قالا كۇنى مەرەكەسى اياسىندا ەلوردادا جاستار كۇنىنە ارنالعان «Special youth party» اتتى اۋقىمدى شارا وتكىزىلدى. ونى استانا قالاسى اكىمدىگىنىڭ قولداۋىمەن «دوس» تاۋەلسىز ءومىر» ورتالىعى مۇگەدەكتەر قوعامدىق بىرلەستىگى, «نەبەسنىي لەۆ» قوعامدىق قايىرىمدىلىق قورى جانە «Best for Kids» قوعامدىق قورى بىرلەسىپ وتكىزدى.
استانالىق تسيرك الدىنداعى كونتسەرتتىك الاڭدا تالانتتى جاستار مەن مۇمكىندىگى شەكتەۋلى جاندار ونەر كورسەتتى. كونتسەرت كەزىندە بارلىق قاتىسۋشىلار كوڭىلدى فلەش-موبقا قاتىستى. بۇل كۇنى ءتۇرلى باعىتتاعى 7 الاڭ جۇمىس ىستەدى: قالپاقتار سايىسى, سۋرەت سايىسى, توقىما توقيتىندار اراسىندا جارىس وتكىزۋگە ارنالعان اۋماق, اكۆارەلمەن سۋرەت سالۋشىلارعا ارنالعان جەكە اۋماق, قىنامەن مەحەندي سالۋشىلارعا ارنالعان اۋماق. حالىقتىق قولونەر شەبەرلەرىنىڭ قولىنان شىققان بۇيىمداردان كورمە ۇيىمداستىرىلدى. بۇدان بولەك, ديدجەي وسكاردىڭ قاتىسۋىمەن بي كەشى ءوتتى.
مەرەكەلىك شاراعا 100-دەن استام ادام قاتىستى. كەلۋشىلەر «تىلەك اعاشىنا» ىزگى نيەتتەرىن ءبىلدىرىپ, لەنتا بايلادى. مەرەكە سوڭىندا بارلىق قاتىسۋشىلار اسپانعا ءتۇرلى-ءتۇستى شارلار ۇشىردى.
اۋقىمدى شارانىڭ ماقساتى – مۇمكىندىگى شەكتەۋلى جانداردى ەلوردانىڭ قوعامدىق-ساياسي ومىرىنە كەڭىنەن تارتۋ, ولار تۋرالى جاقسى پىكىر قالىپتاستىرىپ, قوعامنىڭ بەلسەندى مۇشەلەرى رەتىندە قاراۋ.
«ەگەمەن-اقپارات».