جاڭا كونستيتۋتسيا جوباسىندا تۇرعىن ۇيگە قاتىستى قۇقىقتاردى كونستيتۋتسيالىق دەڭگەيدە كۇشەيتۋ ۇسىنىلدى. ادام قۇقىقتارى جونىندەگى ۋاكىل ارتۋر لاستاەۆ سوت شەشىمىنسىز ازاماتتى تۇرعىن ۇيدەن ايىرۋعا دا, باسپانادان شىعارۋعا دا جول بەرمەۋ قاعيداتىن اتا زاڭدا ناقتى بەكىتۋ قاجەت ەكەنىن ايتتى, دەپ حابارلايدى Egemen.kz.
ارتۋر لاستاەۆتىڭ پىكىرىنشە, تۇرعىن ءۇي قۇقىعى – ادامنىڭ ىرگەلى قۇقىقتارىنىڭ ءبىرى. ول بۇل ۇستانىم ادام قۇقىقتارىنىڭ جالپىعا بىردەي دەكلاراتسياسىندا جانە ەكونوميكالىق, الەۋمەتتىك جانە مادەني قۇقىقتار تۋرالى حالىقارالىق پاكتىدە بەكىتىلگەنىن ەسكە سالدى. سوندىقتان باسپانانى تەك م ۇلىكتىك سانات رەتىندە قاراستىرۋ – قاتە كوزقاراس.
«ادام ءۇشىن ەڭ ماڭىزدىسى نە؟ ول ەشبىر سەبەپسىز باسپاناسىنان قۋىلىپ كەتپەيتىنىنە سەنىمدى بولعىسى كەلەدى. كونستيتۋتسيادا تۇرعىن ءۇي قۇقىعىن قورعاۋ كەپىلدىكتەرىن بەكىتۋ ەلىمىزدىڭ الەۋمەتتىك ءارى قۇقىق قورعاۋ سيپاتىن, ازاماتتاردىڭ قۇقىقتارى مەن بوستاندىقتارىنىڭ بۇلجىتپاي ساقتالاتىنىن ايعاقتايدى. بۇل ءبىز ءۇشىن اسا ماڭىزدى. ويتكەنى مەملەكەت رامىزدەر ءۇشىن ەمەس, ونىڭ قۇرامىنداعى ءاربىر ادام ءۇشىن ءومىر سۇرەدى. ادامعا باعدارلانۋ بيلىكتىڭ ءاربىر شەشىمى مەن ءىس-ارەكەتىنەن كورىنىس تابۋى ءتيىس», دەدى ادام قۇقىقتارى جونىندەگى ۋاكىل.
كاسىپوداقتار فەدەراتسياسىنىڭ توراعاسى: جاڭا كونستيتۋتسيا جوباسى ەڭبەك ادامدارىنىڭ تىلەگىمەن ۇندەسەدى
لاستاەۆ جاڭا كونستيتۋتسيا جوباسى قوعامنىڭ ناقتى سۇرانىستارىن ەسكەرەتىنىن, ازاماتتاردىڭ قۇقىقتارى مەن مۇددەلەرىن قورعاۋدىڭ ورنىقتى ءارى اشىق جۇيەسىن قالىپتاستىراتىنىن اتاپ ءوتتى. ونىڭ ايتۋىنشا, تۇرعىن ۇيگە قاتىستى داۋلاردى شەشۋدە سوتتىڭ ايرىقشا ءرولى ناقتى كورسەتىلۋى ءتيىس.
«باسپانادا تۇرۋعا جانە ودان شىعارۋعا قاتىستى داۋلاردى تەك سوت شەشۋى ءتيىس. سوندىقتان كونستيتۋتسيادا كەلەسىدەي نورمانى بەكىتۋ ۇسىنىلادى: سوت شەشىمىنسىز تۇرعىن ۇيدەن ايىرۋعا دا, باسپانادان شىعارۋعا دا جول بەرىلمەيدى. بىرەۋلەر بۇل قولدانىستاعى زاڭداردا ونسىز دا بار دەپ ايتۋى مۇمكىن. بىراق بۇل قاعيدانى نەگىزگى قۇقىقتىق قۇجاتتا بەكىتۋ ونىڭ زاڭدى تۇراقتىلىعىن قامتاماسىز ەتەدى», دەپ تۇيىندەدى ول.
جاڭا كونستيتۋتسيا جوباسىندا ادام مەن ازاماتتىق قۇقىقتىڭ ارا-جىگىن اجىراتۋ ۇسىنىلدى
ادام قۇقىقتارى جونىندەگى ۋاكىلدىڭ ايتۋىنشا, جاڭا كونستيتۋتسيا جوباسى ازاماتتاردىڭ كۇندەلىكتى ومىردە كەزدەسەتىن جاعدايلارىن ەسكەرە وتىرىپ ازىرلەنگەن. قۇجات ادامنىڭ قادىر-قاسيەتىن قورعاۋعا, ادىلەتتىلىك پەن قاۋىپسىزدىكتى قامتاماسىز ەتۋگە باعىتتالعان.
«جاڭا كونستيتۋتسيا جوباسى ازاماتتار كۇندەلىكتى ومىردە بەتپە-بەت كەلەتىن جاعدايلاردى ەسكەرەدى جانە ادامنىڭ نەگىزگى قۇقىقتارىنا نۇقسان كەلتىرۋى مۇمكىن شەشىمدەردىڭ الدىن الۋعا باعىتتالعان. جۇرگىزىلگەن جۇمىستىڭ ناتيجەلەرى مەن تالقىلاۋدىڭ اۋقىمىن ەسكەرە وتىرىپ, ۇسىنىلعان جوبا ازاماتتاردىڭ مۇددەلەرىن كورسەتەتىن ءارى ولاردىڭ كۇتۋلەرىنە ساي كەلەتىن قۇجات رەتىندە جالپىۇلتتىق رەفەرەندۋمعا شىعارىلىپ, قولداۋ تابا الادى», دەدى ارتۋر لاستاەۆ.
سونىمەن قاتار جاڭا اتا زاڭدا ادامداردىڭ ءومىرى مەن دەنساۋلىعىن قورعاۋ ماقساتىندا كوشىرۋ قاجەت بولاتىن جاعدايلار دا قاراستىرىلعان. الايدا مۇنداي جاعدايدا دا بارلىق راسىمدەردىڭ قاتاڭ ساقتالۋىنا جانە ازاماتتىڭ سوت ارقىلى قورعانۋ قۇقىعىنا تولىق كەپىلدىك بەرىلۋى ءتيىس.
«ارداگەرلەر ۇيىمى» جاڭا كونستيتۋتسيا جوباسىن قولدادى