ءال-فارابي اتىنداعى قازاق ۇلتتىق ۋنيۆەرسيتەتىندە ۇلى عالىمنىڭ ءومىرى مەن قىزمەتىنە, تۋعانىنا 100 جىلدىعىنا وراي قازاق حاندىعى قۇرىلۋىنىڭ 550 جىلدىعىنا ارنالعان «ونەگەلى ءومىر» سەرياسى بويىنشا جارىق كورگەن «ەرماحان بەكماحانوۆ» كىتابىنىڭ تۇساۋكەسەرى بولىپ ءوتتى. بۇل شارا عىلىمي ورتاعا جاقسى تانىس «بەكماحانوۆ وقۋلارى» اياسىندا وتكىزىلدى.
تانىستىرۋدا قازۇۋ رەكتورى, اكادەميك ع.مۇتانوۆ, پارلامەنت ءماجىلىسىنىڭ دەپۋتاتى ن.جازىلبەكوۆ, عالىمنىڭ جارى ح.بەكمۇحامەدوۆا, ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى, پروفەسسور ح.ءابجانوۆ, جازۋشى م.سارسەكە ءسوز سويلەدى. سونىمەن قاتار, ۋنيۆەرسيتەت وقىتۋشىلارى مەن ستۋدەنتتەرى دە بەلسەنە قاتىستى.
عالىم مۇتانوۆ: «ەرماحان بەكماحانوۆ قازاقستاندىق تاريحنامادا كورنەكتى ورىن الادى. ول – قازاقتان شىققان تۇڭعىش تاريح عىلىمدارىنىڭ دوكتورى, رەسپۋبليكاداعى العاش رەت قازاقستان تاريحى كافەدراسىنىڭ نەگىزىن قالاۋشى. ەرەكشە تالانتى, سارقىلماس قاجىر-قايراتى ءارى تۋعان حالقىنىڭ تاريحىنا وراسان زور سۇيىسپەنشىلىگىنىڭ ارقاسىندا ءوزىنىڭ از عانا عۇمىرىندا تاريح عىلىمىنا باعا جەتپەس ۇلەس قوستى», – دەپ اتاپ كورسەتتى.
باسىلىمعا ءار جىلدارداعى ە.بەكماحانوۆتىڭ ومىرباياندىق مالىمەتتەرى, ماقالالارى, فوتوسۋرەتتەرى, سونىمەن قاتار, عۇلاما عالىم تۋرالى تاريحشىلاردىڭ جانە دە شاكىرتتەرىنىڭ ەستەلىكتەرى مەن پىكىرلەرى ەنگىزىلگەن. كىتاپ كوپشىلىك وقىرمان قاۋىمعا ءارى عىلىم-ءبىلىم بەرۋ ورتالىقتارىندا جۇمىس اتقاراتىن قىزمەتكەرلەر مەن ستۋدەنتتەرگە ارنالعان.
مەدەۋ سارسەكە وقۋعا قاتىسۋشىلارعا ءوزىنىڭ بەكماحانوۆ تۋرالى – قازاق تىلىندە «نوقتالانعان تاريحشى» جانە ورىس تىلىندە «نەوبۋزداننىي يستوريك» كىتاپتارىن ۇسىندى. ولاردا ءوزىنىڭ باتىل كوزقاراستارى جانە تاريحي شىندىقتى كورسەتكەنى ءۇشىن قۋعىندالىپ, سوتتالعان عالىمنىڭ اۋىر تاعدىرى باياندالادى. ول سونىمەن بىرگە, تاريحشى-عالىمنىڭ 100 جىلدىعىن, قازاق حاندىعى قۇرىلۋىنىڭ 550 جىلدىعىن مەرەكەلەۋمەن سايكەس كەلىپ وتىرعاندىعىنىڭ سيمۆولدىعى مەن ماڭىزدىلىعىن اتاپ كورسەتتى.
ە.بەكماحانوۆتىڭ زايىبى حاليما ادامقىزى عالىمدى ەسكە الا وتىرىپ, ونىڭ جەكە ءومىرى تۋرالى تىڭ مالىمەتتەر كەلتىردى. «مەن ەرماحانمەن جيىرما جىل ءومىر ءسۇردىم, ودان كوپ نارسەلەردى ۇيرەندىم. ول ۇنەمى ماعان اقىلشى جانە دەمەۋشى بولدى. ابىلاي حاننىڭ ۇرپاعى رەتىندە ول ءوز وتانىنىڭ ناعىز پاتريوتى بولدى. مەنىڭ ويىمشا, ونىڭ ءومىرى مەن قىزمەتى تەك ۇلدارىنا عانا ەمەس, بۇكىل قازاق جاستارىنا ۇلگى», – دەدى.
ءىس-شارا بارىسىندا پارلامەنت ءماجىلىسىنىڭ دەپۋتاتى ن.جازىلبەكوۆ «اق جول» پارتياسىنىڭ اتىنان تاريح, ارحەولوگيا جانە ەتنولوگيا فاكۋلتەتىنىڭ ۇزدىك ستۋدەنتتەرىنە ە.بەكماحانوۆ اتىنداعى شاكىرتاقىنى تاپسىردى.
قورعانبەك امانجول,
«ەگەمەن قازاقستان».
الماتى.