كۇن جىلىنىپ, جاڭبىر جاۋسا تالعار اۋدانى بەساعاش اۋىلىنداعى تۇرعىنداردان مازا كەتەدى. سەبەبى, تاۋعا جاقىن ورنالاسقان ۇيلەرگە توپىراقتىڭ شامادان تىس ىلعالدانۋى ناتيجەسىندە جىلجىپ كەتۋ قاۋپى تونەدى, دەپ جازادى Egemen.kz.
تاياۋدا كولەمى شامامەن 150 تەكشە مەتردى قۇرايتىن توپىراق جىلجىپ, بەتوندى تىرەۋ قابىرعاسى بار قورعانىش قورشاۋدان اسىپ تۇسكەن. سالدارىنان 2 ءۇيدىڭ كىرەبەرىسى مەن 1 كولىككە زاقىم كەلدى. وقيعا بولعان كۇننەن باستاپ ءتيىستى مەكەملەردەن ون شاقتى مامان جانە 6 تەحنيكا تارتىلىپ, تازالاۋ جۇمىستارىن جۇرگىزىپ جاتىر.
«جاعداي باقىلاۋدا. قاۋىپسىزدىكتى قامتاماسىز ەتۋ جانە اۋماقتى جارىقتاندىرۋ ءۇشىن جارىق مۇناراسى ورناتىلدى. جاقىن ماڭداعى ۇيلەردىڭ تۇرعىندارى مەن قاۋىپسىزدىك شارالارىن ساقتاۋ جانە قايتالانۋى ىقتيمال تابيعي قۇبىلىستار كەزىندە ارەكەت ەتۋ بويىنشا پروفيلاكتيكالىق ءتۇسىندىرۋ جۇمىستارى جۇرگىزىلدى», دەيدى تالعار اۋدانى توتەنشە جاعدايلار ءبولىمى باسشىسىنىڭ مىندەتىن ۋاقىتشا اتقارۋشى ەركەبۇلان تەرگەۋسىزوۆ.
دەسە دە تاۋ بوكتەرىندە تۇراتىن تۇرعىنداردىڭ سوزىنشە, مۇنداي توسىن وقيعالاردىڭ بولۋى العاش رەت ەمەس.
ەسكە سالا كەتەيىك, قوناەۆ قالاسىندا جىلدامدىعى سەكۋندىنا 27 مەتر بوران سوعىپ, تۇرعىن ۇيلەردىڭ شاتىرى ۇشىپ, ينجەنەرلىك جەلىلەر زاقىمدانعان.
الماتى وبلىسى,
تالعار اۋدانى