استانا. 19 تامىز. «كاسپي تەڭىزى – 2015» بايقاۋىنىڭ ءبىرىنشى قورىتىندىسى بەلگىلى بولدى. بۇل تۋرالى egemen.kz ءتىلشىسى حابارلادى.
العاشقى جاۋىنگەرلىك وق اتۋلاردىڭ ناتيجەلەرى بويىنشا «سارىارقا» زىمىران-ارتيللەريالىق كورابلىنىڭ ەكيپاجى ەكىنشى ورىنعا تابان تىرەدى. اسكەري تەڭىزشىلەرىمىزدىڭ كومانداسىن از عانا ۇپايمەن «گراد سۆياجسك» شاعىن ارتيللەريالىق كورابلىندە رەسەيلىك تەڭىزشىلەر وزىپ كەتتى.
جەرەبەگە سايكەس جاۋىنگەرلىك مىندەتتى ءبىرىنشى بولىپ ورىنداۋ كۇردەلى تاپسىرماسى ءبىزدىڭ كومانداعا بۇيىردى. ەكىنشى بولىپ رەسەيدىڭ, ءۇشىنشى ءازىربايجان اۋە تەڭىز كۇشتەرىنىڭ تەڭىزشىلەرى ەرىپ ءجۇردى.
بايقاۋ ەرەجەلەرى بويىنشا ءاربىر كورابل 12 توراپ جىلدامدىعىندا بەرىلگەن باعدار بويىنشا ءبىر اينالىمنان ءوتۋى ءتيىس. سودان كەيىن بەلگى بويىنشا كۇتۋ اۋدانىنان جاۋىنگەرلىك جاتتىعۋلاردى ورىنداۋ سەكتورىنا كوشىپ, جارقىراعىش اۆياتسيالىق بومبا تۇرىندەگى اۋە نىساناسىن, جۇزبەلى مينا مەن شاعىن كولەمدى تەڭىز نىساناسىن بارىنشا ءدال جويۋدى جۇزەگە اسىرادى. وق اتۋلاردى اياقتاپ, مارە شەبىنە كوشەدى.
تاپسىرمانى ورىنداۋ كەزىندە تەڭىزشىلەرىمىز مينا سىزبانۇسقاسى بويىنشا وق اتۋدا ۇزدىك بولىپ تابىلدى. ولار ءتورت رەت نىسانانى ءساتتى جويدى, رەسەيلىك تەڭىزشىلەر نىسانانى ءۇش رەت جويسا, ءازىربايجان اتك كومانداسى نىساناعا تيگىزگەن جوق.
بۇل بايقاۋدىڭ ءبىرىنشى قورىتىندىسى عانا ەكەنىن اتاپ وتكەن ءجون. كاسپي تەڭىزىندەگى شايقاس جالعاسۋدا. تەڭىزشىلەرىمىزدىڭ وزگە اينالىمداردا قوسىمشا ۇپاي جيناپ, سايىس كوشباسشىسى بولۋعا ۋاقىتى بار.
داستان كەنجالين.
دەرەك, سۋرەت: قازاقستان رەسپۋبليكاسى قورعانىس مينيسترلىگى.