كەشە دۋشانبە قالاسىندا ەلىمىزدىڭ ادىلەت ءمينيسترى ب.يماشەۆ شىۇ-عا مۇشە مەملەكەتتەرى ادىلەت مينيسترلەرىنىڭ ءۇشىنشى ماجىلىسىنە قاتىستى. ءماجىلىس تاجىكستان رەسپۋبليكاسىنىڭ ادىلەت ءمينيسترى ر.شوحمۋرودتىڭ باسشىلىعىمەن ءوتتى.
اتالعان شاراعا قىتاي حالىق رەسپۋبليكاسىنىڭ ادىلەت ءمينيسترى ۋ.اين, قىرعىز رەسپۋبليكاسىنىڭ ادىلەت ءمينيسترى ج.مامبەتاليەۆا, وزبەكستان رەسپۋبليكاسىنىڭ ادىلەت ءمينيسترى م.يكراموۆ, رەسەي فەدەراتسياسىنىڭ ادىلەت ءمينيسترى ا.كونوۆالوۆ قاتىستى. ونىڭ جۇمىسىنا, سونداي-اق شانحاي ىنتىماقتاستىق ۇيىمىنىڭ باس حاتشىسى د.مەزەنتسەۆ جانە بەلارۋس رەسپۋبليكاسىنىڭ ادىلەت ءمينيسترى و.سليجەۆسكي قاتىسىپ وتىردى.
مينيسترلەر 9-10 شىلدەدە ۋفا قالاسىندا (رەسەي فەدەراتسياسى) شىۇ-عا مۇشە مەملەكەتتەر باسشىلارى كەڭەسى ءسامميتىنىڭ شەڭبەرىندە قابىلدانعان شىۇ-عا مۇشە مەملەكەتتەرىنىڭ ۋفا دەكلاراتسياسىن, 2025 جىلعا دەيىن شىۇ-نىڭ دامۋ ستراتەگياسىن ەسكەرە وتىرىپ, باسىمدىقتاردى بەلگىلەدى جانە كەلىسىمدەردى ىسكە اسىرۋدىڭ ودان كەيىنگى جولدارىن تالقىلادى. شىۇ شەڭبەرىندە ىنتىماقتاستىق, نورما شىعارماشىلىق, نوتاريالدىق جانە ادۆوكاتتىق قىزمەت سالاسىندا, سونداي-اق ازاماتتىق جانە كوممەرتسيالىق ىستەر بويىنشا حالىقارالىق شارتتار شەڭبەرىندە باسقا زاڭگەرلىك قىزمەت, قۇقىقتىق كومەك كورسەتۋ ماسەلەرى تالقىلاندى. ءماجىلىس قورىتىندىسى بويىنشا بىرلەسكەن وتىنىشكە جانە شىۇ-عا مۇشە مەملەكەتتەردىڭ ادىلەت مينيسترلىكتەرى اراسىنداعى ىنتىماقتاستىق تۋرالى كەلىسىمگە قول قويىلدى, دەپ حابارلادى ادىلەت مينيسترلىگىنىڭ ءباسپاسوز قىزمەتى.