىرۋ اياسىندا ەكونوميكانىڭ 6 جەتەكشى سالاسىنا بىلىكتى كادرلار دايارلاۋ ءۇشىن 10 كوللەدج بەلگىلەندى. رەسپۋبليكادا 125 جوعارى وقۋ ورنى جۇمىس ىستەيدى, سونىڭ 29-ى جوعارى جانە جوعارى وقۋ ورنىنان كەيىن ءبىلىم بەرۋدىڭ 252 ماماندىعى بويىنشا حالىقارالىق مامانداندىرىلعان اككرەديتاتسيادان ءوتتى. جينالعاندارعا مەملەكەتتىك حاتشى وسى جانە باسقا دا دەرەكتەردى ايتتى جانە ءوزى دە قاتىسۋشىلاردىڭ كوكەيكەستى ماسەلەلەرىن تىڭدادى.
سونىڭ ىشىندە مەملەكەت باسشىسى ۇسىنعان بەس ينستيتۋتتىق رەفورمانىڭ اياسىنداعى, سونداي-اق, پەداگوگتاردىڭ مارتەبەسىن كوتەرۋ, اۋىل مەكتەپتەرىنىڭ, تەحنيكالىق ءبىلىم بەرۋ مەكەمەلەرىنىڭ, عىلىمي جانە پەداگوگيكالىق ۇيىمداردىڭ جۇمىستارىنا بايلانىستى وزەكتى ماسەلەلەرى تالقىلاندى. ماسەلەن, سولتۇستىك قازاقستان وبلىسىنداعى ايىرتاۋ اۋدانى يمانتاۋ ورتا مەكتەبىنىڭ قازاق ءتىلى مەن ادەبيەتىنىڭ مۇعالىمى دوسجان نۇرسەيىتوۆ گۇلشارا ءابدىقالىقوۆاعا قازاق ءتىلىن جەدەلدەتىپ وقىتۋ ادىستەمەسىن تانىستىردى.
«مەن بۇگىن ءوز جوبامدى تانىستىردىم. ول قازاق ءتىلىن جەدەلدەتىپ وقىتۋ دەپ اتالادى. بۇل رەسەيلىك عالىم د.پەتروۆتىڭ ءادىستەمەسىنىڭ جانە اعىلشىن ءتىلىن ۇيرەتۋ ءادىستەمەلەرىنىڭ قازاق تىلىنە يكەمدەلگەن, ىقشامدالعان كوشىرمەسى. ونى قازىرگى تەحنيكالىق قۇرالداردىڭ كومەگىمەن عالامتورعا جاريالاۋ ارقىلى قازاق ءتىلىن ۇيرەنەمىن دەگەن قازاقستاندىقتار مەن شەتەلدىك ازاماتتاردىڭ نازارىنا ۇسىندىق. قازىرگى ۋاقىتتا سۇرانىسى جوعارى بولىپ تۇر», – دەدى ول كەزدەسۋ سوڭىنان باق وكىلدەرىنە.
تالقىلاۋ ناتيجەسى بويىنشا مەملەكەتتىك حاتشى قۇزىرلى مەملەكەتتىك ورگاندارعا بىرقاتار ناقتى تاپسىرمالار بەردى. كەزدەسۋ سوڭىندا گ.ابدىقالىقوۆا جەر بەتىندەگى ەڭ ىزگى ماماندىقتىڭ وكىلدەرى – پەداگوگتاردى الداعى جاڭا وقۋ جىلىنىڭ باستالۋىمەن قۇتتىقتاپ, ولارعا زور دەنساۋلىق, شىعارماشىلىق تابىس, باقىت پەن يگىلىك تىلەدى.
كەزدەسۋگە قاراعاندى وبلىسىنداعى اقتوعاي اۋدانىنىڭ شاشۋباي كەنتىندەگى تىرەك مەكتەبىنىڭ ديرەكتورى ا.توكباەۆا, سەمەيدەگى نازارباەۆ زياتكەرلىك مەكتەبىنىڭ مۇعالىمى م.مىڭباەۆا, الماتىداعى و.جاۋتىكوۆ اتىنداعى فيزيكا-ماتەماتيكا مەكتەبىنىڭ وقىتۋشىسى ا.سلوبوديانيۋك, شىمكەنتتەگى مۇعالىمدەر ءبىلىمىن جەتىلدىرۋ ينستيتۋتىنىڭ جاتتىقتىرۋشىسى م.شويمانوۆا جانە ت.ب قاتىستى.
جاقسىباي سامرات,
«ەگەمەن قازاقستان».