استانادا نازارباەۆ ۋنيۆەرسيتەتىنە قاراستى پاتەردەن قارۋ تابىلۋىنا بايلانىستى سوتقا دەيىنگى تەرگەۋ باستالدى, دەپ جازادى Egemen.kz.
بۇعان دەيىن دەپۋتات مۇرات ابەنوۆ وسى ىسكە بايلانىستى شەتەل ازاماتتارى ۇستالىپ, قارۋ-جاراق ارسەنالى تابىلعانىن مالىمدەگەن ەدى. الايدا پوليتسيا بۇل اقپاراتتى ءىشىنارا جوققا شىعاردى. پوليتسيانىڭ حابارلاۋىنشا, ىسكە قاتىستى ەشكىم ۇستالماعان, بىراق اتىس قارۋىنىڭ تابىلعانى دالەلدەندى. سونىمەن قاتار تابىلعان قارۋلاردىڭ تاريحي قۇندىلىعى بار انتيكۆارلىق بۇيىمدار ەكەنى ايتىلدى.
دەپۋتاتتىڭ مالىمدەمەسى بۇقارالىق اقپارات قۇرالدارى مەن الەۋمەتتىك جەلىلەردە رەزونانس تۋدىردى. دەگەنمەن, قۇقىق قورعاۋ ورگاندارى دا, نازارباەۆ ۋنيۆەرسيتەتى دە مۇرات ابەنوۆتى جاۋاپكەرشىلىككە تارتۋعا نەگىز جوق ەكەنىن جەتكىزدى. ال عىلىم جانە جوعارى ءبىلىم ءمينيسترى ساياسات نۇربەك ۋنيۆەرسيتەتكە قاتىستى تەكسەرىس جۇرگىزۋگە سەبەپ جوق ەكەنىن مالىمدەدى. ونىڭ ايتۋىنشا, وقۋ ورنىندا وقىتۋشىلارعا بەرىلەتىن نەمەسە جالعا ۇسىنىلاتىن قىزمەتتىك پاتەرلەر بار.
سونىمەن قاتار تابىلعان زاتتار بويىنشا پوليتسيا سوتقا دەيىنگى تەرگەۋدى جالعاستىرىپ جاتىر. ءىس 21 ءساۋىر كۇنى سارايشىق اۋداندىق پوليتسيا باسقارماسىندا اتىس قارۋىن, وق-دارىلەردى, جارىلعىش زاتتاردى نەمەسە قۇرىلعىلاردى زاڭسىز يەمدەنۋ, بەرۋ, وتكىزۋ, ساقتاۋ, تاسىمالداۋ نەمەسە الىپ ءجۇرۋ بابى بويىنشا تىركەلگەن.
اتالعان باپقا سايكەس, كىنا دالەلدەنگەن جاعدايدا 19,6 ميلليون تەڭگەگە دەيىن ايىپپۇل سالۋ نەمەسە 5 جىلعا دەيىن باس بوستاندىعىن شەكتەۋ جازاسى قاراستىرىلعان. قازىر تەرگەۋ ناقتى كىمگە قاتىستى جۇرگىزىلىپ جاتقانى جاريالانباعان.