كونستيتۋتسيالىق رەفورما جونىندەگى كوميسسيانىڭ كەزەكتى وتىرىسىندا بالا قۇقىقتارى جونىندەگى ۋاكىل دينارا زاكيەۆا تۇرعىن ءۇي قۇقىعى مەن بالالاردىڭ مۇددەسىن قورعاۋ بولىگىندە كونستيتۋتسيالىق كەپىلدىكتەردى كۇشەيتۋگە باعىتتالعان باستاما كوتەردى, دەپ جازادى Egemen.kz.
«بۇگىن تاڭەرتەڭ ۇكىمەتتىڭ كەڭەيتىلگەن وتىرىسىندا پرەزيدەنت قاسىم-جومارت كەمەل ۇلى توقاەۆ ازاماتتاردى نەگىزسىز تۇرعىن ۇيدەن شىعارۋدان جانە باسپاناسىنان ايىرىلۋدان قورعاۋ كەپىلدىكتەرىن كۇشەيتۋ قاجەتتىگىنە ەرەكشە نازار اۋداردى. تۇرعىن ۇيگە قۇقىق – بۇل الەۋمەتتىك كەپىلدىك قانا ەمەس, اسىرەسە بالالار تۋرالى ءسوز بولعاندا, ادامنىڭ قاۋىپسىزدىگىنىڭ نەگىزگى شارتى», دەدى دينارا زاكيەۆا.
كونستيتۋتسيالىق رەفورما جاستارعا قانداي مۇمكىندىكتەر ۇسىنادى؟
ءوز سوزىندە دينارا زاكيەۆا حالىقارالىق ستاندارتتارعا سايكەس, بالالار ءومىر ءسۇرۋ, دامۋ جانە ءوز قۇقىقتارىن قورعاۋ ءۇشىن ەڭ قولايلى جاعدايلارعا قۇقىلى ەكەنىن جەتكىزدى.
«بۇۇ بالا قۇقىقتارى تۋرالى كونۆەنتسياسىندا ءاربىر بالانىڭ فيزيكالىق, زياتكەرلىك, رۋحاني, ادامگەرشىلىك جانە الەۋمەتتىك دامۋىنا جەتكىلىكتى ءومىر ءسۇرۋ دەڭگەيىنە قۇقىعى بەكىتىلگەن. بۇل قاۋىپسىز ءارى تۇراقتى باسپانانىڭ بولۋىن كوزدەيدى. بالا ءۇشىن تۇرعىن ءۇي – ونىڭ ءال-اۋقاتى مەن مۇددەلەرىن قورعاۋدىڭ نەگىزگى فاكتورلارىنىڭ ءبىرى», دەدى ول.
سونىمەن قاتار تۇرعىن ءۇي قاتىناستارى سالاسىندا ازاماتتاردىڭ قۇقىقتارى بۇزىلۋ قاۋپى ەرەكشە ايقىن كورىنىپ وتىرعانى دا ايتىلدى. دينارا زاكيەۆانىڭ مالىمدەۋىنشە, قۇقىق قولدانۋ تاجىريبەسى بۇعان دالەل ەكەن. ويتكەنى ازاماتتاردىڭ قۇقىقتارىن شەكتەۋگە بايلانىستى الەۋمەتتىك تاۋەكەلدەر ءدال وسى تۇرعىن ءۇي قاتىناستارىنىڭ ۇيدەن شىعارۋ ماسەلەلەرى تۋىنداعان كەزدە ايقىن بايقالادى.
دينارا زاكيەۆا قىزمەت بارىسىندا ءتۇرلى قايعىلى تۇرمىستىق احۋال سالدارىنان بالالاردىڭ جالعىز باسپاناسىنان ايىرىلۋ قاۋپىنە تاپ بولاتىن جاعدايلارعا بىرنەشە رەت كەزىككەنىن ايتتى.
«بالالاردىڭ ءوزىنىڭ جالعىز اسىراۋشىسى اناسىنان ايىرىلاتىن جاعدايدى مىسالعا كەلتىرەيىن. اناسى كوزى تىرىسىندە باسپاناعا الىنعان يپوتەكالىق نەسيەنىڭ ەداۋىر بولىگىن وتەگەن. سوعان قاراماستان, بۇرىن تولەنىپ قويعان قاراجات قايتارىلمايتىن جاعدايدا بالالاردىڭ جالعىز باسپاناسىنان ايىرىلۋ قاۋپى تۋىندادى. ءبىزدىڭ ءوتىنىشىمىزدىڭ ناتيجەسىندە بانك قالعان قارىزدى كەشىرۋ تۋرالى شەشىم قابىلدادى. الايدا, مۇنداي وقيعالار وكىنىشكە قاراي, سيرەك ەمەس», دەدى بالا قۇقىقتارى جونىندەگى ۋاكىل.
كونستيتۋتسيالىق رەفورما: پايىم مەن پاراسات
وسىعان بايلانىستى ادام ومىرىندەگى ماڭىزدى جانە بالانىڭ ەڭ قاجەتتى مۇددەلەرىن سوت تاراپىنان ەسكەرۋسىز قالدىرىپ, تۇرعىن ۇيدەن ايىراتىن جاعدايلارعا جول بەرمەيتىن كەپىلدىكتەردى بەكىتۋ قاجەت.
بۇل تۇرعىدا ول ناقتى كونستيتۋتسيالىق نورما ۇسىنىلىپ وتىرعانىن اتاپ ءوتتى.
«وسىعان وراي, ازاماتتاردى تۇرعىن ۇيمەن قامتاماسىز ەتۋ ءۇشىن جاعداي جاساۋ جونىندەگى مەملەكەتتىڭ مىندەتىمەن قاتار, كونستيتۋتسيادا تۇرعىن ۇيدەن سوت شەشىمىنسىز شىعارۋعا جول بەرىلمەيتىنى تۋرالى نورمانى بەكىتۋدى ۇسىنامىز», دەدى دينارا زاكيەۆا.
ايدا بالاەۆا: كونستيتۋتسيالىق رەفورمالار قوعامدى جان-جاقتى جاڭعىرتۋدىڭ بەرىك نەگىزىن قالىپتاستىرادى
ءسوز سوڭىندا ول ۇسىنىلىپ وتىرعان نورما الەۋمەتتىك مەملەكەتتىڭ قۇندىلىق باعدارلارىن ايقىندايتىنىنا نازار اۋداردى.
«تۇرعىن ۇيدەن سوت شەشىمىنسىز شىعارۋعا جول بەرىلمەيتىنى تۋرالى نورمانىڭ كونستيتۋتسيادا كورىنىس تابۋى – الەۋمەتتىك مەملەكەتتىڭ كەمەلدىگىن جانە ادامنىڭ قادىر-قاسيەتىنە دەگەن قۇرمەتتى كورسەتەدى», دەدى ول.