ەل ازاماتتارىنىڭ قۇقىق قورعاۋ ورگاندارىنا دەگەن سەنىم دەڭگەيى قانداي؟

بۇل دەرەكتەر ۇلتتىق ستاتيستيكا بيۋروسىنىڭ «حالىقتىڭ قۇقىق قورعاۋ ورگاندارى مەن سوت جۇيەسىنە سەنىم دەڭگەيى» اتتى سوڭعى ساۋالناماسىندا كەلتىرىلگەن. زەرتتەۋ 2025 جىلعى قازان-قاراشا ايلارىندا جۇرگىزىلىپ, وعان 15 پەن 80 جاس ارالىعىنداعى 18 مىڭ  ادام قاتىسقان.

ساۋالناما ناتيجەسىنە سايكەس, سوڭعى ءبىر جىلدا قۇقىق قورعاۋ ورگاندارىنا مۇلدە جۇگىنبەگەن ازاماتتاردىڭ ۇلەسى 64,3%-دان 63,7%-عا دەيىن ازداپ قىسقارعان. الايدا نەگىزگى ورگاندارعا جۇگىنۋشىلەر سانى كەرىسىنشە تومەندەگەن:

پوليتسياعا جۇگىنگەندەر – 19,5%-دان 18,1%-عا ازايدى; پروكۋراتۋراعا جۇگىنگەندەر – 5,3%-دان 4,9%-عا تومەندەدى.

ال ءوتىنىش سانى ارتقان قۇرىلىمدار:

ورتكە قارسى قىزمەت – 3,6%-دان 5,4%-عا; سوت ورگاندارى – 6,1%-دان 6,4%-عا; سىبايلاس جەمقورلىققا قارسى قىزمەت – 0,6%-دان 0,8%-عا ءوستى.

ەكونوميكالىق تەرگەپ-تەكسەرۋ قىزمەتىنە جۇگىنگەندەر ۇلەسى وزگەرىسسىز قالىپ, 0,5% بولدى.

ساۋالناما: ەل ازاماتتارىنىڭ 80%-ى كونستيتۋتسيالىق رەفورمانى قولدايدى

ايەلدەر مەن اۋىل تۇرعىندارى سيرەك جۇگىنەدى

قۇقىق قورعاۋ ورگاندارىنا جۇگىنبەگەندەر اراسىندا ايەلدەر ۇلەسى ەرلەرگە قاراعاندا جوعارى: تيىسىنشە 65,8% جانە 61,6%. ايەلدەر تەك سوت جۇيەسىنە جۇگىنۋدە عانا ەرلەردەن ءسال الدا (6,7% قارسى 6,2%).

قالا مەن اۋىل تۇرعىندارى اراسىندا دا ايىرماشىلىق بار. قالالىقتار اۋىل تۇرعىندارىنا قاراعاندا قۇقىق قورعاۋ ورگاندارىنا ءجيى جۇگىنەدى. اسىرەسە بۇل ايىرماشىلىق پوليتسياعا جۇگىنۋ كەزىندە ايقىن بايقالادى:

قالادا – 19,8%; اۋىلدا – 14,9%.

سونىمەن بىرگە اۋىل تۇرعىندارىنىڭ ۇشتەن ەكىسىنەن استامى, ال قالا تۇرعىندارىنىڭ 60,7%-ى مۇلدە قۇقىق قورعاۋ ورگاندارىنا جۇگىنبەگەن.

نەگە ازاماتتار شاعىمدانبايدى؟

قىلمىسقا كۋا بولعان جاعدايدا قۇقىق قورعاۋ ورگاندارىنا جۇگىنبەيتىندەردىڭ نەگىزگى سەبەپتەرى مىنالار:

جاريا بولۋدان قورقۋ – 36,5%; ۋاقىت جوعالتۋ جانە قاعازباستىلىق – 33,8%; وڭ ناتيجە بولاتىنىنا سەنىمسىزدىك – 13,5%; قۇقىق قورعاۋ ورگاندارى قالاي كومەكتەسەتىنىن بىلمەۋ – 12,2%; جەمقورلىقتان قاۋىپتەنۋ – 3,9%.

ايتا كەتەرلىگى, سوڭعى ءبىر جىلدا جاريا بولۋدان قورقۋ مەن بيۋروكراتيالىق كەدەرگىلەردى العا تارتقانداردىڭ ۇلەسى ارتقان, ال سەنىمسىزدىك, اقپاراتتىڭ جەتكىلىكسىزدىگى جانە جەمقورلىقتى سەبەپ ەتكەندەردىڭ ۇلەسى كەرىسىنشە ازايعان.

ساۋالناما: قازاقستان حالقىنىڭ 77 پايىزى پرەزيدەنتكە جوعارى دەڭگەيدە سەنىم ءبىلدىردى

قاي قىزمەتكە سەنىم جوعارى؟

سەنىم دەڭگەيىنە كەلسەك, حالىق اراسىندا ەڭ جوعارى سەنىمگە يە ورگان − ورتكە قارسى قىزمەت. وعان تولىق نەمەسە ءىشىنارا سەنەتىندەردىڭ ۇلەسى 81,8%-دى قۇرايدى. ودان كەيىن پروكۋراتۋرا (66,2%) مەن پوليتسيا (65,3%) تۇر. سوت جۇيەسىنە تولىق سەنەتىندەر ۇلەسى – 63,2%, سىبايلاس جەمقورلىققا قارسى قىزمەتكە – 51,2%, ال ەكونوميكالىق تەرگەۋ قىزمەتىنە – 47,2%.

وسى دەرەكتەر ەل ازاماتتارىنىڭ قۇقىق قورعاۋ ورگاندارىنا دەگەن جالپى سەنىمى ساقتالعانىمەن, قىلمىس جاعدايىندا بىرلەسە ارەكەت ەتۋگە دەگەن بەلسەندىلىكتىڭ تومەندەپ كەلە جاتقانىن اڭعارتادى.