مەملەكەت باسشىسى نۇرسۇلتان نازارباەۆ بارشا قازاقستاندىقتاردى قازاقستان حالقى اسسامبلەياسىنىڭ 20 جىلدىعىمەن قۇتتىقتادى, دەپ حابارلادى پرەزيدەنتتىڭ ءباسپاسوز قىزمەتى. قۇتتىقتاۋدا بىلاي دەلىنگەن:
قۇرمەتتى قازاقستاندىقتار!
بارشاڭىزدى قازاقستان حالقى اسسامبلەياسىنىڭ 20 جىلدىعىمەن شىن جۇرەكتەن قۇتتىقتايمىن.
قازاقستان حالقى اسسامبلەياسى – بەيبىتشىلىك پەن كەلىسىمنىڭ, قاسيەتتى وتانىمىزدا ءومىر ءسۇرىپ جاتقان بارلىق ەتنوستار دوستىعىنىڭ ەڭ باستى جانە بەرىك ىرگەتاسى. ول ەلدىگىمىزدىڭ قالىپتاسۋ, تاۋەلسىزدىگىمىزدىڭ نىعايۋ تاريحىندا, قازاقستان رەسپۋبليكاسىنىڭ كونستيتۋتسياسىن جالپى حالىق بولىپ قابىلداۋدا, تەرەڭ ەكونوميكالىق رەفورمالار جۇرگىزۋدە جانە قوعامىمىزدىڭ الەۋمەتتىك جانە ساياسي نەگىزىن اۋقىمدى جاڭعىرتۋدا ايرىقشا ءرول اتقاردى.
قازاقستان حالقى اسسامبلەياسى ءبىزدىڭ كوپۇلتتى حالقىمىزدىڭ بىرلىگىن ساقتايتىن ماڭگىلىك قورعانىنا اينالدى. ول بىرلىك, تۇراقتىلىق, تولەرانتتىق, جالپىعا ورتاق ەڭبەك, پاتريوتيزم سياقتى ورتاق قۇندىلىقتارىمىزدى قازاقستاندىقتاردىڭ ساناسىنا سىڭىرۋدە.
ءوزىنىڭ كۇندەلىكتى, تىنىمسىز جۇمىسى ارقىلى ول ەل ازاماتتارىنىڭ جۇرەگىنە ماڭگىلىك ەلىمىزگە جانە قازاقستان اتتى تەڭدەسسىز دە تاتۋ وتباسىنىڭ مۇشەسى ەكەنىنە دەگەن ماقتانىش سەزىمى مەن جوعارى جاۋاپكەرشىلىگىن ۇيالاتادى.
بۇگىندە قازاقستان حالقى اسسامبلەياسى ەلىمىزدىڭ «قازاقستان-2050» ستراتەگياسىن, «نۇرلى جول» جاڭا ەكونوميكالىق ساياساتىن جۇزەگە اسىرۋ جولىنداعى جاسامپازدىق ەڭبەگىنىڭ باسىندا ءجۇر, ول قازاقستاندىقتاردى ورتاق وتانىمىزدىڭ باياندى بۇگىنى مەن ۇلى بولاشاعى جولىندا بىرىكتىرە تۇسۋدە.
قازاقستان حالقى اسسامبلەياسىنا جانە بارشا قازاقستاندىقتارعا بەيبىتشىلىك پەن كەلىسىمنىڭ تۋىن بيىك ۇستاپ, حالقىمىزدىڭ دوستىعى مەن بىرلىگىن نىعايتىپ, قاسيەتتى وتانىمىز – قازاقستان رەسپۋبليكاسىنىڭ يگىلىگى ءۇشىن ايانباي ەڭبەك ەتۋدى تىلەيمىن.