استانا. 3 ناۋرىز. قۇرلىقتىق حوككەي ليگاسىنىڭ پلەي-وفف كەزەڭىندە «بارىس» ءوز ايدىنىندا ومبىلىق «اۆانگاردتى» 3:0 ەسەبىمەن جەڭدى. وسىلايشا, قوس كوماندا اراسىنداعى جالپى ەسەپتە استانالىقتار 2:1 ەسەبىمەن العا شىقتى. بۇل تۋرالى egemen.kz حابارلادى.
ويىننىڭ 5-مينۋتىندا «اۆانگارد» ساپىنان نيكولاي گلۋحوۆ كىشى ايىپپەن جازالانىپ, «بارىس» ويىنشى باسىمدىعىنا يە بولدى. وزدەرىنە بەرىلگەن مۇمكىندىكتى ءمۇلت جىبەرمەگەن ايدىن يەلەرى 7-مينۋتتا ەسەپ اشىپ, جەرگىلىكتى جانكۇيەرلەردىڭ العىسىنا بولەندى. شايبا گلۋحوۆتىڭ ايدىنعا شىعۋىنا نەبارى 4 سەكۋند قالعان كەزدە سوعىلعانىن ايتا كەتەيىك. مەرگەندىگىمەن كوزگە تۇسكەن كونستانتين رۋدەنكو.
ەكىنشى كەزەڭدى «بارىس» حوككەيشىلەرى ايقىن باسىمدىقپەن وتكىزدى. ءتىپتى كەزەڭنىڭ العاشقى جارتىسىندا قوناقتار ءبىزدىڭ ايماققا مۇلدەم بەتتەي المادى دەسەك تە بولادى. تارتىستىڭ 29-مينۋتىندا نايدجەل دوۋس ەسەپتى ەسەلەپ, «بارىس» 2 شايبا باسىمدىعىنا يە بولدى. ومبىلىقتار تەك شەشۋشى كەزەڭدە عانا جۇيەلى شابۋىل ۇيىمداستىرا ءبىلدى. دەگەنمەن, قورعانىستا وتە ساۋاتتى ويناعان اندرەي نازاروۆتىڭ شاكىرتتەرى قارسىلاستارىنا ەسەپتى قىسقارتۋعا مۇمكىندىك بەرمەدى. ەسەسىنە 56-مينۋتتا «بارىس» ساپىنان داستين بويد ەسەپتى 3:0-گە جەتكىزىپ, ويىنداعى سوڭعى شايبانىڭ اۆتورى اتاندى. وسىلايشا, يان لاتسو ەكىنشى ويىن قاتارىنان قاقپاسىنا شايبا جىبەرگەن جوق. بۇگىنگى ويىن بارىسىندا لاتسو 41 سوققىنى قايتارعانىن ايتا كەتەيىك.
قوس كوماندا اراسىنداعى ايقاس ەرتەڭ, ياعني, 4 ناۋرىز كۇنى جالعاسىن تابادى. استاناداعى «قازاقستان» سپورت سارايىندا وتەتىن ويىن كەشكى ساعات 19:30-دا باستالادى.
ەلامان قوڭىر.
دەرەك: egemen.kz.
سۋرەت: hcbarys.kz.